ਮਣੀਪੁਰ ਦੀ “ਬੂਂਗ” ਨੇ ਲੰਡਨ ‘ਚ ਜਿੱਤਿਆ ਵੱਕਾਰੀ ਬਾਫਟਾ ਪੁਰਸਕਾਰ

ਲੰਡਨ: ਫਰਹਾਨ ਅਖਤਰ ਦੇ ਐਕਸਲ ਐਂਟਰਟੇਨਮੈਂਟ ਦੁਆਰਾ ਨਿਰਮਿਤ ਇੱਕ ਵਿਲੱਖਣ ਮਣੀਪੁਰੀ-ਅਧਾਰਤ ਕਾਮੇਡੀ-ਡਰਾਮਾ “ਬੂਂਗ” ਨੇ ਬੀਤੇ ਦਿਨ ਲੰਡਨ ਵਿੱਚ ਸਰਬੋਤਮ ਬੱਚਿਆਂ ਅਤੇ ਪਰਿਵਾਰਕ ਫਿਲਮ ਸ਼੍ਰੇਣੀ ਵਿੱਚ ਵੱਕਾਰੀ ਬਾਫਟਾ ਪੁਰਸਕਾਰ ਜਿੱਤਿਆ। ਇਸ ਫਿਲਮ ਨਾਲ ਨਿਰਦੇਸ਼ਨ ਵਿੱਚ ਆਪਣੀ ਸ਼ੁਰੂਆਤ ਕਰਨ ਵਾਲੀ ਲਕਸ਼ਮੀਪ੍ਰਿਆ ਦੇਵੀ ਨੇ ਪੁਰਸਕਾਰ ਸਵੀਕਾਰ ਕਰਦੇ ਹੋਏ ਮਣੀਪੁਰ ਵਿੱਚ ਸ਼ਾਂਤੀ ਲਈ ਇੱਕ ਭਾਵਨਾਤਮਕ ਅਪੀਲ ਕੀਤੀ। ਉਨ੍ਹਾਂ ਨੇ “ਪੈਡਿੰਗਟਨ ਦ ਮਿਊਜ਼ੀਕਲ” ਦੇ ਮੁੱਖ ਪਾਤਰ ਪੈਡਿੰਗਟਨ ਬੀਅਰ ਤੋਂ ਪੁਰਸਕਾਰ ਪ੍ਰਾਪਤ ਕੀਤਾ। ਉਨ੍ਹਾਂ ਨਾਲ ਸਟੇਜ ‘ਤੇ ਨਿਰਮਾਤਾ ਫਰਹਾਨ ਅਖਤਰ, ਰਿਤੇਸ਼ ਸਿਧਵਾਨੀ ਅਤੇ ਸਹਾਇਕ ਨਿਰਦੇਸ਼ਕ ਰਾਹੁਲ ਸ਼ਾਰਦਾ ਸ਼ਾਮਲ ਹੋਏ।

ਦੇਵੀ ਨੇ ਕਿਹਾ, “ਇੱਥੇ ਤੱਕ ਪਹੁੰਚਣਾ ਉਸ ਪਹਾੜ ਦੀ ਚੋਟੀ ‘ਤੇ ਪਹੁੰਚਣ ਵਰਗਾ ਲੱਗਿਆ ,ਜਿਸ ‘ਤੇ ਚੜਨ ਬਾਰੇ ਸਾਨੂੰ ਪਤਾ ਵੀ ਨਹੀਂ ਸੀ ।” ਉਨ੍ਹਾਂ ਨੇ ਕਾਮਨਾ ਕੀਤੀ ਕਿ ਮਣੀਪੁਰ ਵਿੱਚ ਸ਼ਾਤੀ ਵਾਪਸ ਆਏ ਅਤੇ ਵਿਸਥਾਪਿਤ ਬੱਚਿਆ ,ਜਿਨ੍ਹਾਂ ਵਿੱਚ ਫਿਲਮ ਦੇ ਬਾਲ ਕਲਾਕਾਰ ਵੀ ਸ਼ਾਮਲ ਹਨ ਨੂੰ ਫਿਰ ਤੋਂ ਉਨ੍ਹਾਂ ਦੀ ਖੁਸ਼ੀ ਮਿਲੇ ਅਤੇ ਉਹ ਫਿਰ ਤੋਂ ਸਪਨੇ ਦੇਖ ਸਕਣ । ਗੁਗੁਨ ਕਿਪਗੇਨ ਅਤੇ ਬਾਲਾ ਹਿਜਾਮ ਅਭਿਨੀਤ ਇਸ ਫਿਲਮ ਨੇ “ਲੀਲੋ ਐਂਡ ਸਟਿਚ,” “ਆਰਕੋ,” ਅਤੇ “ਜ਼ੂਟ੍ਰੋਪੋਲਿਸ 2” ਵਰਗੀਆਂ ਫਿਲਮਾਂ ਨੂੰ ਪਛਾੜ ਕੇ ਇਹ ਵੱਕਾਰੀ ਪੁਰਸਕਾਰ ਜਿੱਤਿਆ। ਬ੍ਰਿਟਿਸ਼ ਅਕੈਡਮੀ ਆਫ਼ ਫਿਲਮ ਐਂਡ ਟੈਲੀਵਿਜ਼ਨ ਆਰਟਸ (ਬਾਫਟਾ) ਅਵਾਰਡਜ਼ ਦਾ 2026 ਐਡੀਸ਼ਨ ਥੇਮਜ਼ ਨਦੀ ਦੇ ਕੰਢੇ ‘ਤੇ ਰਾਇਲ ਫੈਸਟੀਵਲ ਹਾਲ ਵਿਖੇ ਆਯੋਜਿਤ ਕੀਤਾ ਗਿਆ। ਬਾਲੀਵੁੱਡ ਅਦਾਕਾਰਾ ਆਲੀਆ ਭੱਟ ਨੇ ‘ਸੈਂਟੀਮੈਂਟਲ ਵੈਲਿਊ’ ਲਈ ‘ਬੈਸਟ ਫਿਲਮ ਨਾਟ ਇਨ ਦ ਇੰਗਲਿਸ਼ ਲੈਂਗੂਏਜ’ ਪੁਰਸਕਾਰ ਪੇਸ਼ ਕੀਤਾ।

ਉਨ੍ਹਾਂ ਨੇ ਆਪਣੇ ਭਾਸ਼ਣ ਦੀ ਸ਼ੁਰੂਆਤ “ਨਮਸਤੇ” ਨਾਲ ਕੀਤੀ ਅਤੇ ਕਿਹਾ ਕਿ ਸਿਨੇਮਾ ਦੀ ਅਸਲ ਭਾਸ਼ਾ ਭਾਵਨਾਵਾਂ ਹਨ। ਲਿਓਨਾਰਡੋ ਡੀਕੈਪ੍ਰੀਓ-ਸਟਾਰਰ “ਵਨ ਬੈਟਲ ਆਫ਼ ਅਦਰ” ਨੇ ਸਮਾਰੋਹ ਵਿੱਚ ਛੇ ਦੇ ਨਾਲ ਸਭ ਤੋਂ ਵੱਧ ਪੁਰਸਕਾਰ ਜਿੱਤੇ। ਬਾਫਟਾ ਦੇ ਪ੍ਰਧਾਨ ਪ੍ਰਿੰਸ ਵਿਲੀਅਮ ਅਤੇ ਉਨ੍ਹਾਂ ਦੀ ਪਤਨੀ, ਕੇਟ ਮਿਡਲਟਨ, ਵੀ ਸਮਾਰੋਹ ਵਿੱਚ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਡਰਾਉਣੀ ਫਿਲਮ “ਸਿਨਰਜ਼” ਅਤੇ ਰਹੱਸਮਈ ਡਰਾਉਣੀ ਫਿਲਮ “ਫ੍ਰੈਂਕਨਸਟਾਈਨ” ਨੇ ਤਿੰਨ-ਤਿੰਨ ਪੁਰਸਕਾਰ ਜਿੱਤੇ। ਪਾਲ ਥਾਮਸ ਐਂਡਰਸਨ ਨੂੰ “ਵਨ ਬੈਟਲ ਆਫ਼ ਅਦਰ” ਲਈ ਸਰਵੋਤਮ ਨਿਰਦੇਸ਼ਕ ਚੁਣਿਆ ਗਿਆ। ਜੈਸੀ ਬਕਲੇ ਨੂੰ “ਹੈਮਨੇਟ” ਲਈ ਸਰਵੋਤਮ ਅਦਾਕਾਰਾ ਦਾ ਪੁਰਸਕਾਰ ਮਿਲਿਆ, ਜਦੋਂ ਕਿ ਰੌਬਰਟ ਅਰਾਮਾਇਓ ਨੂੰ “ਆਈ ਸਵੇਅਰ” ਲਈ ਸਰਵੋਤਮ ਅਦਾਕਾਰ ਦਾ ਪੁਰਸਕਾਰ ਮਿਲਿਆ। ਉਨ੍ਹਾਂ ਨੇ ਲਿਓਨਾਰਡੋ ਡੀਕੈਪ੍ਰੀਓ ਅਤੇ ਟਿਮੋਥੀ ਚੈਲਮੇਟ ਵਰਗੇ ਸਿਤਾਰਿਆਂ ਨੂੰ ਪਛਾੜ ਦਿੱਤਾ।