ਨਵੀਂ ਦਿੱਲੀ: ਅਧਿਆਪਕ ਬਣਨ ਦਾ ਸੁਪਨਾ ਦੇਖ ਰਹੇ ਉਮੀਦਵਾਰਾਂ ਲਈ ਕੇਂਦਰੀ ਅਧਿਆਪਕ ਯੋਗਤਾ ਪ੍ਰੀਖਿਆ (CTET) ਨਾਲ ਜੁੜੀ ਅਹਿਮ ਖ਼ਬਰ ਸਾਹਮਣੇ ਆਈ ਹੈ। ਕੇਂਦਰੀ ਮਾਧਿਅਮਿਕ ਸਿੱਖਿਆ ਬੋਰਡ (CBSE) ਵੱਲੋਂ ਸਤੰਬਰ 2026 ਸੈਸ਼ਨ ਦੀ CTET ਪ੍ਰੀਖਿਆ ਦੀ ਬਦਲੀ ਹੋਈ ਤਾਰੀਖ ਜਲਦ ਜਾਰੀ ਕੀਤੇ ਜਾਣ ਦੀ ਉਮੀਦ ਹੈ। ਰਿਪੋਰਟਾਂ ਮੁਤਾਬਕ ਪ੍ਰੀਖਿਆ ਦੀ ਪਹਿਲਾਂ ਤੈਅ ਕੀਤੀ ਤਾਰੀਖ ਵਿੱਚ ਬਦਲਾਅ ਕੀਤਾ ਗਿਆ ਹੈ ਅਤੇ ਨਵੀਂ ਤਾਰੀਖ ਦਾ ਐਲਾਨ ਅਧਿਕਾਰਤ CTET ਵੈੱਬਸਾਈਟ ’ਤੇ ਕੀਤਾ ਜਾਵੇਗਾ।
CTET ਦੇਸ਼ ਪੱਧਰ ਦੀ ਅਧਿਆਪਕ ਯੋਗਤਾ ਪ੍ਰੀਖਿਆ ਹੈ। ਇਸ ਰਾਹੀਂ ਉਮੀਦਵਾਰ ਕਲਾਸ 1 ਤੋਂ 8 ਤੱਕ ਅਧਿਆਪਕ ਅਹੁਦਿਆਂ ਲਈ ਆਪਣੀ ਯੋਗਤਾ ਸਾਬਤ ਕਰਦੇ ਹਨ। ਪ੍ਰੀਖਿਆ ਵਿੱਚ ਦੋ ਪੇਪਰ ਹੁੰਦੇ ਹਨ। ਪੇਪਰ-1 ਕਲਾਸ 1 ਤੋਂ 5 ਤੱਕ ਪੜ੍ਹਾਉਣ ਦੇ ਇੱਛੁਕ ਉਮੀਦਵਾਰਾਂ ਲਈ, ਜਦਕਿ ਪੇਪਰ-2 ਕਲਾਸ 6 ਤੋਂ 8 ਤੱਕ ਲਈ ਹੁੰਦਾ ਹੈ।
CTET ਪਾਸ ਕਰਨ ਲਈ ਆਮ ਜਾਂ General/UR ਸ਼੍ਰੇਣੀ ਦੇ ਉਮੀਦਵਾਰਾਂ ਨੂੰ ਘੱਟੋ-ਘੱਟ 60 ਫ਼ੀਸਦੀ ਅੰਕ ਹਾਸਲ ਕਰਨੇ ਪੈਂਦੇ ਹਨ। ਜੇਕਰ ਪੇਪਰ 150 ਅੰਕਾਂ ਦਾ ਹੈ ਤਾਂ ਇਹ 90 ਅੰਕ ਬਣਦੇ ਹਨ।
ਦੂਜੇ ਪਾਸੇ, OBC, SC, ST ਅਤੇ PwD ਸਮੇਤ ਰਾਖਵੇਂ ਵਰਗਾਂ ਦੇ ਉਮੀਦਵਾਰਾਂ ਲਈ ਘੱਟੋ-ਘੱਟ 55 ਫ਼ੀਸਦੀ ਅੰਕ ਦਾ ਮਾਪਦੰਡ ਹੈ। 150 ਅੰਕਾਂ ਦੇ ਪੇਪਰ ਵਿੱਚ 55 ਫ਼ੀਸਦੀ ਲਗਭਗ 82.5 ਅੰਕ ਬਣਦੇ ਹਨ।
CBSE ਨੇ ਅਗਸਤ ਵਿੱਚ CTET ਸਤੰਬਰ 2026 ਲਈ ਅਰਜ਼ੀ ਪ੍ਰਕਿਰਿਆ ਮੁੜ ਖੋਲ੍ਹੀ ਸੀ। ਇਹ ਵਿੰਡੋ 25 ਅਗਸਤ ਤੋਂ 1 ਸਤੰਬਰ ਤੱਕ ਖੁੱਲ੍ਹੀ ਰਹੀ। ਹੁਣ ਉਮੀਦਵਾਰਾਂ ਦੀ ਨਜ਼ਰ ਨਵੀਂ ਪ੍ਰੀਖਿਆ ਤਾਰੀਖ, ਸਿਟੀ ਇੰਟੀਮੇਸ਼ਨ ਸਲਿੱਪ ਅਤੇ ਐਡਮਿਟ ਕਾਰਡ ਦੀ ਜਾਣਕਾਰੀ ’ਤੇ ਹੈ।
ਉਮੀਦਵਾਰਾਂ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਕਿਸੇ ਵੀ ਅਣਅਧਿਕਾਰਤ ਸੋਸ਼ਲ ਮੀਡੀਆ ਪੋਸਟ ਜਾਂ ਅਫ਼ਵਾਹ ’ਤੇ ਭਰੋਸਾ ਕਰਨ ਦੀ ਬਜਾਏ CBSE ਅਤੇ CTET ਦੀ ਅਧਿਕਾਰਤ ਵੈੱਬਸਾਈਟ ’ਤੇ ਜਾਰੀ ਨੋਟਿਸ ਨੂੰ ਹੀ ਅੰਤਿਮ ਮੰਨਣ। ਨਵੀਂ ਤਾਰੀਖ ਜਾਰੀ ਹੋਣ ਤੋਂ ਬਾਅਦ ਪੇਪਰ-1 ਅਤੇ ਪੇਪਰ-2 ਦੀ ਸ਼ਿਫਟ, ਸਿਟੀ ਸਲਿੱਪ ਅਤੇ ਐਡਮਿਟ ਕਾਰਡ ਸਬੰਧੀ ਜਾਣਕਾਰੀ ਵੀ ਉਪਲਬਧ ਕਰਵਾਈ ਜਾਵੇਗੀ।
