ਹਰਿਆਣਾ : ਦਿੱਲੀ ਤੋਂ ਕਰਨਾਲ ਤੱਕ ਪ੍ਰਸਤਾਵਿਤ ਨਮੋ ਭਾਰਤ ਕੋਰੀਡੋਰ ‘ਤੇ ਨਿਰਮਾਣ ਕਾਰਜ ਸ਼ੁਰੂ ਹੋਣ ਤੋਂ ਪਹਿਲਾਂ ਜ਼ਮੀਨੀ ਤਿਆਰੀਆਂ ਤੇਜ਼ ਹੋ ਗਈਆਂ ਹਨ। ਰਾਸ਼ਟਰੀ ਰਾਜਧਾਨੀ ਖੇਤਰੀ ਆਵਾਜਾਈ ਨਿਗਮ (ਐਨ.ਸੀ.ਆਰ.ਟੀ.ਸੀ.) ਨੇ ਸੜਕ ਚੌੜੀ ਕਰਨ ਅਤੇ ਟੈਲੀਕਾਮ ਕੇਬਲਾਂ ਨੂੰ ਸ਼ਿਫਟ ਕਰਨ ਲਈ ਟੈਂਡਰ ਜਾਰੀ ਕੀਤਾ ਹੈ। ਹਾਲਾਂਕਿ ਇਸ ਪ੍ਰੋਜੈਕਟ ਨੂੰ ਹਾਲੇ ਤੱਕ ਕੇਂਦਰ ਸਰਕਾਰ ਤੋਂ ਅੰਤਿਮ ਪ੍ਰਵਾਨਗੀ ਨਹੀਂ ਮਿਲੀ ਹੈ, ਪਰ ਸ਼ੁਰੂਆਤੀ ਕੰਮਾਂ ਦੇ ਲਈ ਨਿਗਮ ਨੇ ਪ੍ਰਕਿ ਰਿਆ ਅੱਗੇ ਵਧਾ ਦਿੱਤੀ ਹੈ ।
ਅਧਿਕਾਰੀਆਂ ਦੇ ਅਨੁਸਾਰ, ਇਹ ਯਕੀਨੀ ਬਣਾਉਣ ਲਈ ਕਿ ਕੋਰੀਡੋਰ ‘ਤੇ ਨਿਰਮਾਣ ਸ਼ੁਰੂ ਹੋਣ ਤੋਂ ਬਾਅਦ ਆਵਾਜਾਈ ਦੇ ਪ੍ਰਵਾਹ ਵਿੱਚ ਵਿਘਨ ਨਾ ਪਵੇ, ਪਹਿਲਾਂ ਸੜਕ ਚੌੜੀ ਕਰਨ ਦਾ ਕੰਮ ਕੀਤਾ ਜਾਵੇਗਾ। ਤਾਂਬਾ ਅਤੇ ਆਪਟੀਕਲ ਫਾਈਬਰ ਕੇਬਲ, ਬਿਜਲੀ ਦੇ ਖੰਭੇ, ਪਾਈਪਲਾਈਨਾਂ ਅਤੇ ਹੋਰ ਉਪਕਰਣਾਂ ਨੂੰ ਹਟਾ ਕੇ ਤਬਦੀਲ ਕੀਤਾ ਜਾਵੇਗਾ। ਠੇਕੇਦਾਰ ਨੂੰ ਸਾਰੀਆਂ ਮੌਜੂਦਾ ਟੈਲੀਕਾਮ ਕੇਬਲਾਂ ਦੀ ਪਛਾਣ ਕਰਨ ਅਤੇ ਇੱਕ ਵਿਸਤ੍ਰਿਤ ਰਿਪੋਰਟ ਤਿਆਰ ਕਰਨ ਦੀ ਲੋੜ ਹੋਵੇਗੀ। ਸ਼ਿਫਟਿੰਗ ਦਾ ਕੰਮ ਐਨ.ਸੀ.ਆਰ.ਟੀ.ਸੀ. ਦੀ ਪ੍ਰਵਾਨਗੀ ਤੋਂ ਬਾਅਦ ਹੀ ਸ਼ੁਰੂ ਹੋਵੇਗਾ।
ਹਰਿਆਣਾ ਵਿੱਚ ਹੋਵੇਗਾ 100 ਕਿਲੋਮੀਟਰ
ਇਸ ਕੋਰੀਡੋਰ ਦੇ ਕੁੱਲ 136 ਕਿਲੋਮੀਟਰ ਵਿੱਚੋਂ, 100 ਕਿਲੋਮੀਟਰ ਹਰਿਆਣਾ ਵਿੱਚੋਂ ਲੰਘੇਗਾ, ਜਦੋਂ ਕਿ 36 ਕਿਲੋਮੀਟਰ ਦਿੱਲੀ ਵਿੱਚ ਹੋਵੇਗਾ। ਇਸਨੂੰ ਤਿੰਨ ਭਾਗਾਂ ਵਿੱਚ ਵੰਡਿਆ ਗਿਆ ਹੈ: ਸਰਾਏ ਕਾਲੇ ਖਾਨ ਤੋਂ ਅਲੀਪੁਰ, ਅਲੀਪੁਰ ਤੋਂ ਸਮਾਲਖਾ ਅਤੇ ਸਮਾਲਖਾ ਤੋਂ ਕਰਨਾਲ ਨਵਾਂ ਆਈ.ਐਸ.ਬੀ.ਟੀ.।
ਇਸ ਪ੍ਰੋਜੈਕਟ ਦੇ ਪੂਰਾ ਹੋਣ ਤੋਂ ਬਾਅਦ, ਹਰਿਆਣਾ ਦੇ ਯਾਤਰੀਆਂ ਨੂੰ ਕਾਫ਼ੀ ਰਾਹਤ ਮਿਲੇਗੀ। ਅੰਦਾਜ਼ਾ ਲਗਾਇਆ ਜਾ ਰਿਹਾ ਹੈ ਕਿ ਦਿੱਲੀ ਤੋਂ ਕਰਨਾਲ ਤੱਕ ਦੀ ਯਾਤਰਾ ਵਿੱਚ ਸਿਰਫ 90 ਮਿੰਟ ਲੱਗਣਗੇ। ਇਸ ਦੇ ਨਾਲ ਹੀ, ਕਸ਼ਮੀਰੀ ਗੇਟ ਤੋਂ ਮੂਰਥਲ ਤੱਕ ਦੀ ਯਾਤਰਾ 30 ਮਿੰਟਾਂ ਵਿੱਚ, ਇੰਦਰਪ੍ਰਸਥ ਤੋਂ ਸੋਨੀਪਤ ਤੱਕ 35 ਮਿੰਟਾਂ ਵਿੱਚ ਅਤੇ ਕਸ਼ਮੀਰੀ ਗੇਟ ਤੋਂ ਪਾਣੀਪਤ ਤੱਕ ਦੀ ਯਾਤਰਾ ਸਿਰਫ ਇੱਕ ਘੰਟੇ ਵਿੱਚ ਪੂਰੀ ਕੀਤੀ ਜਾ ਸਕਦੀ ਹੈ।
