ਆਕਲੈਂਡ: ਪੰਜਾਬੀ ਗਾਇਕ ਦਿਲਜੀਤ ਦੋਸਾਂਝ ਅੱਜ ਨਿਊਜ਼ੀਲੈਂਡ ਦੇ ਆਕਲੈਂਡ ਵਿੱਚ ਆਪਣੇ ਬਹੁ-ਪ੍ਰਚਾਰਿਤ “ਓਰਾ ਟੂਰ” ਦੇ ਹਿੱਸੇ ਵਜੋਂ ਪ੍ਰਫੋਮ ਕਰਨ ਜਾ ਰਹੇ ਹਨ। ਇਸ ਦੌਰਾਨ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਨੂੰ ਇੱਕ ਖਾਸ ਤੋਹਫ਼ਾ ਮਿਲਣ ਵਾਲਾ ਹੈ । ਸ਼ੋਅ ਤੋਂ ਪਹਿਲਾਂ, ਉਨ੍ਹਾਂ ਦੀ ਟੀਮ ਨੇ ਇੱਕ ਵਿਲੱਖਣ ਪਹਿਲ ਸ਼ੁਰੂ ਕੀਤੀ ਹੈ।ਇੱਥੇ ਸਾਰੇ ਦਰਸ਼ਕਾਂ ਨੂੰ ਮੁਫ਼ਤ ਵਿੱਚ ਤੁਰਲੇ ਵਾਲੀ ਪੱਗ ਬੰਨੀ ਜਾਵੇਗੀ ।
ਦਿਲਜੀਤ ਦੀ ਟੀਮ ਦੇ ਮੈਂਬਰ ਕੰਗ ਦੇ ਅਨੁਸਾਰ, ਸਥਾਨ ‘ਤੇ ਇੱਕ ਮੁਫ਼ਤ ਪੱਗ ਸਟਾਲ ਲਗਾਇਆ ਜਾਵੇਗਾ, ਜਿੱਥੇ ਕੋਈ ਵੀ ਆ ਕੇ ਪੱਗ ਬੰਨ੍ਹ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਯਕੀਨੀ ਬਣਾਉਣ ਲਈ ਕੀਤਾ ਜਾ ਰਿਹਾ ਹੈ ਕਿ ਸਾਰੇ ਦਰਸ਼ਕ ਦਿਲਜੀਤ ਦੇ ਸਿਗਨੇਚਰ ਸਟਾਇਲ ਵਿੱਚ ਦਿਖਾਈ ਦੇਣ। ਟੀਮ ਨੇ ਸਪੱਸ਼ਟ ਕੀਤਾ ਹੈ ਕਿ ਪੱਗ ਬੰਨ੍ਹਣ ਲਈ ਕੋਈ ਫੀਸ ਨਹੀਂ ਹੋਵੇਗੀ। ਦਿਲਜੀਤ ਦਾ ਓਰਾ ਟੂਰ ਪਿਛਲੇ ਮਹੀਨੇ ਤੋਂ ਅੰਤਰਰਾਸ਼ਟਰੀ ਪੱਧਰ ‘ਤੇ ਹਿੱਟ ਰਿਹਾ ਹੈ, ਜਿਸਨੇ ਹੁਣ ਤੱਕ ਹਜ਼ਾਰਾਂ ਪ੍ਰਸ਼ੰਸਕਾਂ ਨੂੰ ਆਕਰਸ਼ਿਤ ਕੀਤਾ ਹੈ।
ਇਹ ਧਿਆਨ ਦੇਣ ਯੋਗ ਹੈ ਕਿ ਦਿਲਜੀਤ ਨੇ “ਕੌਣ ਬਣੇਗਾ ਕਰੋੜਪਤੀ” ‘ਤੇ ਅਮਿਤਾਭ ਬੱਚਨ ਦੇ ਪੈਰ ਛੂਹੇ ਸਨ, ਜਿਸ ਨਾਲ ਵਿਵਾਦ ਪੈਦਾ ਹੋ ਗਿਆ ਸੀ ਅਤੇ ਖਾਲਿਸਤਾਨੀ ਸਮਰਥਕ ਪੰਨੂ ਨੇ ਦਿਲਜੀਤ ਨੂੰ ਧਮਕੀ ਵੀ ਦਿੱਤੀ ਸੀ। ਨਤੀਜੇ ਵਜੋਂ, ਸੁਰੱਖਿਆ ਏਜੰਸੀਆਂ ਹਾਈ ਅਲਰਟ ‘ਤੇ ਹਨ ਅਤੇ ਸਖ਼ਤ ਸੁਰੱਖਿਆ ਉਪਾਅ ਕੀਤੇ ਗਏ ਹਨ।
