ਹਰਿਆਣਾ : ਹਰਿਆਣਾ ਦੇ ਹਿਸਾਰ ਹਵਾਈ ਅੱਡੇ ਨੂੰ ਦੇਸ਼ ਦੇ ਹਵਾਈ ਨੈੱਟਵਰਕ ਵਿੱਚ ਹੋਰ ਮਜਬੂਤ ਬਣਾਉਣ ਦੀ ਤਿਆਰੀ ਚੱਲ ਰਹੀ ਹੈ। ਇਸ ਸਾਲ 26 ਅਕਤੂਬਰ 2025 ਤੋਂ 28 ਮਾਰਚ 2026 ਤੱਕ ਚੱਲਣ ਵਾਲੇ ਸਰਦੀ ਦੇ ਮੌਸਮ ਵਿੱਚ ਹਿਸਾਰ ਵਿੱਚ ਉਡਾਨਾਂ ਦੀ ਗਿਣਤੀ ਪਿਛਲੇ ਸਾਲ ਦੀ ਤੁਲਨਾ ਵਿੱਚ ਲਗਭਗ 6% ਵਧਾਈ ਜਾਵੇਗੀ। ਹਾਲਾਂਕਿ ਨਵਾਂ ਫਲਾਈਟ ਸਮੇਂ-ਸਾਰਣੀ 26 ਨਵੰਬਰ ਤੋਂ ਲਾਗੂ ਹੋਵੇਗਾ।
ਨਵੇਂ ਸ਼ਡਿਊਲ ਦੇ ਲਾਗੂ ਹੋਣ ਨਾਲ ਹਿਸਾਰ ਹਵਾਈ ਅੱਡੇ ਦੀ ਕਨੈਕਟੀਵਿਟੀ ਵਧੇਗੀ। ਇਸ ਨਾਲ ਯਾਤਰੀਆਂ ਨੂੰ ਦੂਜੇ ਸ਼ਹਿਰਾਂ ਲਈ ਸਿੱਧੀਆਂ ਉਡਾਣਾਂ ਮਿਲਣਗੀਆਂ ਅਤੇ ਏਅਰਲਾਈਨਾਂ ਨੂੰ ਨਵੇਂ ਰੂਟਾਂ ‘ਤੇ ਕੰਮ ਕਰਨ ਦਾ ਮੌਕਾ ਮਿਲੇਗਾ। ਇਸ ਨਾਲ ਦਿੱਲੀ-ਐਨ.ਸੀ.ਆਰ. ਅਤੇ ਮੁੰਬਈ ਵਰਗੇ ਸ਼ਹਿਰਾਂ ਨੂੰ ਗਲੋਬਲ ਏਵੀਏਸ਼ਨ ਹੱਬ ਬਣਨ ਵਿੱਚ ਮਦਦ ਮਿਲੇਗੀ। ਮਹਾਰਾਜਾ ਅਗਰਸੇਨ ਏਅਰਪੋਰਟ ਵਿੱਚ ਨਵਾਂ ਵਿੰਟਰ ਸ਼ਡਿਊਲ 26 ਨਵੰਬਰ ਤੋਂ ਲਾਗੂ ਹੋਵੇਗਾ। ਇਸ ਦੇ ਤਹਿਤ ਹਿਸਾਰ-ਜੈਪੁਰ, ਹਿਸਾਰ-ਅਯੁੱਧਿਆ ਅਤੇ ਹਿਸਾਰ-ਦਿੱਲੀ ਫਲਾਈਟ ਹੁਣ ਹਫ਼ਤੇ ਵਿੱਚ ਦੋ ਵਾਰ ਚੱਲਣਗੀਆਂ। ਉੱਥੇ ਹੀ ਹਿਸਾਰ-ਚੰਡੀਗੜ੍ਹ ਫਲਾਈਟ ਹਫ਼ਤੇ ਵਿੱਚ ਤਿੰਨ ਦਿਨ ਉਡਾਣ ਭਰੇਗੀ।
ਪਹਿਲਾਂ ਹਿਸਾਰ-ਅਯੋਧਿਆ, ਹਿਸਾਰ-ਦਿੱਲੀ ਅਤੇ ਹਿਸਾਰ-ਜੈਪੁਰ ਫਲਾਈਟਾਂ ਸਿਰਫ਼ ਹਫ਼ਤੇ ਵਿੱਚ ਇੱਕ ਦਿਨ ਹੀ ਉਡਾਣ ਭਰਦੀਆਂ ਸਨ। ਚੰਡੀਗੜ੍ਹ ਫਲਾਈਟ ਹਫ਼ਤੇ ਵਿੱਚ ਦੋ ਦਿਨ ਯਾਨੀ ਬੁੱਧਵਾਰ ਅਤੇ ਸ਼ਨੀਵਾਰ ਨੂੰ ਉਡਾਣ ਭਰਦੀ ਸੀ। ਫਿਲਹਾਲ ਹਿਸਾਰ ਤੋਂ ਜੰਮੂ ਅਤੇ ਅਹਿਮਦਾਬਾਦ ਲਈ ਨਵੀਆਂ ਫਲਾਈਟਾਂ ਸ਼ੁਰੂ ਕਰਨ ਦੀ ਕੋਈ ਯੋਜਨਾ ਨਹੀਂ ਬਣਾਈ ਗਈ ਹੈ।
ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਦੇ ਮੁਤਾਬਕ, ਨਵਾਂ ਸ਼ਡਿਊਲ ਏਅਰਲਾਈਨਜ਼ ਦੇ ਖੇਤਰੀ ਕੁਨੈਕਟੀਵਿਟੀ ਵਿਸਤਾਰ ਅਤੇ ਟਾਇਰ-2 ਤੇ ਟਾਇਰ-3 ਸ਼ਹਿਰਾਂ ਵਿੱਚ ਬਿਹਤਰ ਕੁਨੈਕਟੀਵਿਟੀ ‘ਤੇ ਕੇਂਦਰਿਤ ਹੈ। ਹਿਸਾਰ, ਅਮਰਾਵਤੀ, ਪੂਰਨੀਆ ਅਤੇ ਰੂਪਸੀ ਦੇ ਜੁੜਨ ਨਾਲ ਸਥਾਨਕ ਅਤੇ ਖੇਤਰੀ ਆਰਥਿਕ ਗਤੀਵਿਧੀਆਂ ਵਿੱਚ ਵਾਧਾ ਹੋਣ ਦੀ ਉਮੀਦ ਹੈ।
ਦੇਸ਼ ਭਰ ਦੇ 126 ਹਵਾਈ ਅੱਡਿਆਂ ਤੋਂ ਕੁੱਲ 26,495 ਹਫਤਾਵਾਰੀ ਉਡਾਣਾਂ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ। 2025 ਦੇ ਗਰਮੀਆਂ ਦੇ ਸ਼ਡਿਊਲ ਵਿੱਚ, 129 ਹਵਾਈ ਅੱਡਿਆਂ ਤੋਂ 25,610 ਉਡਾਣਾਂ ਚਲਾਈਆਂ ਗਈਆਂ। ਹਿਸਾਰ ਅਤੇ ਅਮਰਾਵਤੀ ਵਰਗੇ ਨਵੇਂ ਹਵਾਈ ਅੱਡੇ ਖੇਤਰੀ ਸੰਪਰਕ ਦੇ ਵਿਸਥਾਰ ਨੂੰ ਦਰਸਾਉਂਦੇ ਹਨ। ਸਰਦੀਆਂ ਦੇ ਮੌਸਮ ਦੌਰਾਨ ਅਲੀਗੜ੍ਹ, ਮੁਰਾਦਾਬਾਦ, ਚਿੱਤਰਕੂਟ, ਭਾਵਨਗਰ, ਲੁਧਿਆਣਾ, ਪਾਕਯੋਂਗ ਅਤੇ ਸ਼ਰਾਵਸਤੀ ਹਵਾਈ ਅੱਡਿਆਂ ‘ਤੇ ਉਡਾਣ ਸੰਚਾਲਨ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ।
