ਚੇਨਈ: ਤਮਿਲਨਾਡੂ ਸਰਕਾਰ ਨੇ ਔਰਤਾਂ ਲਈ ਚੱਲ ਰਹੀ ਮੁਫ਼ਤ ਬੱਸ ਯਾਤਰਾ ਸਹੂਲਤ ਦਾ ਦਾਇਰਾ ਵਧਾ ਦਿੱਤਾ ਹੈ। ਮੁੱਖ ਮੰਤਰੀ ਸੀ. ਜੋਸਫ਼ ਵਿਜੇ ਨੇ 2 ਅਕਤੂਬਰ ਨੂੰ ਗਾਂਧੀ ਜਯੰਤੀ ਮੌਕੇ ‘ਵੇਤਰੀ ਪਯਨਮ’ ਯੋਜਨਾ ਦੀ ਸ਼ੁਰੂਆਤ ਕੀਤੀ। ਇਸ ਤਹਿਤ ਹੁਣ ਔਰਤਾਂ ਨੂੰ ਪਹਿਲਾਂ ਨਾਲੋਂ ਵੱਧ ਸਰਕਾਰੀ ਬੱਸ ਸੇਵਾਵਾਂ ਵਿੱਚ ਬਿਨਾਂ ਕਿਰਾਏ ਦੇ ਸਫ਼ਰ ਦੀ ਸਹੂਲਤ ਮਿਲੇਗੀ।
ਰੋਜ਼ਾਨਾ 84 ਲੱਖ ਤੋਂ ਵੱਧ ਔਰਤਾਂ ਨੂੰ ਲਾਭ
ਸਰਕਾਰੀ ਅੰਕੜਿਆਂ ਮੁਤਾਬਕ ‘ਵੇਤਰੀ ਪਯਨਮ’ ਯੋਜਨਾ ਤਹਿਤ ਸੂਬੇ ਦੀਆਂ 12,692 ਸਰਕਾਰੀ ਬੱਸਾਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਇਹ ਬੱਸਾਂ ਸੂਬੇ ਦੀਆਂ ਸੱਤ ਸਰਕਾਰੀ ਟਰਾਂਸਪੋਰਟ ਇਕਾਈਆਂ ਵੱਲੋਂ ਚਲਾਈਆਂ ਜਾਂਦੀਆਂ ਹਨ। ਸਰਕਾਰ ਦਾ ਅੰਦਾਜ਼ਾ ਹੈ ਕਿ ਇਸ ਸਹੂਲਤ ਨਾਲ ਹਰ ਰੋਜ਼ ਕਰੀਬ 84.32 ਲੱਖ ਔਰਤਾਂ ਲਾਭ ਲੈ ਸਕਣਗੀਆਂ।
ਐਕਸਪ੍ਰੈੱਸ ਤੇ ਡੀਲਕਸ ਬੱਸਾਂ ਵੀ ਦਾਇਰੇ ’ਚ
ਵਿਸਤਾਰ ਤੋਂ ਬਾਅਦ ਮੁਫ਼ਤ ਯਾਤਰਾ ਦੀ ਸਹੂਲਤ ਐਕਸਪ੍ਰੈੱਸ, ਲਿਮਿਟਡ ਸਟਾਪ ਸਰਵਿਸ (LSS) ਅਤੇ ਡੀਲਕਸ ਬੱਸਾਂ ਤੱਕ ਪਹੁੰਚ ਗਈ ਹੈ। ਇਸ ਤੋਂ ਇਲਾਵਾ ਮੋਫੁਸਿਲ ਆਰਡੀਨਰੀ ਬੱਸਾਂ ਅਤੇ 40 ਕਿਲੋਮੀਟਰ ਤੋਂ ਵੱਧ ਦੂਰੀ ਵਾਲੀਆਂ ਪਹਾੜੀ ਰੂਟਾਂ ਦੀਆਂ ਆਰਡੀਨਰੀ ਬੱਸਾਂ ਨੂੰ ਵੀ ਯੋਜਨਾ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।
ਆਮਦਨ ਦੀ ਕੋਈ ਹੱਦ ਨਹੀਂ
ਯੋਜਨਾ ਦੇ ਤਹਿਤ ਲਾਭ ਲੈਣ ਲਈ ਔਰਤਾਂ ਲਈ ਕੋਈ ਆਮਦਨ ਸੀਮਾ ਨਹੀਂ ਰੱਖੀ ਗਈ ਅਤੇ ਯਾਤਰਾਵਾਂ ਦੀ ਗਿਣਤੀ ’ਤੇ ਵੀ ਰੋਜ਼ਾਨਾ ਕੋਈ ਪਾਬੰਦੀ ਨਹੀਂ ਹੈ। ਇਸ ਤੋਂ ਇਲਾਵਾ ਟ੍ਰਾਂਸਜੈਂਡਰ ਵਿਅਕਤੀਆਂ ਨੂੰ ਵੀ ਇਸ ਮੁਫ਼ਤ ਯਾਤਰਾ ਸਹੂਲਤ ਵਿੱਚ ਸ਼ਾਮਲ ਕੀਤਾ ਗਿਆ ਹੈ।
ਸਿੱਖਿਆ, ਰੁਜ਼ਗਾਰ ਤੇ ਸਿਹਤ ਸੇਵਾਵਾਂ ਤੱਕ ਪਹੁੰਚ ਆਸਾਨ ਕਰਨ ਦਾ ਉਦੇਸ਼
ਸਰਕਾਰ ਮੁਤਾਬਕ ਯੋਜਨਾ ਦਾ ਮਕਸਦ ਔਰਤਾਂ ਅਤੇ ਲੜਕੀਆਂ ਲਈ ਕਾਲਜ, ਕੰਮਕਾਜ ਵਾਲੀ ਥਾਂ, ਹਸਪਤਾਲ ਅਤੇ ਹੋਰ ਜ਼ਰੂਰੀ ਸੇਵਾਵਾਂ ਤੱਕ ਪਹੁੰਚ ਨੂੰ ਆਸਾਨ ਬਣਾਉਣਾ ਹੈ। ਮੁਫ਼ਤ ਬੱਸ ਸਫ਼ਰ ਨਾਲ ਆਵਾਜਾਈ ਦੇ ਖਰਚੇ ਨੂੰ ਘਟਾਉਣ ’ਤੇ ਧਿਆਨ ਦਿੱਤਾ ਗਿਆ ਹੈ।
ਪਹਿਲਾਂ ‘ਵਿਦਿਆਲ ਪਯਨਮ’ ਤਹਿਤ ਮੁਫ਼ਤ ਸਫ਼ਰ ਦੀ ਸਹੂਲਤ ਮੁੱਖ ਤੌਰ ’ਤੇ ਆਮ ਬੱਸ ਸੇਵਾਵਾਂ ਤੱਕ ਸੀਮਿਤ ਸੀ। ਹੁਣ ‘ਵੇਤਰੀ ਪਯਨਮ’ ਰਾਹੀਂ ਇਸ ਦਾ ਦਾਇਰਾ ਕਈ ਹੋਰ ਸਰਕਾਰੀ ਬੱਸ ਸ਼੍ਰੇਣੀਆਂ ਤੱਕ ਵਧਾਇਆ ਗਿਆ ਹੈ।
