ਜਲੰਧਰ: ਹਾਕੀ ਪੰਜਾਬ ਦੇ ਐਗਜ਼ੀਕਿਊਟਿਵ ਬੋਰਡ ਨੇ 16 ਸਾਲਾਂ ਤੋਂ ਸੰਸਥਾ ਦੇ ਦਫ਼ਤਰ ਸਕੱਤਰ ਵਜੋਂ ਸੇਵਾਵਾਂ ਨਿਭਾ ਰਹੇ ਕੁਲਬੀਰ ਸਿੰਘ ਨੂੰ ਹਾਕੀ ਪੰਜਾਬ ਦਾ ਚੀਫ ਐਗਜ਼ੀਕਿਊਟਿਵ ਅਫਸਰ (CEO) ਨਿਯੁਕਤ ਕੀਤਾ ਹੈ। ਇਹ ਨਿਯੁਕਤੀ ਨਵੇਂ ਖੇਡ ਪ੍ਰਸ਼ਾਸਨਕ ਢਾਂਚੇ ਤਹਿਤ ਕੀਤੀ ਗਈ ਹੈ।
ਰਿਪੋਰਟ ਮੁਤਾਬਕ ਭਾਰਤ ਸਰਕਾਰ ਦੇ ਖੇਡ ਮੰਤਰਾਲੇ ਵੱਲੋਂ ਜਾਰੀ ਨੈਸ਼ਨਲ ਸਪੋਰਟਸ ਗਵਰਨੈਂਸ ਐਕਟ 2025 ਅਤੇ ਹਾਕੀ ਇੰਡੀਆ ਦੀਆਂ ਹਦਾਇਤਾਂ ਦੇ ਅਨੁਸਾਰ ਹਾਕੀ ਪੰਜਾਬ ਦੇ ਨਵੇਂ ਬਾਈਲਾਅਜ਼ ਲਾਗੂ ਕੀਤੇ ਗਏ ਹਨ। ਇਸੇ ਪ੍ਰਬੰਧ ਤਹਿਤ ਸੂਬਾ ਪੱਧਰੀ ਹਾਕੀ ਐਸੋਸੀਏਸ਼ਨ ਵਿੱਚ CEO ਦਾ ਅਹੁਦਾ ਰੱਖਿਆ ਗਿਆ ਹੈ।
ਹਾਕੀ ਪੰਜਾਬ ਦੇ ਨਵੇਂ ਐਗਜ਼ੀਕਿਊਟਿਵ ਬੋਰਡ ਨੇ ਬਾਈਲਾਅਜ਼ ਦੇ ਰੂਲ 14.7.1 ਦੇ ਤਹਿਤ ਕੁਲਬੀਰ ਸਿੰਘ ਦੀ ਇਸ ਅਹੁਦੇ ਲਈ ਨਿਯੁਕਤੀ ਕੀਤੀ ਹੈ। CEO ਦੀ ਜ਼ਿੰਮੇਵਾਰੀ ਵਿੱਚ ਹਾਕੀ ਪੰਜਾਬ ਦੇ ਪ੍ਰਧਾਨ, ਸਕੱਤਰ ਜਨਰਲ ਅਤੇ ਐਗਜ਼ੀਕਿਊਟਿਵ ਬੋਰਡ ਵੱਲੋਂ ਤੈਅ ਕੀਤੀਆਂ ਨੀਤੀਆਂ, ਪ੍ਰੋਗਰਾਮਾਂ ਅਤੇ ਫ਼ੈਸਲਿਆਂ ਨੂੰ ਨਿਰਧਾਰਤ ਸਮੇਂ ਅਨੁਸਾਰ ਲਾਗੂ ਕਰਨਾ ਸ਼ਾਮਲ ਹੋਵੇਗਾ।
ਇਸ ਤੋਂ ਇਲਾਵਾ CEO ਹਾਕੀ ਇੰਡੀਆ, ਸਰਕਾਰੀ ਵਿਭਾਗਾਂ ਅਤੇ ਹੋਰ ਸੂਬਾਈ ਖੇਡ ਐਸੋਸੀਏਸ਼ਨਾਂ ਨਾਲ ਅਧਿਕਾਰਤ ਪੱਤਰ ਵਿਹਾਰ ਅਤੇ ਤਾਲਮੇਲ ਦਾ ਕੰਮ ਵੀ ਸੰਭਾਲੇਗਾ। ਖਿਡਾਰੀਆਂ ਦੇ ਹੱਕਾਂ ਅਤੇ ਉਨ੍ਹਾਂ ਨਾਲ ਸਬੰਧਤ ਮਾਮਲਿਆਂ ਦੀ ਦੇਖਭਾਲ ਵੀ ਇਸ ਅਹੁਦੇ ਦੀਆਂ ਮੁੱਖ ਜ਼ਿੰਮੇਵਾਰੀਆਂ ਵਿੱਚ ਸ਼ਾਮਲ ਦੱਸੀ ਗਈ ਹੈ।
ਹਾਕੀ ਪੰਜਾਬ ਦੀ ਹਾਲੀਆ ਚੋਣ ਪ੍ਰਕਿਰਿਆ ਵਿੱਚ ਨਿਤਿਨ ਕੋਹਲੀ ਪ੍ਰਧਾਨ ਚੁਣੇ ਗਏ ਸਨ, ਜਦਕਿ ਕੁਲਬੀਰ ਸਿੰਘ ਐਗਜ਼ੀਕਿਊਟਿਵ ਮੈਂਬਰਾਂ ਵਿੱਚ ਵੀ ਸ਼ਾਮਲ ਸਨ।
ਨਵੇਂ ਪ੍ਰਬੰਧਕੀ ਢਾਂਚੇ ਨਾਲ ਹਾਕੀ ਪੰਜਾਬ ਵਿੱਚ ਪ੍ਰਸ਼ਾਸਨਿਕ ਜ਼ਿੰਮੇਵਾਰੀਆਂ ਨੂੰ ਹੋਰ ਸਪੱਸ਼ਟ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਪੰਜਾਬ ਵਿੱਚ ਆਉਣ ਵਾਲੇ ਵੱਡੇ ਹਾਕੀ ਮੁਕਾਬਲਿਆਂ ਦੀਆਂ ਤਿਆਰੀਆਂ ਦੇ ਮੱਦੇਨਜ਼ਰ ਵੀ ਨਵੇਂ ਬੋਰਡ ਅਤੇ ਪ੍ਰਸ਼ਾਸਨ ਦੀ ਭੂਮਿਕਾ ਮਹੱਤਵਪੂਰਨ ਰਹੇਗੀ।
