Sports News : ਭਾਰਤੀ ਸਟਾਰ ਜੈਵਲਿਨ ਖਿਡਾਰੀ ਅਤੇ 2 ਵਾਰ ਦੇ ਓਲੰਪਿਕ ਤਗਮਾ ਜੇਤੂ ਨੀਰਜ ਚੋਪੜਾ ਇਸ ਵਾਰ ਪੋਲੈਂਡ ਵਿੱਚ ਹੋਣ ਵਾਲੀ ਡਾਇਮੰਡ ਲੀਗ 2025 ਦਾ ਹਿੱਸਾ ਨਹੀਂ ਹੋਣਗੇ। ਭਾਰਤ ਦੇ ਨੀਰਜ ਚੋਪੜਾ ਅਤੇ ਪਾਕਿਸਤਾਨ ਦੇ ਅਰਸ਼ਦ ਨਦੀਮ ਦੇ ਨਾਮ ਇਸ ਟੂਰਨਾਮੈਂਟ ਲਈ ਖਿਡਾਰੀਆਂ ਦੀ ਅਧਿਕਾਰਤ ਸੂਚੀ ਵਿੱਚ ਨਹੀਂ ਹਨ, ਜਿਸ ਤੋਂ ਬਾਅਦ ਉਮੀਦ ਕੀਤੀ ਜਾ ਰਹੀ ਹੈ ਕਿ ਇਹ ਦੋਵੇਂ ਖਿਡਾਰੀ ਇਸ ਟੂਰਨਾਮੈਂਟ ਵਿੱਚ ਹਿੱਸਾ ਨਹੀਂ ਲੈਣਗੇ।
ਕਿਉਂ ਡਾਇਮੰਡ ਲੀਗ 2025 ’ਚ ਹਿੱਸਾ ਨਹੀਂ ਲੈ ਰਹੇ ਨੀਰਜ ਚੋਪੜਾ?
ਹੁਣ ਤੱਕ ਕੋਈ ਠੋਸ ਕਾਰਨ ਸਾਹਮਣੇ ਨਹੀਂ ਆਇਆ ਹੈ ਕਿ ਨੀਰਜ ਚੋਪੜਾ ਪੋਲੈਂਡ ਵਿੱਚ ਹੋਣ ਵਾਲੀ ਡਾਇਮੰਡ ਲੀਗ ਵਿੱਚ ਕਿਉਂ ਹਿੱਸਾ ਨਹੀਂ ਲੈ ਰਹੇ ਹਨ, ਜਾਣਕਾਰੀ ਦੇ ਅਨੁਸਾਰ, ਨੀਰਜ ਚੋਪੜਾ ਟੋਕੀਓ ਐਥਲੈਟਿਕਸ ਚੈਂਪੀਅਨਸ਼ਿਪ ਦੇ ਮੱਦੇਨਜ਼ਰ ਡਾਇਮੰਡ ਲੀਗ 2025 ਵਿੱਚ ਹਿੱਸਾ ਨਹੀਂ ਲੈ ਸਕਦੇ। ਟੋਕੀਓ ਐਥਲੈਟਿਕਸ ਚੈਂਪੀਅਨਸ਼ਿਪ 17 ਅਤੇ 18 ਸਤੰਬਰ ਨੂੰ ਹੋਵੇਗੀ। ਨੀਰਜ ਚੋਪੜਾ ਨੂੰ ਆਖਰੀ ਵਾਰ 5 ਜੁਲਾਈ ਨੂੰ ਐਨ.ਸੀ. ਕਲਾਸਿਕ ਟੂਰਨਾਮੈਂਟ ਵਿੱਚ ਖੇਡਦੇ ਦੇਖਿਆ ਗਿਆ ਸੀ।
ਤੁਹਾਨੂੰ ਦੱਸ ਦੇਈਏ ਕਿ ਨੀਰਜ ਚੋਪੜਾ ਇਸ ਸਮੇਂ ਡਾਇਮੰਡ ਲੀਗ 2025 ਪੁਆਇੰਟ ਟੇਬਲ ਵਿੱਚ ਦੂਜੇ ਸਥਾਨ ‘ਤੇ ਹੈ। ਨੀਰਜ ਦੇ 15 ਅੰਕ ਹਨ, ਇਸ ਲਈ ਜੇਕਰ ਨੀਰਜ ਡਾਇਮੰਡ ਲੀਗ 2025 ਵਿੱਚ ਹਿੱਸਾ ਨਹੀਂ ਲੈਂਦਾ ਹੈ, ਤਾਂ ਉਹ ਟਾਪ-4 ਸੂਚੀ ਵਿੱਚੋਂ ਵੀ ਬਾਹਰ ਹੋ ਸਕਦੇ ਹਨ।
ਇਸ ਸੂਚੀ ਵਿੱਚ ਸਿਖਰ ‘ਤੇ ਜੂਲੀਅਨ ਵੇਬਰ ਹਨ। ਇਸ ਤੋਂ ਇਲਾਵਾ, ਐਂਡਰਸਨ ਪੀਟਰਸ ਤੀਜੇ ਨੰਬਰ ‘ਤੇ ਹਨ ਅਤੇ ਕੇਸ਼ੋਨ ਵਾਲਕੋਟ ਚੌਥੇ ਨੰਬਰ ‘ਤੇ ਹਨ। ਜੇਕਰ ਇਹ ਖਿਡਾਰੀ ਪੋਲੈਂਡ ਵਿੱਚ ਹੋਣ ਵਾਲੀ ਡਾਇਮੰਡ ਲੀਗ ਵਿੱਚ ਵਧੀਆ ਪ੍ਰਦਰਸ਼ਨ ਕਰਦੇ ਹਨ, ਤਾਂ ਉਹ ਨੀਰਜ ਚੋਪੜਾ ਨੂੰ ਪਿੱਛੇ ਛੱਡ ਸਕਦੇ ਹਨ।
