Sports News : ਫੁੱਟਬਾਲ ਦੀ ਦੁਨੀਆ ਤੋਂ ਇਕ ਬਹੁਤ ਹੀ ਦੁਖਦਾਈ ਖ਼ਬਰ ਸਾਹਮਣੇ ਆਈ ਹੈ। ਇੰਗਲਿਸ਼ ਕਲੱਬ ਲਿਵਰਪੂਲ ਅਤੇ ਪੁਰਤਗਾਲ ਦੀ ਰਾਸ਼ਟਰੀ ਟੀਮ ਲਈ ਖੇਡਣ ਵਾਲੇ ਸਟਾਰ ਫਾਰਵਰਡ ਡਿਏਗੋ ਜੋਟਾ ਦੀ ਬੀਤੇ ਦਿਨ ਇਕ ਭਿਆਨਕ ਸੜਕ ਹਾਦਸੇ ਵਿੱਚ ਮੌਤ ਹੋ ਗਈ। ਇਸ ਹਾਦਸੇ ਵਿੱਚ ਉਨ੍ਹਾਂ ਦੇ ਛੋਟੇ ਭਰਾ ਆਂਦਰੇ ਜੋਟਾ ਦੀ ਵੀ ਮੌਤ ਹੋ ਗਈ। ਖਾਸ ਗੱਲ ਇਹ ਹੈ ਕਿ ਡਿਏਗੋ ਜੋਟਾ ਦਾ ਵਿਆਹ ਸਿਰਫ਼ 10 ਦਿਨ ਪਹਿਲਾਂ ਹੋਇਆ ਸੀ। ਉਨ੍ਹਾਂ ਨੇ 22 ਜੂਨ ਨੂੰ ਆਪਣੀ ਮੰਗੇਤਰ ਰੂਥ ਕਾਰਡੋਸੋ ਨਾਲ ਵਿਆਹ ਕੀਤਾ ਸੀ।
ਸਪੇਨ ਵਿੱਚ ਵਾਪਰਿਆ ਭਿਆਨਕ ਹਾਦਸਾ , ਕਾਰ ਨੂੰ ਲੱਗੀ ਅੱਗ ਇਕ
ਇਹ ਦੁਖਦਾਈ ਹਾਦਸਾ ਸਪੇਨ ਦੇ ਜ਼ਮੋਰਾ ਸ਼ਹਿਰ ਵਿੱਚ ਵਾਪਰਿਆ, ਜਿੱਥੇ ਡਿਏਗੋ ਅਤੇ ਉਨ੍ਹਾਂ ਦੇ ਭਰਾ ਆਂਦਰੇ ਲੈਂਬੋਰਗਿਨੀ ਕਾਰ ਵਿੱਚ ਯਾਤਰਾ ਕਰ ਰਹੇ ਸਨ। ਸਥਾਨਕ ਸਮੇਂ ਅਨੁਸਾਰ ਦੁਪਹਿਰ 12:40 ਵਜੇ ਓਵਰਟੇਕ ਕਰਦੇ ਸਮੇਂ ਕਾਰ ਸੰਤੁਲਨ ਗੁਆ ਬੈਠੀ ਅਤੇ ਟਾਇਰ ਫਟ ਗਿਆ, ਜਿਸ ਕਾਰਨ ਕਾਰ ਵਿੱਚ ਭਾਰੀ ਅੱਗ ਲੱਗ ਗਈ। ਅੱਗ ਇੰਨੀ ਭਿਆਨਕ ਸੀ ਕਿ ਦੋਵੇਂ ਭਰਾਵਾਂ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਡਿਏਗੋ ਜੋਟਾ ਦੇ ਭਰਾ ਆਂਦਰੇ ਵੀ ਇਕ ਪੇਸ਼ੇਵਰ ਫੁੱਟਬਾਲਰ ਸਨ ਅਤੇ ਪੁਰਤਗਾਲ ਦੀ ਦੂਜੀ ਲੀਗ ਟੀਮ ਪੇਨਾਫਿਲ ਦੀ ਨੁਮਾਇੰਦਗੀ ਕਰਦੇ ਸਨ। ਹਾਦਸੇ ਸਮੇਂ ਦੋਵੇਂ ਭਰਾ ਇਕੱਠੇ ਯਾਤਰਾ ਕਰ ਰਹੇ ਸਨ।
ਪੁਰਤਗਾਲ ਫੁੱਟਬਾਲ ਫੈਡਰੇਸ਼ਨ ਨੇ ਕੀਤੀ ਪੁਸ਼ਟੀ
ਪੁਰਤਗਾਲ ਫੁੱਟਬਾਲ ਫੈਡਰੇਸ਼ਨ ਨੇ ਅਧਿਕਾਰਤ ਤੌਰ ‘ਤੇ ਹਾਦਸੇ ਦੀ ਪੁਸ਼ਟੀ ਕੀਤੀ ਹੈ। ਫੈਡਰੇਸ਼ਨ ਦੇ ਪ੍ਰਧਾਨ ਪੇਡਰੋ ਪ੍ਰੋਏਂਕਾ ਨੇ ਇਕ ਭਾਵੁਕ ਬਿਆਨ ਵਿੱਚ ਕਿਹਾ, “ਪੁਰਤਗਾਲੀ ਫੁੱਟਬਾਲ ਫੈਡਰੇਸ਼ਨ ਅਤੇ ਦੇਸ਼ ਭਰ ਦੇ ਫੁੱਟਬਾਲ ਪ੍ਰੇਮੀ ਅੱਜ ਇਸ ਖ਼ਬਰ ਤੋਂ ਹੈਰਾਨ ਹਨ। ਡਿਏਗੋ ਜੋਟਾ ਨਾ ਸਿਰਫ਼ ਇਕ ਮਹਾਨ ਖਿਡਾਰੀ ਸਨ, ਸਗੋਂ ਇਕ ਮਹਾਨ ਇਨਸਾਨ ਵੀ ਸਨ। ਉਨ੍ਹਾਂ ਨੇ ਰਾਸ਼ਟਰੀ ਟੀਮ ਲਈ ਲਗਭਗ 50 ਮੈਚ ਖੇਡੇ ਅਤੇ ਮੈਦਾਨ ‘ਤੇ ਹਮੇਸ਼ਾ ਸਕਾਰਾਤਮਕ ਊਰਜਾ ਨਾਲ ਦੇਖੇ ਜਾਂਦੇ ਸਨ।”
ਫੁੱਟਬਾਲ ਜਗਤ ਵਿੱਚ ਸੋਗ ਦੀ ਲਹਿਰ
ਡੀਏਗੋ ਜੋਟਾ ਦੀ ਮੌਤ ਨੇ ਲਿਵਰਪੂਲ ਐਫ.ਸੀ, ਉਨ੍ਹਾਂ ਦੇ ਪ੍ਰਸ਼ੰਸਕਾਂ, ਸਾਥੀ ਖਿਡਾਰੀਆਂ ਅਤੇ ਪੂਰੀ ਫੁੱਟਬਾਲ ਦੁਨੀਆ ਨੂੰ ਡੂੰਘਾ ਦੁੱਖ ਪਹੁੰਚਾਇਆ ਹੈ। ਸੋਸ਼ਲ ਮੀਡੀਆ ‘ਤੇ, ਫੁੱਟਬਾਲ ਖਿਡਾਰੀਆਂ, ਕਲੱਬਾਂ ਅਤੇ ਪ੍ਰਸ਼ੰਸਕਾਂ ਨੇ ਇਸ ਨੁਕਸਾਨ ‘ਤੇ ਡੂੰਘੀ ਸੰਵੇਦਨਾ ਪ੍ਰਗਟ ਕੀਤੀ ਹੈ।
