ਟੋਕੀਓ: ਜਾਪਾਨ ਦੇ ਮੱਧ ਹਿੱਸੇ ‘ਚ ਅੱਜ ਤੜਕੇ ਭੂਚਾਲ ਦੇ ਤੇਜ਼ ਝਟਕੇ ਮਹਿਸੂਸ ਕੀਤੇ ਗਏ ਅਤੇ ਘੱਟੋ-ਘੱਟ 22 ਲੋਕ ਜ਼ਖਮੀ ਹੋ ਗਏ। ਸਥਾਨਕ ਮੀਡੀਆ ਨੇ ਇਹ ਜਾਣਕਾਰੀ ਦਿੱਤੀ। ਭੂਚਾਲ ਕਾਰਨ ਦੁਕਾਨਾਂ ਦੇ ਸ਼ੀਸ਼ੇ ਟੁੱਟ ਗਏ ਅਤੇ ਲੋਕ ਇਮਾਰਤਾਂ ਤੋਂ ਬਾਹਰ ਆ ਗਏ।
ਜਾਪਾਨ ਦੀ ਮੌਸਮ ਵਿਗਿਆਨ ਏਜੰਸੀ ਨੇ ਭੂਚਾਲ ਦੀ ਤੀਬਰਤਾ 5.7 ਦੱਸੀ ਹੈ, ਜਦੋਂ ਕਿ ਅਮਰੀਕੀ ਭੂ-ਵਿਗਿਆਨ ਸਰਵੇਖਣ ਨੇ ਇਸ ਦੀ ਤੀਬਰਤਾ 5.5 ਦੱਸੀ ਹੈ। ਭੂਚਾਲ ਤੋਂ ਬਾਅਦ ਘੱਟ ਤੀਬਰਤਾ ਦੇ ਕਈ ਹੋਰ ਝਟਕੇ ਵੀ ਮਹਿਸੂਸ ਕੀਤੇ ਗਏ। ਭੂਚਾਲ ਦੇ ਝਟਕੇ ਏਚੀ ਪ੍ਰੀਫੈਕਚਰ ਦੇ ਆਲੇ ਦੁਆਲੇ ਦੇ ਇੱਕ ਵੱਡੇ ਖੇਤਰ ਵਿੱਚ ਮਹਿਸੂਸ ਕੀਤੇ ਗਏ, ਜਿਸ ਵਿੱਚ ਹਮਾਮਾਤਸੂ ਸ਼ਹਿਰ, ਜਾਪਾਨ ਦੀਆਂ ਪ੍ਰਾਚੀਨ ਰਾਜਧਾਨੀਆਂ ਕਿਓਟੋ ਅਤੇ ਨਾਰਾ ਅਤੇ ਨੇੜਲੇ ਯਾਮਾਨਸ਼ੀ ਅਤੇ ਗਿਫੂ ਪ੍ਰੀਫੈਕਚਰ ਸ਼ਾਮਲ ਹਨ। ਜਾਪਾਨ ਦਾ ਮਸ਼ਹੂਰ ਮਾਊਂਟ ਫੂਜੀ ਯਾਮਾਨਸ਼ੀ ਸੂਬੇ ਵਿੱਚ ਸਥਿਤ ਹੈ।
ਜਾਪਾਨੀ ਟੈਲੀਵਿਜ਼ਨ ਚੈਨਲਾਂ ‘ਤੇ ਪ੍ਰਸਾਰਿਤ ਫੁਟੇਜ ਵਿਚ ਦੁਕਾਨਾਂ ਦੀਆਂ ਟੁੱਟੀਆਂ ਖਿੜਕੀਆਂ ਅਤੇ ਸ਼ੀਸ਼ੇ ਦੇ ਟੁਕੜੇ ਸੜਕਾਂ ‘ਤੇ ਖਿੱਲਰੇ ਦਿਖਾਈ ਦਿੱਤੇ। ਭੂਚਾਲ ਕਾਰਨ ਇਮਾਰਤਾਂ ਤੋਂ ਬਾਹਰ ਨਿਕਲਣ ਦੀ ਕੋਸ਼ਿਸ਼ ਦੌਰਾਨ ਪੌੜੀਆਂ ਤੋਂ ਹੇਠਾਂ ਡਿੱਗਣ ਵਾਲੇ ਲੋਕਾਂ ਸਮੇਤ 22 ਲੋਕ ਜ਼ਖਮੀ ਹੋ ਗਏ। ਸਥਾਨਕ ਸਮੇਂ ਅਨੁਸਾਰ ਸਵੇਰੇ 1:04 ਵਜੇ ਆਏ ਇਸ ਭੂਚਾਲ ਦਾ ਕੇਂਦਰ ਸ਼ਿਜ਼ੂਓਕਾ ਪ੍ਰੀਫੈਕਚਰ ਵਿੱਚ ਜ਼ਮੀਨ ਤੋਂ ਕਰੀਬ 40 ਕਿਲੋਮੀਟਰ ਹੇਠਾਂ ਸੀ। ਆਈਚੀ ਅਤੇ ਸ਼ਿਜ਼ੂਓਕਾ ਗੁਆਂਢੀ ਸੂਬੇ ਹਨ।
ਅਧਿਕਾਰਤ ਅਨੁਮਾਨਾਂ ਮੁਤਾਬਕ ਸਭ ਤੋਂ ਤੇਜ਼ ਭੂਚਾਲ ਦੇ ਝਟਕੇ ਏਚੀ ‘ਚ ਮਹਿਸੂਸ ਕੀਤੇ ਗਏ। ਭੂਚਾਲ ਕਾਰਨ ਰੇਲ ਪਟੜੀਆਂ ਨੂੰ ਨੁਕਸਾਨ ਪੁੱਜਣ ਦੀ ਸੰਭਾਵਨਾ ਦੇ ਮੱਦੇਨਜ਼ਰ ਅਹਿਿਤਆਤ ਦੇ ਤੌਰ ‘ਤੇ ਪ੍ਰਭਾਵਿਤ ਇਲਾਕਿਆਂ ‘ਚ ਸ਼ਿੰਕਾਨਸੇਨ ਬੁਲੇਟ ਟਰੇਨਾਂ ਨੂੰ ਧੀਮੀ ਰਫਤਾਰ ਨਾਲ ਚਲਾਇਆ ਜਾ ਰਿਹਾ ਹੈ। ਜਾਪਾਨ ਭੂਚਾਲ ਵਾਲੇ ਖੇਤਰ ਵਿੱਚ ਸਥਿਤ ਹੈ।
