ਵਾਸ਼ਿੰਗਟਨ: ਭਾਰਤੀ ਮੂਲ ਦੇ ਇੰਜੀਨੀਅਰ ਜੋੜੇ ਵਿਕਾਸ ਅਤੇ ਅਨੁਰਾਧਾ ਸਿਨਹਾ ਨੇ ਉੱਤਰੀ ਟੈਕਸਾਸ ਯੂਨੀਵਰਸਿਟੀ (ਯੂ.ਐਨ.ਟੀ.) ਵਿੱਚ ਕਾਲਜ ਆਫ਼ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (ਏ.ਆਈ) ਅਤੇ ਐਡਵਾਂਸਡ ਐਨਾਲਿਟਿਕਸ ਦੀ ਸਥਾਪਨਾ ਲਈ 20 ਮਿਲੀਅਨ ਡਾਲਰ ਦਾਨ ਕੀਤੇ ਹਨ। ਯੂਨੀਵਰਸਿਟੀ ਦੇ ਅਨੁਸਾਰ, ‘ਅਨੁਰਾਧਾ ਅਤੇ ਵਿਕਾਸ ਸਿਨਹਾ ਕਾਲਜ ਆਫ਼ ਆਰਟੀਫਿਸ਼ੀਅਲ ਇੰਟੈਲੀਜੈਂਸ ਐਂਡ ਐਡਵਾਂਸਡ ਐਨਾਲਿਟਿਕਸ’ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਲਈ ਨਵੇਂ ਮੌਕੇ ਪੈਦਾ ਕਰੇਗਾ।
ਕਾਲਜ AI, ਸਾਈਬਰ ਸੁਰੱਖਿਆ, ਡਾਟਾ ਵਿਗਿਆਨ, ਉੱਨਤ ਵਿਸ਼ਲੇਸ਼ਣ, ਸਿਹਤ ਸੂਚਨਾ ਵਿਗਿਆਨ ਅਤੇ ਸੂਚਨਾ ਵਿਗਿਆਨ ਵਰਗੇ ਖੇਤਰਾਂ ‘ਤੇ ਕੰਮ ਕਰੇਗਾ। ਬ੍ਰੌਡਕਾਮ ਦੇ ਉਪ ਪ੍ਰਧਾਨ ਵਿਕਾਸ ਸਿਨਹਾ ਨੇ ਕਿਹਾ ਕਿ ਇਹ ਦਾਨ ਉਨ੍ਹਾਂ ਮੌਕਿਆਂ ਨੂੰ ਅੱਗੇ ਵਧਾਉਣ ਅਤੇ ਇਹ ਪਛਾਣ ਕਰਨ ਦੀ ਕੋਸ਼ਿਸ਼ ਹੈ ਕਿ ਪ੍ਰਵਾਸੀ ਨਾ ਸਿਰਫ਼ ‘ਅਮਰੀਕਨ ਡਰੀਮ’ ਦਾ ਹਿੱਸਾ ਬਣਦੇ ਹਨ, ਸਗੋਂ ਇਸ ਨੂੰ ਬਣਾਉਣ ਵਿਚ ਵੀ ਯੋਗਦਾਨ ਪਾਉਂਦੇ ਹਨ।
ਇਹ ਦਾਨ ਕਾਲਜ ਦੀ ਲੀਡਰਸ਼ਿਪ, ਸਕਾਲਰਸ਼ਿਪ, ਪ੍ਰੋਫੈਸਰਸ਼ਿਪ, ਉੱਦਮਤਾ, ਉੱਨਤ ਖੋਜ ਅਤੇ ਉੱਭਰ ਰਹੀਆਂ ਤਕਨਾਲੋਜੀਆਂ ਲਈ ਛੇ ਸਥਾਈ ਐਂਡੋਮੈਂਟਾਂ ਦੀ ਸਥਾਪਨਾ ਕਰੇਗਾ। ਵਿਕਾਸ ਅਤੇ ਅਨੁਰਾਧਾ ਦੋਵਾਂ ਨੇ ਭਾਰਤ ਦੀ ਸ਼੍ਰੀ ਵੈਂਕਟੇਸ਼ਵਰ ਯੂਨੀਵਰਸਿਟੀ ਤੋਂ ਸਿਵਲ ਇੰਜੀਨੀਅਰਿੰਗ ਵਿੱਚ ਗ੍ਰੈਜੂਏਸ਼ਨ ਕੀਤੀ ਅਤੇ ਅਗਲੇਰੀ ਪੜ੍ਹਾਈ ਲਈ ਅਮਰੀਕਾ ਚਲੇ ਗਏ। ਵਿਕਾਸ ਨੇ 2023 ਵਿੱਚ ਉੱਤਰੀ ਟੈਕਸਾਸ ਯੂਨੀਵਰਸਿਟੀ (UNT) ਤੋਂ ਆਪਣੀ ਪੀ.ਐਚ.ਡੀ. ਪੂਰੀ ਕੀਤੀ।
