ਮੁੰਬਈ : ਮਸ਼ਹੂਰ ਫਿਲਮ ਨਿਰਮਾਤਾ, ਸਿਨੇਮੈਟੋਗ੍ਰਾਫ਼ਰ ਅਤੇ ਤਾਮਿਲ ਸਿਨੇਮਾ ਦੇ ਅਦਾਕਾਰ ਵੇਲੂ ਪ੍ਰਭਾਕਰਨ ਦਾ ਅੱਜ, 18 ਜੁਲਾਈ ਨੂੰ ਸਵੇਰੇ ਚੇਨਈ ਦੇ ਇਕ ਪ੍ਰਾਈਵੇਟ ਹਸਪਤਾਲ ਵਿੱਚ ਦੇਹਾਂਤ ਹੋ ਗਿਆ। ਉਹ 68 ਸਾਲ ਦੇ ਸਨ ਅਤੇ ਲੰਬੇ ਸਮੇਂ ਤੋਂ ਬਿਮਾਰੀ ਨਾਲ ਜੂਝ ਰਹੇ ਸਨ। ਪਰਿਵਾਰ ਅਨੁਸਾਰ, ਪਿਛਲੇ ਕੁਝ ਦਿਨਾਂ ਤੋਂ ਉਨ੍ਹਾਂ ਦੀ ਹਾਲਤ ਬਹੁਤ ਗੰਭੀਰ ਸੀ, ਜਿਸ ਕਾਰਨ ਉਨ੍ਹਾਂ ਨੂੰ ਆਈ.ਸੀ.ਯੂ. ਵਿੱਚ ਦਾਖਲ ਕਰਵਾਇਆ ਗਿਆ ਸੀ। ਵੇਲੂ ਪ੍ਰਭਾਕਰਨ ਦੀ ਮੌਤ ਨਾਲ ਦੱਖਣੀ ਫਿਲਮ ਇੰਡਸਟਰੀ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ।
ਸ਼ਰਧਾਂਜਲੀ ਅਤੇ ਅੰਤਿਮ ਸਸਕਾਰ
ਵੇਲੂ ਪ੍ਰਭਾਕਰਨ ਦੀ ਦੇਹ ਨੂੰ ਸ਼ਨੀਵਾਰ ਸ਼ਾਮ ਤੋਂ ਐਤਵਾਰ ਦੁਪਹਿਰ, 20 ਜੁਲਾਈ ਤੱਕ ਚੇਨਈ ਦੇ ਵਾਲਸਰਾਵੱਕਮ ਵਿਖੇ ਆਮ ਲੋਕਾਂ ਦੇ ਅੰਤਿਮ ਦਰਸ਼ਨ ਅਤੇ ਸ਼ਰਧਾਂਜਲੀ ਲਈ ਰੱਖਿਆ ਜਾਵੇਗਾ। ਇਸ ਤੋਂ ਬਾਅਦ, ਉਨ੍ਹਾਂ ਦਾ ਅੰਤਿਮ ਸਸਕਾਰ ਐਤਵਾਰ ਸ਼ਾਮ ਨੂੰ ਪੋਰੂਰ ਦੇ ਸ਼ਮਸ਼ਾਨਘਾਟ ਵਿੱਚ ਉਨ੍ਹਾਂ ਦੇ ਨਜ਼ਦੀਕੀ ਪਰਿਵਾਰ ਅਤੇ ਦੋਸਤਾਂ ਦੀ ਮੌਜੂਦਗੀ ਵਿੱਚ ਕੀਤਾ ਜਾਵੇਗਾ।
ਕਰੀਅਰ ਦੀ ਸ਼ੁਰੂਆਤ ਅਤੇ ਮਹੱਤਵਪੂਰਨ ਫਿਲਮਾਂ
ਵੇਲੂ ਪ੍ਰਭਾਕਰਨ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਇਕ ਸਿਨੇਮੈਟੋਗ੍ਰਾਫ਼ਰ ਵਜੋਂ ਕੀਤੀ। 1989 ਵਿੱਚ, ਉਨ੍ਹਾਂ ਨੇ ‘ਨਾਲਿਆ ਮਨੀਥਨ’ ਨਾਲ ਇਕ ਨਿਰਦੇਸ਼ਕ ਵਜੋਂ ਸ਼ੁਰੂਆਤ ਕੀਤੀ ਅਤੇ ਇਕ ਸਾਲ ਬਾਅਦ ‘ਅਧਿਸਾਇਆ ਮਨੀਥਨ’ ਦਾ ਨਿਰਦੇਸ਼ਨ ਕੀਤਾ। ਭਾਵੇਂ ‘ਅਸੁਰਨ’ ਅਤੇ ‘ਰਾਜਾਲੀ’ ਵਰਗੀਆਂ ਫਿਲਮਾਂ ਬਾਕਸ ਆਫਿਸ ‘ਤੇ ਅਸਫ਼ਲ ਰਹੀਆਂ, ਪਰ ਉਨ੍ਹਾਂ ਨੇ 90 ਦੇ ਦਹਾਕੇ ਦੇ ਅਖੀਰ ਅਤੇ 2000 ਦੇ ਦਹਾਕੇ ਦੇ ਸ਼ੁਰੂ ਵਿੱਚ ਐਕਸ਼ਨ ਫਿਲਮਾਂ ਵੱਲ ਮੁੜ ਕੇ ਇਕ ਨਵੀਂ ਪਛਾਣ ਬਣਾਈ।
2004 ਵਿੱਚ, ਉਨ੍ਹਾਂ ਨੇ ‘ਕਢਲ ਅਰੰਗਮ’ ‘ਤੇ ਕੰਮ ਸ਼ੁਰੂ ਕੀਤਾ, ਜਿਸ ਵਿੱਚ ਪ੍ਰੀਤੀ ਰੰਗਯਾਨੀ ਅਤੇ ਸ਼ਰਲੀ ਦਾਸ ਨੇ ਸ਼ੁਰੂਆਤ ਕੀਤੀ ਸੀ। ਇਸ ਦੇ ਨਾਲ ਹੀ, 2017 ਵਿੱਚ, ਉਨ੍ਹਾਂ ਨੇ ਆਪਣੀ ਆਖਰੀ ਨਿਰਦੇਸ਼ਕ ਫਿਲਮ ‘ਓਰੂ ਇਯਾਕੁਨਾਰਿਨ ਕਢਲ ਡਾਇਰੀ’ ਬਣਾਈ, ਜਿਸਨੂੰ ਉਨ੍ਹਾਂ ਦੇ ਦਿਲ ਦੇ ਬਹੁਤ ਨੇੜੇ ਮੰਨਿਆ ਜਾਂਦਾ ਹੈ।
ਅਦਾਕਾਰੀ ਦੀ ਦੁਨੀਆ ਵਿੱਚ ਵੀ ਛੱਡੀ ਸੀ ਆਪਣੀ ਛਾਪ
2019 ਤੋਂ ਬਾਅਦ, ਵੇਲੂ ਪ੍ਰਭਾਕਰਨ ਨੇ ਵੀ ਅਦਾਕਾਰੀ ਵਿੱਚ ਆਪਣਾ ਹੱਥ ਅਜ਼ਮਾਇਆ। ਉਹ ‘ਗੈਂਗਸ ਆਫ ਮਦਰਾਸ’, ‘ਕੈਡੇਵਰ’, ‘ਪੀਜ਼ਾ 3: ਦ ਮਮੀ’, ‘ਰੇਡ’, ‘ਵੀਪਨ’ ਅਤੇ ‘ਅੱਪੂ ੜੀ ਸ਼ਠਧ’ ਵਰਗੀਆਂ ਫਿਲਮਾਂ ਵਿੱਚ ਨਜ਼ਰ ਆਏ ਸਨ। ਉਨ੍ਹਾਂ ਦੀ ਆਖਰੀ ਫਿਲਮ ‘ਗਜਨ’ ਸਾਲ 2025 ਵਿੱਚ ਰਿਲੀਜ਼ ਹੋਈ ਸੀ, ਜੋ ਉਨ੍ਹਾਂ ਦੇ ਕਰੀਅਰ ਦਾ ਆਖਰੀ ਸਿਨੇਮਾ ਪ੍ਰੋਜੈਕਟ ਸੀ।
ਮਸ਼ਹੂਰ ਦੱਖਣ ਫਿਲਮ ਨਿਰਮਾਤਾ ਦਾ ਨਿੱਜੀ ਜੀਵਨ
ਵੇਲੂ ਪ੍ਰਭਾਕਰਨ ਦਾ ਪਹਿਲਾਂ ਵਿਆਹ ਅਦਾਕਾਰਾ-ਨਿਰਦੇਸ਼ਕ ਜਯਾਦੇਵੀ ਨਾਲ ਹੋਇਆ ਸੀ, ਪਰ ਦੋਵੇਂ ਬਾਅਦ ਵਿੱਚ ਵੱਖ ਹੋ ਗਏ। ਕਈ ਸਾਲਾਂ ਬਾਅਦ, 60 ਸਾਲ ਦੀ ਉਮਰ ਵਿੱਚ, ਵੇਲੂ ਨੇ ਅਦਾਕਾਰਾ ਸ਼ਰਲੀ ਦਾਸ ਨਾਲ ਵਿਆਹ ਕੀਤਾ, ਜੋ ਉਨ੍ਹਾਂ ਦੀ 2009 ਵਿੱਚ ਰਿਲੀਜ਼ ਹੋਈ ਫਿਲਮ ‘ਕਧਲ ਕਠਾਈ’ ਦੀ ਅਦਾਕਾਰਾ ਸਨ। ਤਾਮਿਲ ਫਿਲਮ ਇੰਡਸਟਰੀ ਨੇ ਇਕ ਬਹੁਪੱਖੀ ਕਲਾਕਾਰ ਨੂੰ ਗੁਆ ਦਿੱਤਾ ਹੈ। ਨਿਰਦੇਸ਼ਨ, ਲੇਖਣ, ਸਿਨੇਮੈਟੋਗ੍ਰਾਫੀ ਅਤੇ ਅਦਾਕਾਰੀ ਵਿੱਚ ਵੇਲੂ ਪ੍ਰਭਾਕਰਨ ਦੇ ਯੋਗਦਾਨ ਨੂੰ ਹਮੇਸ਼ਾ ਯਾਦ ਰੱਖਿਆ ਜਾਵੇਗਾ।
