ਸ੍ਰੀਨਗਰ : ਦੱਖਣੀ ਸ੍ਰੀਨਗਰ ਦੇ ਨੌਗਾਮ ਪੁਲਿਸ ਸਟੇਸ਼ਨ ਵਿੱਚ ਬੀਤੀ ਰਾਤ ਭਿਆਨਕ ਹਾਦਸਾ ਵਾਪਰਿਆ, ਜਿਸਦੀ ਕਿਸੇ ਨੇ ਕਲਪਨਾ ਵੀ ਨਹੀਂ ਕੀਤੀ ਸੀ। ਇੱਥੇ ਇੱਕ ਅਜਿਹਾ ਭਿਆਨਕ ਧਮਾਕਾ ਹੋਇਆ ਜਿਸਨੇ ਪੂਰੇ ਇਲਾਕੇ ਨੂੰ ਹਿਲਾ ਦਿੱਤਾ ਅਤੇ ਇਸਦੀ ਗੂੰਜ ਕਈ ਕਿਲੋਮੀਟਰ ਦੂਰ ਤੱਕ ਸੁਣਾਈ ਦਿੱਤੀ। ਥਾਣੇ ਦੀ ਇਮਾਰਤ ਦਾ ਵੱਡਾ ਹਿੱਸਾ ਢਹਿ ਗਿਆ, ਕਈ ਗੱਡੀਆਂ ਧੂੰ-ਧੂੰ ਕਰਕੇ ਸੜ ਗਈਆਂ ਅਤੇ 300 ਫੁੱਟ ਤੱਕ ਇਨਸਾਨੀ ਅਵਸ਼ੇਸ਼ ਖਿੱਲਰੇ ਪਏ ਮਿਲੇ।
ਬੀਤੀ ਰਾਤ ਲਗਭਗ 11.22 ਵਜੇ ਹੋਏ ਇਸ ਧਮਾਕੇ ਵਿੱਚ ਹੁਣ ਤੱਕ 9 ਮੌਤਾਂ ਦੀ ਪੁਸ਼ਟੀ ਹੋ ਚੁੱਕੀ ਹੈ ਅਤੇ 27 ਜ਼ਖ਼ਮੀ ਹਸਪਤਾਲ ਵਿੱਚ ਜ਼ਿੰਦਗੀ ਨਾਲ ਜੂਝ ਰਹੇ ਹਨ, ਜਿਨ੍ਹਾਂ ਵਿੱਚ ਕਈਆਂ ਦੀ ਹਾਲਤ ਬਹੁਤ ਗੰਭੀਰ ਹੈ। ਮਲਬੇ ਵਿੱਚ ਅਜੇ ਵੀ ਲੋਕਾਂ ਦੇ ਦੱਬੇ ਹੋਣ ਦਾ ਖਦਸ਼ਾ ਹੈ।
ਸੀ.ਸੀ.ਟੀ.ਵੀ ਫੁਟੇਜ ਅਤੇ ਅੱਖੀਂ ਦੇਖਣ ਵਾਲਿਆਂ ਨੇ ਦੱਸਿਆ ਕਿ ਧਮਾਕਾ ਇੰਨਾ ਤੇਜ਼ ਸੀ ਕਿ ਅੱਗ ਅਤੇ ਧੂੰਏਂ ਦਾ ਗੁਬਾਰ ਅਸਮਾਨ ਵਿੱਚ ਉੱਠ ਗਿਆ। ਰਾਹਤ ਦਲ ਨੂੰ ਛੋਟੇ-ਛੋਟੇ ਲਗਾਤਾਰ ਧਮਾਕਿਆਂ ਕਾਰਨ ਕਰੀਬ ਇੱਕ ਘੰਟੇ ਤੱਕ ਅੰਦਰ ਦਾਖਲ ਹੋਣ ਵਿੱਚ ਦਿੱਕਤ ਆਈ।
IED ਸਾਜ਼ਿਸ਼ ਜਾਂ ਲਾਪਰਵਾਹੀ – ਜਾਂਚ ਦੇ ਦੋ ਪਹਿਲੂ
ਪੁਲਿਸ ਸੂਤਰਾਂ ਨੇ ਦੱਸਿਆ ਕਿ ਫਿਲਹਾਲ ਜਾਂਚ ਏਜੰਸੀਆਂ ਦੋ ਮੁੱਖ ਪੱਖਾਂ ਤੋਂ ਇਸ ਘਟਨਾ ਦੀ ਜਾਂਚ ਕਰ ਰਹੀਆਂ ਹਨ:
ਲਾਪਰਵਾਹੀ ਦਾ ਕੋਣ: ਅਨੁਮਾਨ ਹੈ ਕਿ ਪੁਲਿਸ ਸਟੇਸ਼ਨ ਦੇ ਅੰਦਰ ਰੱਖੀ ਗਈ ਲਗਭਗ 360 ਕਿਲੋਗ੍ਰਾਮ ਅਮੋਨੀਅਮ ਨਾਈਟ੍ਰੇਟ ਵਿਸਫੋਟਕ ਸਮੱਗਰੀ ਵਿੱਚ ਉਸ ਸਮੇਂ ਵਿਸਫੋਟ ਹੋ ਗਿਆ ਜਦੋਂ ਮਜਿਸਟਰੇਟ ਦੀ ਮੌਜੂਦਗੀ ਵਿੱਚ ਇਸਨੂੰ ਸੀਲ ਕੀਤਾ ਜਾ ਰਿਹਾ ਸੀ।
ਅੱਤਵਾਦੀ ਸਾਜ਼ਿਸ਼ ਦਾ ਕੋਣ: ਦੂਜਾ, ਵਧੇਰੇ ਗੰਭੀਰ ਕੋਣ ਇੱਕ ਅੱਤਵਾਦੀ ਹਮਲੇ ਦਾ ਹੈ। ਅਧਿਕਾਰੀਆਂ ਨੂੰ ਸ਼ੱਕ ਹੈ ਕਿ ਕੰਪਲੈਕਸ ਵਿੱਚ ਖੜ੍ਹੀ ਇੱਕ ਜ਼ਬਤ ਕੀਤੀ ਕਾਰ ਵਿੱਚ ਆਈਈਡੀ (IED) ਲਗਾਇਆ ਗਿਆ ਸੀ, ਜਿਸ ਦੇ ਧਮਾਕੇ ਨੇ ਅਮੋਨੀਅਮ ਨਾਈਟ੍ਰੇਟ ਦੇ ਵੱਡੇ ਭੰਡਾਰ ਨੂੰ ਡੈਟੋਨੇਟ ਕਰ ਦਿੱਤਾ। ਜੈਸ਼-ਏ-ਮੁਹੰਮਦ ਨਾਲ ਜੁੜੇ ਸ਼ੈਡੋ ਗਰੁੱਪ ਪੀਏਐਫਐਫ (PAFF) ਨੇ ਹਮਲੇ ਦੀ ਜ਼ਿੰਮੇਵਾਰੀ ਲੈਣ ਦਾ ਦਾਅਵਾ ਕੀਤਾ ਹੈ, ਜਿਸਦੀ ਸੱਚਾਈ ਦੀ ਜਾਂਚ ਜਾਰੀ ਹੈ।
ਡਾਕਟਰਾਂ ਦੇ ਮੋਡਿਊਲ ਦੀ ਲੜੀ ਫਿਰ ਸਾਹਮਣੇ
ਇਹ ਧਮਾਕਾ ਨੌਗਾਮ ਪੁਲਿਸ ਸਟੇਸ਼ਨ ‘ਤੇ ਹੋਇਆ, ਜੋ ਕਿ ਇੱਕ ਮਹੱਤਵਪੂਰਨ ਸੁਰੱਖਿਆ ਕੇਂਦਰ ਹੈ ਕਿਉਂਕਿ ਇੱਥੇ ਹੀ ਅੰਤਰ-ਰਾਜ ਅੱਤਵਾਦੀ ਮੋਡਿਊਲ ਦੀ ਪਹਿਲੀ FIR ਦਰਜ ਕੀਤੀ ਗਈ ਸੀ। ਇਸ ਤਰ੍ਹਾਂ, ਸੁਰੱਖਿਆ ਏਜੰਸੀਆਂ ਇਸ ਧਮਾਕੇ ਨੂੰ ਚੱਲ ਰਹੀ ਜਾਂਚ ਦੇ ਵਿਰੋਧ ਵਿੱਚ ਬਦਲੇ ਦੀ ਕਾਰਵਾਈ ਮੰਨ ਕੇ ਦੇਖ ਰਹੀਆਂ ਹਨ।
ਥਾਣੇ ਵਿੱਚ ਜੋ 360 ਕਿਲੋ ਵਿਸਫੋਟਕ ਸੀ, ਉਹ ਫਰੀਦਾਬਾਦ ਵਿੱਚ ਗ੍ਰਿਫ਼ਤਾਰ ਡਾਕਟਰ ਮੁਜ਼ੰਮਿਲ ਗਨਈ ਦੇ ਕਿਰਾਏ ਦੇ ਘਰੋਂ ਬਰਾਮਦ ਹੋਇਆ ਸੀ। ਇਸੇ ਮੋਡਿਊਲ ਨਾਲ ਜੁੜੇ ਦੋ ਹੋਰ ਡਾਕਟਰਾਂ ਨੂੰ ਅਲ-ਫਲਾਹ ਯੂਨੀਵਰਸਿਟੀ ਤੋਂ ਫੜਿਆ ਗਿਆ ਸੀ। ਜਾਂਚ ਦੌਰਾਨ ਏਜੰਸੀਆਂ ਨੇ ਫਰੀਦਾਬਾਦ ਤੋਂ 2,900 ਕਿਲੋ ਵਿਸਫੋਟਕ ਸਮੱਗਰੀ ਵੀ ਜ਼ਬਤ ਕੀਤੀ ਸੀ, ਜੋ ਜੈਸ਼-ਏ-ਮੁਹੰਮਦ ਦੇ ਇੱਕ ਵੱਡੇ ਨੈੱਟਵਰਕ ਵੱਲ ਇਸ਼ਾਰਾ ਕਰਦੀ ਹੈ।
ਦਿੱਲੀ ਦੇ ਲਾਲ ਕਿਲ੍ਹਾ ਬਲਾਸਟ ਨਾਲ ਵੀ ਕੁਨੈਕਸ਼ਨ?
ਸੁਰੱਖਿਆ ਏਜੰਸੀਆਂ ਨੇ ਨੌਗਾਮ ਧਮਾਕੇ ਤੋਂ ਬਾਅਦ ਪੂਰੇ ਜੰਮੂ-ਕਸ਼ਮੀਰ ਵਿੱਚ ਹਾਈ-ਅਲਰਟ ਜਾਰੀ ਕਰ ਦਿੱਤਾ ਹੈ। ਡੀ.ਜੀ.ਪੀ. ਨਲਿਨ ਪ੍ਰਭਾਤ ਨੇ ਹਾਈਬ੍ਰਿਡ ਸਕਿਓਰਿਟੀ ਰਿਵਿਊ ਕੀਤਾ।
ਇਹ ਸਭ ਉਸ ਘਟਨਾ ਤੋਂ ਬਾਅਦ ਹੋ ਰਿਹਾ ਹੈ ਜਦੋਂ ਇਸੇ ਹਫ਼ਤੇ ਦਿੱਲੀ ਦੇ ਲਾਲ ਕਿਲ੍ਹੇ ਕੋਲ ਕਾਰ ਵਿੱਚ ਜ਼ੋਰਦਾਰ ਧਮਾਕਾ ਹੋਇਆ ਸੀ, ਜਿਸ ਵਿੱਚ 13 ਲੋਕਾਂ ਦੀ ਮੌਤ ਹੋ ਗਈ ਸੀ। ਸਰਕਾਰ ਨੇ ਇਸ ਧਮਾਕੇ ਨੂੰ “ਘਿਣਾਉਣੀ ਅੱਤਵਾਦੀ ਹਰਕਤ” ਦੱਸਿਆ ਹੈ ਅਤੇ ਜਾਂਚ ਏਜੰਸੀਆਂ ਨੂੰ “ਮੈਕਸੀਮਮ ਪ੍ਰਾਇਓਰਿਟੀ” ਉੱਤੇ ਕੰਮ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ।
