ਨਵੀਂ ਦਿੱਲੀ: ਭਾਰਤੀ ਹਾਕੀ ਟੀਮਾਂ ਆਗਾਮੀ ਏਸ਼ੀਅਨ ਖੇਡਾਂ ਵਿੱਚ ਇੱਕ ਵਾਰ ਫਿਰ ਆਪਣੀ ਰਵਾਇਤੀ ਨੀਲੀ ਜਰਸੀ ਵਿੱਚ ਨਜ਼ਰ ਆਉਣਗੀਆਂ। ਹਾਕੀ ਇੰਡੀਆ ਨੇ ਏਸ਼ੀਅਨ ਖੇਡਾਂ ਲਈ ਨੀਲੇ ਰੰਗ ਨੂੰ ਪਹਿਲੀ ਪਸੰਦ ਵਜੋਂ ਚੁਣਿਆ ਹੈ, ਜਦਕਿ ਸੰਤਰੀ ਰੰਗ ਨੂੰ ਦੂਜੀ ਪਸੰਦ ਰੱਖਿਆ ਗਿਆ ਹੈ। ਇਹ ਫੈਸਲਾ ਵਿਸ਼ਵ ਕੱਪ ਦੌਰਾਨ ਜਰਸੀ ਦੇ ਰੰਗ ਨੂੰ ਲੈ ਕੇ ਪੈਦਾ ਹੋਏ ਵਿਵਾਦ ਤੋਂ ਬਾਅਦ ਆਇਆ ਹੈ।
ਇਸ ਤੋਂ ਪਹਿਲਾਂ ਨੀਦਰਲੈਂਡ ਅਤੇ ਬੈਲਜੀਅਮ ਵਿੱਚ ਹੋਏ 2026 ਹਾਕੀ ਵਿਸ਼ਵ ਕੱਪ ਦੌਰਾਨ ਭਾਰਤੀ ਪੁਰਸ਼ ਅਤੇ ਮਹਿਲਾ ਟੀਮਾਂ ਦੀ ਮੁੱਖ ਜਰਸੀ ਦਾ ਰੰਗ ਸੰਤਰੀ ਕੀਤਾ ਗਿਆ ਸੀ। ਹਾਕੀ ਇੰਡੀਆ ਨੇ ਉਸ ਸਮੇਂ ਨੀਲੇ ਰੰਗ ਦੀ ਟਰਫ਼ ’ਤੇ ਖਿਡਾਰੀਆਂ ਦੀ ਦਿੱਖ ਨਾਲ ਜੁੜੀਆਂ ਤਕਨੀਕੀ ਚਿੰਤਾਵਾਂ ਦਾ ਹਵਾਲਾ ਦਿੰਦਿਆਂ ਇਹ ਬਦਲਾਅ ਕੀਤਾ ਸੀ।
ਹਾਲਾਂਕਿ, ਜਰਸੀ ਦਾ ਰੰਗ ਬਦਲਣ ਤੋਂ ਬਾਅਦ ਹਾਕੀ ਪ੍ਰਸ਼ੰਸਕਾਂ ਅਤੇ ਕਈ ਸਾਬਕਾ ਖਿਡਾਰੀਆਂ ਵੱਲੋਂ ਸਵਾਲ ਉਠਾਏ ਗਏ। ਰਵਾਇਤੀ ਨੀਲੀ ਜਰਸੀ ਨੂੰ ਭਾਰਤੀ ਹਾਕੀ ਦੀ ਪਛਾਣ ਨਾਲ ਜੋੜਿਆ ਜਾਂਦਾ ਹੈ। ਇਸ ਲਈ ਸੰਤਰੀ ਰੰਗ ਨੂੰ ਮੁੱਖ ਜਰਸੀ ਬਣਾਉਣ ਦੇ ਫੈਸਲੇ ਨੇ ਕਾਫ਼ੀ ਚਰਚਾ ਪੈਦਾ ਕੀਤੀ।
ਹੁਣ ਏਸ਼ੀਅਨ ਖੇਡਾਂ ਲਈ ਨੀਲੇ ਰੰਗ ਦੀ ਵਾਪਸੀ ਨਾਲ ਭਾਰਤੀ ਟੀਮ ਆਪਣੀ ਜਾਣ-ਪਛਾਣ ਵਾਲੀ ਵਰਦੀ ਵਿੱਚ ਮੈਦਾਨ ’ਤੇ ਉਤਰੇਗੀ। ਏਸ਼ੀਅਨ ਖੇਡਾਂ 19 ਸਤੰਬਰ ਤੋਂ 4 ਅਕਤੂਬਰ ਤੱਕ ਜਾਪਾਨ ਦੇ ਆਇਚੀ-ਨਾਗੋਆ ਵਿੱਚ ਹੋਣਗੀਆਂ। ਹਾਕੀ ਮੁਕਾਬਲੇ ਵਿੱਚ ਭਾਰਤੀ ਪੁਰਸ਼ ਟੀਮ ਆਪਣੇ ਖਿਤਾਬ ਦਾ ਬਚਾਅ ਕਰਨ ਲਈ ਉਤਰੇਗੀ, ਜਦਕਿ ਮਹਿਲਾ ਟੀਮ ਵੀ ਸੋਨ ਤਮਗੇ ਲਈ ਮਜ਼ਬੂਤ ਦਾਅਵੇਦਾਰੀ ਪੇਸ਼ ਕਰੇਗੀ।
