ਮੁੰਬਈ: ਭਾਰਤ ਦੇ ਤੇਜ਼ੀ ਨਾਲ ਵਧ ਰਹੇ ਬੈਟਰੀ ਉਦਯੋਗ ਵਿੱਚ ਆਉਣ ਵਾਲੇ ਸਾਲਾਂ ਦੌਰਾਨ ਰੁਜ਼ਗਾਰ ਦੇ ਵੱਡੇ ਮੌਕੇ ਪੈਦਾ ਹੋਣ ਦੀ ਉਮੀਦ ਹੈ। ਐਡੇਕੋ ਇੰਡੀਆ ਦੇ ਅਨੁਮਾਨ ਮੁਤਾਬਕ, 2029-30 ਤੱਕ ਦੇਸ਼ ਦਾ ਬੈਟਰੀ ਉਦਯੋਗ ਲਗਭਗ 15 ਤੋਂ 20 ਲੱਖ ਨੌਕਰੀਆਂ ਪੈਦਾ ਕਰ ਸਕਦਾ ਹੈ। ਇਨ੍ਹਾਂ ਵਿੱਚ ਕਰੀਬ 25 ਫ਼ੀਸਦੀ ਸਿੱਧੀਆਂ ਅਤੇ 75 ਫ਼ੀਸਦੀ ਅਸਿੱਧੀਆਂ ਨੌਕਰੀਆਂ ਹੋਣਗੀਆਂ।
ਐਡੇਕੋ ਇੰਡੀਆ ਦੇ ਨਿਰਦੇਸ਼ਕ ਅਤੇ ਜਨਰਲ ਸਟਾਫਿੰਗ ਮੁਖੀ ਦੀਪੇਸ਼ ਗੁਪਤਾ ਅਨੁਸਾਰ, ਭਾਰਤ ਹੁਣ ਲਿਥੀਅਮ-ਆਇਨ ਸੈੱਲਾਂ ਦੀ ਦਰਾਮਦ ਅਤੇ ਅਸੈਂਬਲੀ ’ਤੇ ਨਿਰਭਰਤਾ ਤੋਂ ਅੱਗੇ ਵਧ ਰਿਹਾ ਹੈ। ਦੇਸ਼ ਵਿੱਚ ਸੈੱਲ ਨਿਰਮਾਣ, ਬੈਟਰੀ ਪੈਕ ਤਿਆਰ ਕਰਨ ਅਤੇ ਪੁਰਾਣੀਆਂ ਬੈਟਰੀਆਂ ਦੀ ਮੁੜ ਵਰਤੋਂ ਤੇ ਰੀਸਾਈਕਲਿੰਗ ਤੱਕ ਪੂਰਾ ਉਦਯੋਗਿਕ ਢਾਂਚਾ ਵਿਕਸਤ ਹੋ ਰਿਹਾ ਹੈ।
ਰਿਪੋਰਟ ਮੁਤਾਬਕ ਇਸ ਖੇਤਰ ਵਿੱਚ ਭਰਤੀਆਂ ਦੀ ਗਤੀ ਹਰ ਸਾਲ 25 ਤੋਂ 30 ਫ਼ੀਸਦੀ ਤੱਕ ਵਧ ਸਕਦੀ ਹੈ। ਇਲੈਕਟ੍ਰੋਕੈਮਿਸਟਰੀ, ਸਮੱਗਰੀ ਵਿਗਿਆਨ, ਬੈਟਰੀ ਇੰਜੀਨੀਅਰਿੰਗ, ਨਿਰਮਾਣ ਅਤੇ ਰੀਸਾਈਕਲਿੰਗ ਵਰਗੇ ਹੁਨਰਾਂ ਵਾਲੇ ਮਾਹਿਰਾਂ ਦੀ ਮੰਗ ਵਧਣ ਦੀ ਸੰਭਾਵਨਾ ਹੈ। ਵਿਸ਼ੇਸ਼ ਬੈਟਰੀ ਇੰਜੀਨੀਅਰਾਂ ਨੂੰ ਰਵਾਇਤੀ ਨਿਰਮਾਣ ਅਤੇ ਇਲੈਕਟ੍ਰਾਨਿਕ ਖੇਤਰਾਂ ਦੇ ਮੁਕਾਬਲੇ 35 ਤੋਂ 40 ਫ਼ੀਸਦੀ ਤੱਕ ਵੱਧ ਤਨਖ਼ਾਹ ਮਿਲ ਸਕਦੀ ਹੈ।
ਦੇਸ਼ ਦੀ ਬੈਟਰੀ ਨਿਰਮਾਣ ਸਮਰੱਥਾ ਇਸ ਸਮੇਂ ਲਗਭਗ 60 ਗੀਗਾਵਾਟ-ਘੰਟੇ ਹੈ, ਜੋ 2026 ਦੇ ਅੰਤ ਤੱਕ ਕਰੀਬ 100 ਗੀਗਾਵਾਟ-ਘੰਟੇ ਹੋਣ ਦੀ ਉਮੀਦ ਹੈ। ਕਰਨਾਟਕ, ਗੁਜਰਾਤ, ਤੇਲੰਗਾਨਾ ਅਤੇ ਹਰਿਆਣਾ ਵਿੱਚ ਬਣ ਰਹੀਆਂ ਗਿਗਾਫੈਕਟਰੀਆਂ ਰੁਜ਼ਗਾਰ ਦੇ ਵੱਡੇ ਕੇਂਦਰ ਬਣ ਸਕਦੀਆਂ ਹਨ।
