ਨਵੀਂ ਦਿੱਲੀ: 12 ਅਗਸਤ 2026 ਦਾ ਦਿਨ ਖਗੋਲ ਵਿਗਿਆਨ ਵਿੱਚ ਦਿਲਚਸਪੀ ਰੱਖਣ ਵਾਲੇ ਲੋਕਾਂ ਲਈ ਬੇਹੱਦ ਖਾਸ ਹੋਣ ਵਾਲਾ ਹੈ। ਇਸ ਦਿਨ ਦੁਨੀਆ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਇੱਕੋ ਸਮੇਂ ਕਈ ਦੁਰਲੱਭ ਖਗੋਲੀ ਘਟਨਾਵਾਂ ਦੇਖਣ ਨੂੰ ਮਿਲਣਗੀਆਂ। ਸਭ ਤੋਂ ਵੱਡੀ ਘਟਨਾ ਪੂਰਨ ਸੂਰਜ ਗ੍ਰਹਿਣ ਹੋਵੇਗੀ, ਜਿਸ ਦੌਰਾਨ ਕੁਝ ਇਲਾਕਿਆਂ ਵਿੱਚ ਦਿਨ ਦੇ ਸਮੇਂ ਹੀ ਹਨੇਰਾ ਛਾ ਜਾਵੇਗਾ।
ਇਸ ਦਿਨ ਸਵੇਰੇ ਆਕਾਸ਼ ਵਿੱਚ ਇੱਕ ਹੋਰ ਦਿਲਚਸਪ ਨਜ਼ਾਰਾ ਦੇਖਣ ਨੂੰ ਮਿਲ ਸਕਦਾ ਹੈ। ਬੁੱਧ, ਮੰਗਲ, ਬ੍ਰਹਿਸਪਤੀ, ਸ਼ਨੀ, ਯੂਰੇਨਸ ਅਤੇ ਨੇਪਚਿਊਨ ਸਮੇਤ ਛੇ ਗ੍ਰਹਿ ਇੱਕ ਲਾਈਨ ਜਾਂ ਕਤਾਰ ਵਿੱਚ ਨਜ਼ਰ ਆਉਣਗੇ। ਇਸ ਤਰ੍ਹਾਂ ਦੀ ਗ੍ਰਹਿ ਸਥਿਤੀ ਖਗੋਲ ਪ੍ਰੇਮੀਆਂ ਲਈ ਖਾਸ ਦਿਲਚਸਪੀ ਦਾ ਕੇਂਦਰ ਬਣੇਗੀ।
ਦਿਨ ਦੇ ਸਮੇਂ ਪੂਰਨ ਸੂਰਜ ਗ੍ਰਹਿਣ ਲੱਗੇਗਾ। ਪੂਰਨ ਸੂਰਜ ਗ੍ਰਹਿਣ ਉਸ ਸਮੇਂ ਹੁੰਦਾ ਹੈ ਜਦੋਂ ਚੰਦਰਮਾ ਸੂਰਜ ਅਤੇ ਧਰਤੀ ਦੇ ਵਿਚਕਾਰ ਆ ਜਾਂਦਾ ਹੈ ਅਤੇ ਕੁਝ ਸਮੇਂ ਲਈ ਸੂਰਜ ਦਾ ਪੂਰਾ ਚੱਕਰ ਢੱਕ ਲੈਂਦਾ ਹੈ। ਇਸ ਕਾਰਨ ਜਿੱਥੇ ਪੂਰਨ ਗ੍ਰਹਿਣ ਦਿਖਾਈ ਦਿੰਦਾ ਹੈ, ਉੱਥੇ ਦਿਨ ਦੇ ਸਮੇਂ ਹਨੇਰਾ ਜਿਹਾ ਮਾਹੌਲ ਬਣ ਸਕਦਾ ਹੈ।
ਹਾਲਾਂਕਿ ਇਸ ਖਗੋਲੀ ਘਟਨਾ ਨੂੰ ਲੈ ਕੇ ਭਾਰਤ ਵਿੱਚ ਰਹਿਣ ਵਾਲੇ ਲੋਕਾਂ ਲਈ ਸਭ ਤੋਂ ਵੱਡਾ ਸਵਾਲ ਇਹ ਹੈ ਕਿ ਕੀ ਇਹ ਸੂਰਜ ਗ੍ਰਹਿਣ ਭਾਰਤ ਤੋਂ ਦਿਖਾਈ ਦੇਵੇਗਾ ਜਾਂ ਨਹੀਂ। ਗ੍ਰਹਿਣ ਦੀ ਦਿੱਖ ਉਸ ਦੇ ਮਾਰਗ ਅਤੇ ਸਥਾਨਕ ਸਮੇਂ ’ਤੇ ਨਿਰਭਰ ਕਰਦੀ ਹੈ। ਇਸ ਲਈ ਭਾਰਤ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਇਸ ਦੀ ਦਿੱਖ ਇੱਕੋ ਜਿਹੀ ਨਹੀਂ ਹੋਵੇਗੀ ਅਤੇ ਕੁਝ ਥਾਵਾਂ ਤੋਂ ਇਹ ਦਿਖਾਈ ਨਾ ਦੇਣ ਦੀ ਸੰਭਾਵਨਾ ਰਹਿੰਦੀ ਹੈ।
ਇਸੇ ਦਿਨ ਰਾਤ ਦੇ ਸਮੇਂ ਪਰਸਿਡ ਉਲਕਾ ਵਰਖਾ ਵੀ ਆਪਣੇ ਸਿਖਰ ’ਤੇ ਹੋਵੇਗੀ। ਪਰਸਿਡ ਮੀਟੀਅਰ ਸ਼ਾਵਰ ਹਰ ਸਾਲ ਹੋਣ ਵਾਲੀਆਂ ਪ੍ਰਮੁੱਖ ਉਲਕਾ ਵਰਖਾਵਾਂ ਵਿੱਚੋਂ ਇੱਕ ਹੈ। ਇਸ ਦੌਰਾਨ ਆਕਾਸ਼ ਵਿੱਚ ਤੇਜ਼ੀ ਨਾਲ ਚਮਕਦੀਆਂ ਉਲਕਾਵਾਂ ਦੀਆਂ ਲਕੀਰਾਂ ਦੇਖੀਆਂ ਜਾ ਸਕਦੀਆਂ ਹਨ।।
