ਨਵੀਂ ਦਿੱਲੀ: ਜੇਕਰ ਲੰਬੇ ਸਮੇਂ ਤੱਕ ਗੇਮਿੰਗ, ਫਾਸਟ ਚਾਰਜਿੰਗ ਜਾਂ ਗਰਮ ਮੌਸਮ ਵਿੱਚ ਸਮਾਰਟਫੋਨ ਦੀ ਗਰਮੀ ਤੋਂ ਪਰੇਸ਼ਾਨ ਹੋ ਤਾਂ Nubia ਨੇ ਇਸ ਸਮੱਸਿਆ ਲਈ ਨਵਾਂ ਹੱਲ ਪੇਸ਼ ਕੀਤਾ ਹੈ। ਕੰਪਨੀ ਨੇ ਚੀਨ ਵਿੱਚ Magnetic Phone Cooler Neo ਲਾਂਚ ਕੀਤਾ ਹੈ, ਜਿਸ ਨੂੰ Ice Cream Cooler ਦੇ ਨਾਂ ਨਾਲ ਵੀ ਪੇਸ਼ ਕੀਤਾ ਜਾ ਰਿਹਾ ਹੈ। ਇਸ ਦੀ ਵਿਕਰੀ 10 ਸਤੰਬਰ ਤੋਂ JD.com ਰਾਹੀਂ ਸ਼ੁਰੂ ਹੋਵੇਗੀ।
ਇਸ ਕੂਲਰ ਦੀ ਸਭ ਤੋਂ ਵੱਡੀ ਖਾਸੀਅਤ ਇਸ ਦੀ ਕੂਲਿੰਗ ਸਮਰੱਥਾ ਹੈ। Nubia ਦੇ ਮੁਤਾਬਕ ਇਸ ਵਿੱਚ 36×36 ਮਿਲੀਮੀਟਰ ਦੀ ਥਰਮੋਇਲੈਕਟ੍ਰਿਕ ਕੂਲਿੰਗ ਪਲੇਟ ਦਿੱਤੀ ਗਈ ਹੈ। ਇਸ ਦੇ ਨਾਲ ਕੋਲਡ-ਫੋਰਜਡ ਐਲੂਮੀਨੀਅਮ ਹੀਟਸਿੰਕ ਅਤੇ ਐਲੂਮੀਨੀਅਮ ਹੀਟ-ਸਪ੍ਰੈਡਿੰਗ ਪਲੇਟ ਵੀ ਮਿਲਦੀ ਹੈ। ਕੂਲਰ ਵੱਧ ਤੋਂ ਵੱਧ 25 ਵਾਟ ਪਾਵਰ ਲੈਂਦਾ ਹੈ ਅਤੇ ਇਸ ਦੀ ਕੂਲਿੰਗ ਪਲੇਟ ਦਾ ਤਾਪਮਾਨ -18 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਸਕਦਾ ਹੈ। ਕੰਪਨੀ ਦਾ ਦਾਅਵਾ ਹੈ ਕਿ ਭਾਰੀ ਵਰਤੋਂ ਦੌਰਾਨ ਇਹ ਫੋਨ ਦੇ ਤਾਪਮਾਨ ਨੂੰ 60 ਡਿਗਰੀ ਤੱਕ ਘਟਾ ਸਕਦਾ ਹੈ।
ਕੂਲਰ ਵਿੱਚ 7-ਬਲੇਡ ਵਾਲਾ ਪੱਖਾ ਦਿੱਤਾ ਗਿਆ ਹੈ, ਜੋ 6,000 ਆਰਪੀਐਮ ਤੱਕ ਦੀ ਰਫ਼ਤਾਰ ਨਾਲ ਚੱਲ ਸਕਦਾ ਹੈ। ਇਸ ਦਾ ਹਵਾ ਬਾਹਰ ਕੱਢਣ ਦਾ ਤਰੀਕਾ ਵੀ ਖਾਸ ਹੈ। ਗਰਮ ਹਵਾ ਉੱਪਰ ਅਤੇ ਹੇਠਾਂ ਵੱਲ ਬਾਹਰ ਨਿਕਲਦੀ ਹੈ, ਜਿਸ ਕਾਰਨ ਗੇਮ ਖੇਡਦੇ ਸਮੇਂ ਫੋਨ ਨੂੰ ਹੱਥਾਂ ਵਿੱਚ ਫੜਨ ’ਤੇ ਗਰਮ ਹਵਾ ਸਿੱਧੀ ਹੱਥਾਂ ਵੱਲ ਨਹੀਂ ਆਉਂਦੀ। ਘੱਟ ਰਫ਼ਤਾਰ ’ਤੇ ਪੱਖੇ ਦਾ ਸ਼ੋਰ ਲਗਭਗ 33 ਡੈਸੀਬਲ ਦੱਸਿਆ ਗਿਆ ਹੈ।
Nubia ਨੇ ਇਸ ਵਿੱਚ ਚਾਰ ਵੱਖ-ਵੱਖ ਕੂਲਿੰਗ ਮੋਡ ਦਿੱਤੇ ਹਨ। ਇਨ੍ਹਾਂ ਵਿੱਚ Silent, Powerful, Overclocking ਅਤੇ Temperature Control ਸ਼ਾਮਲ ਹਨ। ਖਾਸ ਗੱਲ ਇਹ ਹੈ ਕਿ ਕੂਲਰ ਚਲਾਉਣ ਲਈ ਕਿਸੇ ਐਪ ਦੀ ਲੋੜ ਨਹੀਂ ਪੈਂਦੀ। ਸਾਈਡ ’ਤੇ ਦਿੱਤੇ ਭੌਤਿਕ ਬਟਨਾਂ ਰਾਹੀਂ ਮੋਡ ਬਦਲੇ ਜਾ ਸਕਦੇ ਹਨ। Temperature Control ਮੋਡ ਵਿੱਚ ਅੰਦਰ ਮੌਜੂਦ ਚਿੱਪ ਤਾਪਮਾਨ ਨੂੰ ਆਪਣੇ ਆਪ ਨਿਯੰਤਰਿਤ ਕਰ ਸਕਦੀ ਹੈ। ਇਸ ਵਿੱਚ RGB ਲਾਈਟਿੰਗ ਵੀ ਦਿੱਤੀ ਗਈ ਹੈ।
