ਸ਼ਿਮਲਾ: ਹਿਮਾਚਲ ਪ੍ਰਦੇਸ਼ ਦੇ ਸ਼ਿਮਲਾ ਜ਼ਿਲ੍ਹੇ ਵਿੱਚ ਚੂੜਧਾਰ ਚੋਟੀ ਤੋਂ ਵਾਪਸ ਪਰਤ ਰਹੇ ਪੰਜਾਬ ਅਤੇ ਹਰਿਆਣਾ ਨਾਲ ਸਬੰਧਤ ਚਾਰ ਸ਼ਰਧਾਲੂ ਸੰਘਣੇ ਜੰਗਲ ਵਿੱਚ ਰਸਤਾ ਭਟਕ ਗਏ। ਸੂਚਨਾ ਮਿਲਣ ਤੋਂ ਬਾਅਦ ਸ਼ਿਮਲਾ ਪੁਲਸ ਨੇ ਰਾਤ ਸਮੇਂ ਤਲਾਸ਼ੀ ਮੁਹਿੰਮ ਚਲਾ ਕੇ ਚਾਰਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ।
ਪੁਲਸ ਮੁਤਾਬਕ ਰਸਤਾ ਭਟਕਣ ਦੀ ਜਾਣਕਾਰੀ ਐਤਵਾਰ ਰਾਤ ਐਮਰਜੈਂਸੀ ਹੈਲਪਲਾਈਨ 112 ਰਾਹੀਂ ਕੰਟਰੋਲ ਰੂਮ ਤੱਕ ਪਹੁੰਚੀ। ਇਸ ਤੋਂ ਤੁਰੰਤ ਬਾਅਦ ਚੌਪਾਲ ਥਾਣੇ ਦੀ ਟੀਮ ਨੇ ਜੰਗਲ ਵਿੱਚ ਸਰਚ ਅਤੇ ਰੈਸਕਿਊ ਆਪਰੇਸ਼ਨ ਸ਼ੁਰੂ ਕਰ ਦਿੱਤਾ।
ਰਾਤ ਦੇ ਹਨ੍ਹੇਰੇ ਅਤੇ ਸੰਘਣੇ ਜੰਗਲ ਦੇ ਬਾਵਜੂਦ ਪੁਲਸ ਨੇ ਤਲਾਸ਼ ਜਾਰੀ ਰੱਖੀ। ਅੱਧੀ ਰਾਤ ਦੇ ਕਰੀਬ ਪਾਤਾਲ ਖੱਡ ਦੇ ਨੇੜੇ ਪੰਜਾਬ ਨਾਲ ਸਬੰਧਤ ਦੋ ਨੌਜਵਾਨਾਂ ਨੂੰ ਲੱਭ ਕੇ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ।
ਇਸੇ ਦੌਰਾਨ ਪੁਲਸ ਨੂੰ ਇੱਕ ਹੋਰ ਜੋੜੇ ਦੇ ਵੀ ਜੰਗਲ ਵਿੱਚ ਰਸਤਾ ਭਟਕਣ ਦੀ ਜਾਣਕਾਰੀ ਮਿਲੀ। ਰੈਸਕਿਊ ਟੀਮ ਨੇ ਉਨ੍ਹਾਂ ਦੀ ਭਾਲ ਸ਼ੁਰੂ ਕੀਤੀ ਅਤੇ ਕੁਝ ਸਮੇਂ ਬਾਅਦ ਦੋਵਾਂ ਨੂੰ ਵੀ ਸੁਰੱਖਿਅਤ ਲੱਭ ਲਿਆ ਗਿਆ।
ਬਚਾਏ ਗਏ ਸ਼ਰਧਾਲੂਆਂ ਵਿੱਚ ਹਰਿਆਣਾ ਦੇ ਕਰਨਾਲ ਨਾਲ ਸਬੰਧਤ ਰਾਹੁਲ (26) ਅਤੇ ਉਸ ਦੀ ਪਤਨੀ ਮਧੂ (24) ਤੋਂ ਇਲਾਵਾ ਪੰਜਾਬ ਦੇ ਮੋਹਾਲੀ ਵਾਸੀ ਰਾਹੁਲ (22) ਅਤੇ ਸੰਕੇਤ (21) ਸ਼ਾਮਲ ਹਨ।
ਸ਼ਿਮਲਾ ਦੇ ਸੀਨੀਅਰ ਪੁਲਸ ਸੁਪਰਡੈਂਟ ਗੌਰਵ ਸਿੰਘ ਨੇ ਦੱਸਿਆ ਕਿ ਸਾਰੇ ਚਾਰ ਸ਼ਰਧਾਲੂ ਸੁਰੱਖਿਅਤ ਹਨ। ਪੁਲਸ ਵੱਲੋਂ ਉਨ੍ਹਾਂ ਦੇ ਠਹਿਰਣ ਦੀ ਵੀ ਵਿਵਸਥਾ ਕੀਤੀ ਗਈ ਹੈ।
ਪੁਲਸ ਦੀ ਤੁਰੰਤ ਕਾਰਵਾਈ ਕਾਰਨ ਰਾਤ ਦੇ ਸਮੇਂ ਜੰਗਲ ਵਿੱਚ ਫਸੇ ਚਾਰਾਂ ਸ਼ਰਧਾਲੂਆਂ ਨੂੰ ਸਮੇਂ ਸਿਰ ਸੁਰੱਖਿਅਤ ਬਚਾਇਆ ਜਾ ਸਕਿਆ।
