ਨਵੀਂ ਦਿੱਲੀ : ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਮੌਨਸੂਨ ਸਰਗਰਮ ਹੈ ਅਤੇ ਭਾਰੀ ਮੀਂਹ ਪੈ ਰਿਹਾ ਹੈ। ਹਾਲਾਂਕਿ, ਦਿੱਲੀ-ਐਨ.ਸੀ.ਆਰ ਦੇ ਲੋਕ ਅਜੇ ਵੀ ਨਮੀ ਅਤੇ ਗਰਮੀ ਤੋਂ ਪਰੇਸ਼ਾਨ ਹਨ। ਮੌਸਮ ਵਿਭਾਗ (ਆਈ.ਐਮ.ਡੀ) ਨੇ ਕਿਹਾ ਹੈ ਕਿ ਆਉਣ ਵਾਲੇ ਦਿਨਾਂ ਵਿੱਚ ਕਈ ਰਾਜਾਂ ਵਿੱਚ ਮੀਂਹ ਜਾਰੀ ਰਹੇਗਾ।
ਦਿੱਲੀ-ਐਨ.ਸੀ.ਆਰ ਵਿੱਚ ਅੱਜ ਪੈ ਸਕਦਾ ਹੈ ਰਾਹਤ ਭਰਿਆ ਮੀਂਹ
ਰਾਜਧਾਨੀ ਦਿੱਲੀ ਦੇ ਕੁਝ ਇਲਾਕਿਆਂ ਵਿੱਚ ਅੱਜ ਹਲਕਾ ਮੀਂਹ ਪੈਣ ਦੀ ਉਮੀਦ ਹੈ, ਜਿਸ ਨਾਲ ਨਮੀ ਵਾਲੀ ਗਰਮੀ ਤੋਂ ਰਾਹਤ ਮਿਲ ਸਕਦੀ ਹੈ। ਮੌਸਮ ਵਿਭਾਗ ਦੇ ਅਨੁਸਾਰ, ਵੱਧ ਤੋਂ ਵੱਧ ਤਾਪਮਾਨ 35 ਡਿਗਰੀ ਸੈਲਸੀਅਸ ਦੇ ਆਸ-ਪਾਸ ਅਤੇ ਘੱਟੋ-ਘੱਟ ਤਾਪਮਾਨ 27 ਡਿਗਰੀ ਸੈਲਸੀਅਸ ਦੇ ਆਸ-ਪਾਸ ਰਹੇਗਾ। ਲਕਸ਼ਮੀ ਨਗਰ, ਰੋਹਿਣੀ, ਮਦਰ ਡੇਅਰੀ, ਨਰੇਲਾ, ਪੀਤਮਪੁਰਾ, ਮੁੰਡਕਾ, ਪੱਛਮੀ ਵਿਹਾਰ ਅਤੇ ਪੰਜਾਬੀ ਬਾਗ ਵਰਗੇ ਖੇਤਰਾਂ ਵਿੱਚ ਹਲਕਾ ਮੀਂਹ ਪੈਣ ਦੀ ਉਮੀਦ ਹੈ।
ਯੂ.ਪੀ ਦੇ ਕਈ ਜ਼ਿਲ੍ਹਿਆਂ ਵਿੱਚ ਭਾਰੀ ਮੀਂਹ
ਅੱਜ ਯੂਪੀ ਦੇ ਕਈ ਜ਼ਿਲ੍ਹਿਆਂ ਵਿੱਚ ਭਾਰੀ ਮੀਂਹ ਦੀ ਚੇਤਾਵਨੀ ਜਾਰੀ ਕੀਤੀ ਗਈ ਹੈ। ਕਨੌਜ, ਹਰਦੋਈ, ਕਾਨਪੁਰ ਦੇਹਤ, ਸੀਤਾਪੁਰ, ਲਖੀਮਪੁਰ-ਖੇੜੀ, ਝਾਂਸੀ, ਜਾਲੌਨ, ਹਮੀਰਪੁਰ, ਸਿਧਾਰਥਨਗਰ, ਸਹਾਰਨਪੁਰ, ਬਿਜਨੌਰ, ਮੇਰਠ, ਮੁਜ਼ੱਫਰਨਗਰ, ਬੁਲੰਦਸ਼ਹਿਰ, ਸੰਭਲ, ਬਰੇਲੀ, ਪੀਲੀਭੀਤ, ਹਾਪੁੜ, ਮੇਹਰਪੁਰ, ਮੇਰਠ ਜ਼ਿਲੇ ‘ਚ ਭਾਰੀ ਮੀਂਹ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ।
ਰਾਜਸਥਾਨ ਦੇ ਸ਼ਹਿਰਾਂ ਵਿੱਚ ਭਾਰੀ ਮੀਂਹ ਦਾ ਅਲਰਟ
ਰਾਜਸਥਾਨ ਵਿੱਚ ਵੀ ਮੀਂਹ ਜਾਰੀ ਹੈ। ਮੌਸਮ ਵਿਭਾਗ ਨੇ ਜੈਪੁਰ, ਸਿਰੋਹੀ, ਜਲੋਰ, ਰਾਜਸਮੰਦ, ਅਜਮੇਰ, ਸ਼੍ਰੀਗੰਗਾਨਗਰ, ਝੁੰਝੁਨੂ, ਪਾਲੀ, ਨਾਗੌਰ, ਬੀਕਾਨੇਰ, ਜੋਧਪੁਰ, ਚੁਰੂ, ਸੀਕਰ ਅਤੇ ਭੀਲਵਾੜਾ ਵਿੱਚ ਭਾਰੀ ਮੀਂਹ ਦੀ ਚੇਤਾਵਨੀ ਜਾਰੀ ਕੀਤੀ ਹੈ।
ਹਿਮਾਲੀਅਨ ਖੇਤਰਾਂ ਵਿੱਚ ਵੀ ਭਾਰੀ ਮੀਂਹ ਪੈਣ ਦੀ ਸੰਭਾਵਨਾ
ਮੌਸਮ ਵਿਭਾਗ ਅਨੁਸਾਰ, 29 ਤੋਂ 31 ਜੁਲਾਈ ਦੇ ਵਿਚਕਾਰ ਉੱਤਰਾਖੰਡ, ਹਿਮਾਚਲ ਪ੍ਰਦੇਸ਼ ਅਤੇ ਜੰਮੂ-ਕਸ਼ਮੀਰ ਦੇ ਪਹਾੜੀ ਇਲਾਕਿਆਂ ਵਿੱਚ ਭਾਰੀ ਤੋਂ ਬਹੁਤ ਭਾਰੀ ਮੀਂਹ ਪੈ ਸਕਦਾ ਹੈ। ਇਸ ਦੇ ਨਾਲ ਹੀ, ਹਰਿਆਣਾ, ਚੰਡੀਗੜ੍ਹ ਅਤੇ ਉੱਤਰ ਪ੍ਰਦੇਸ਼ ਦੇ ਕੁਝ ਹਿੱਸਿਆਂ ਵਿੱਚ 2 ਅਗਸਤ ਤੱਕ ਰੁਕ-ਰੁਕ ਕੇ ਮੀਂਹ ਪੈਂਦਾ ਰਹੇਗਾ।
ਓਡੀਸ਼ਾ ਵਿੱਚ ਹੜ੍ਹਾਂ ਨੇ ਸਥਿਤੀ ਵਿਗੜੀ, 11 ਹਜ਼ਾਰ ਲੋਕ ਪ੍ਰਭਾਵਿਤ
ਓਡੀਸ਼ਾ ਦੇ ਛੇ ਜ਼ਿਲ੍ਹਿਆਂ ਵਿੱਚ ਹੜ੍ਹਾਂ ਨੇ ਸਥਿਤੀ ਹੋਰ ਵਿਗੜ ਦਿੱਤੀ ਹੈ। ਮਯੂਰਭੰਜ, ਬਾਲਾਸੋਰ, ਭਦਰਕ, ਜਾਜਪੁਰ, ਸੁੰਦਰਗੜ੍ਹ ਅਤੇ ਕਿਓਂਝਰ ਜ਼ਿਲ੍ਹਿਆਂ ਵਿੱਚ 11,000 ਤੋਂ ਵੱਧ ਲੋਕ ਪ੍ਰਭਾਵਿਤ ਹੋਏ ਹਨ। ਹੁਣ ਤੱਕ 1,000 ਤੋਂ ਵੱਧ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਪਹੁੰਚਾਇਆ ਗਿਆ ਹੈ। ਭਾਰੀ ਮੀਂਹ ਕਾਰਨ ਸੁਬਰਨਰੇਖਾ, ਵੈਤਰਨੀ ਅਤੇ ਜਲਕਾ ਨਦੀਆਂ ਵਿੱਚ ਪਾਣੀ ਦਾ ਪੱਧਰ ਵਧ ਗਿਆ ਹੈ, ਜਿਸ ਨਾਲ ਹੜ੍ਹ ਦੀ ਸਥਿਤੀ ਪੈਦਾ ਹੋ ਗਈ ਹੈ।
ਬਾਲਾਸੋਰ ਵਿੱਚ ਬਚਾਅ ਕਾਰਜਾਂ ਲਈ ਐਨਡੀਆਰਐਫ, ਓਡੀਸ਼ਾ ਆਫ਼ਤ ਰਾਹਤ ਫੋਰਸ (ਓ.ਡੀ.ਆਰ.ਏ.ਐਫ) ਅਤੇ ਫਾਇਰ ਵਿਭਾਗ ਦੀਆਂ ਕੁੱਲ 32 ਟੀਮਾਂ ਤਾਇਨਾਤ ਕੀਤੀਆਂ ਗਈਆਂ ਹਨ। ਮਯੂਰਭੰਜ ਵਿੱਚ ਓ.ਡੀ.ਆਰ.ਏ.ਐਫ ਦੀ ਇੱਕ ਟੀਮ ਅਤੇ 23 ਫਾਇਰ ਟੀਮਾਂ ਕੰਮ ਕਰ ਰਹੀਆਂ ਹਨ। ਰਾਹਤ ਕਾਰਜਾਂ ਲਈ ਕੁੱਲ 106 ਕਿਸ਼ਤੀਆਂ ਤਾਇਨਾਤ ਕੀਤੀਆਂ ਗਈਆਂ ਹਨ। ਸੁਬਰਨਰੇਖਾ ਨੂੰ ਛੱਡ ਕੇ ਸਾਰੀਆਂ ਨਦੀਆਂ ਦਾ ਪਾਣੀ ਦਾ ਪੱਧਰ ਹੁਣ ਹੌਲੀ-ਹੌਲੀ ਘਟਣਾ ਸ਼ੁਰੂ ਹੋ ਗਿਆ ਹੈ।
