ਸਾਬਕਾ ਵਿਧਾਇਕ ਮਹੇਸ਼ਵਰ ਯਾਦਵ ਤੇ ਉਨ੍ਹਾਂ ਦੇ ਪੁੱਤਰ ਪ੍ਰਭਾਤ ਕੁਮਾਰ ਆਰ.ਜੇ.ਡੀ. ‘ਚ ਹੋਏ ਸ਼ਾਮਲ

ਬਿਹਾਰ: ਬਿਹਾਰ ਵਿਧਾਨ ਸਭਾ ਚੋਣਾਂ ਨੇੜੇ ਆਉਣ ਦੇ ਨਾਲ, ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਦੇ ਜਨਤਾ ਦਲ-ਯੂਨਾਈਟਿਡ (ਜੇ.ਡੀ.ਯੂ.) ਨੇ ਪਾਰਟੀ ਵਿਰੋਧੀ ਗਤੀਵਿਧੀਆਂ ਅਤੇ “ਆਪਣੀ ਵਿਚਾਰਧਾਰਾ ਦੀ ਅਣਦੇਖੀ” ਕਰਨ ਦੇ ਦੋਸ਼ ਵਿੱਚ 16 ਨੇਤਾਵਾਂ ਨੂੰ ਕੱਢ ਦਿੱਤਾ ਹੈ। ਇਸ ਸੂਚੀ ਵਿੱਚ ਸਾਬਕਾ ਵਿਧਾਇਕ ਮਹੇਸ਼ਵਰ ਯਾਦਵ ਅਤੇ ਉਨ੍ਹਾਂ ਦੇ ਪੁੱਤਰ ਪ੍ਰਭਾਤ ਕੁਮਾਰ ਵੀ ਸ਼ਾਮਲ ਸਨ। ਇਸ ਦੇ ਨਾਲ ਹੀ , ਪਾਰਟੀ ‘ਚੋਂ ਕੱਢਣ ਤੋਂ ਬਾਅਦ, ਮਹੇਸ਼ਵਰ ਯਾਦਵ ਆਪਣੇ ਪੁੱਤਰ ਪ੍ਰਭਾਤ ਕੁਮਾਰ ਦੇ ਨਾਲ ਆਰ.ਜੇ.ਡੀ. ਵਿੱਚ ਸ਼ਾਮਲ ਹੋ ਗਏ।

ਤੇਜਸ਼ਵੀ ਯਾਦਵ ਨੇ ਦਿੱਤੀ ਮੈਂਬਰਸ਼ਿਪ
ਬੀਤੀ ਸ਼ਾਮ ਨੂੰ, ਆਰ.ਜੇ.ਡੀ. ਨੇਤਾ ਤੇਜਸ਼ਵੀ ਪ੍ਰਸਾਦ ਯਾਦਵ ਨੇ ਉਨ੍ਹਾਂ ਨੂੰ ਪਾਰਟੀ ਮੈਂਬਰਸ਼ਿਪ ਦਿੱਤੀ। ਮੌਕੇ ‘ਤੇ ਪ੍ਰਦੇਸ਼ ਪ੍ਰਧਾਨ ਮੰਗਨੀਲਾਲ ਮੰਡਲ, ਆਰ.ਜੇ.ਡੀ. ਨੇਤਾ ਜੈਸ਼ੰਕਰ ਯਾਦਵ ਅਤੇ ਹੋਰ ਮੌਜੂਦ ਸਨ। ਜੇ.ਡੀ.ਯੂ. ਨੇ ਵਿਧਾਇਕ ਗੋਪਾਲ ਮੰਡਲ ਸਮੇਤ ਪੰਜ ਨੇਤਾਵਾਂ ਨੂੰ ਤੁਰੰਤ ਪ੍ਰਭਾਵ ਨਾਲ ਕੱਢ ਦਿੱਤਾ ਹੈ, ਜੋ ਆਪਣੇ ਵਿਵਾਦਪੂਰਨ ਬਿਆਨਾਂ ਅਤੇ ਗਤੀਵਿਧੀਆਂ ਲਈ ਖ਼ਬਰਾਂ ਵਿੱਚ ਰਹੇ ਹਨ। ਜੇ.ਡੀ.ਯੂ. ਦੇ ਸੂਬਾ ਜਨਰਲ ਸਕੱਤਰ ਅਤੇ ਹੈੱਡਕੁਆਰਟਰ ਇੰਚਾਰਜ ਚੰਦਨ ਕੁਮਾਰ ਸਿੰਘ ਦੁਆਰਾ ਜਾਰੀ ਇੱਕ ਪੱਤਰ ਵਿੱਚ ਕਿਹਾ ਗਿਆ ਹੈ ਕਿ ਇਨ੍ਹਾਂ ਨੇਤਾਵਾਂ ਨੇ ਪਾਰਟੀ ਦੀ ਵਿਚਾਰਧਾਰਾ ਅਤੇ ਸੰਗਠਨਾਤਮਕ ਆਚਰਣ ਦੇ ਉਲਟ ਕੰਮ ਕੀਤਾ ਹੈ। ਪਾਰਟੀ ਵਿਰੋਧੀ ਗਤੀਵਿਧੀਆਂ ਵਿੱਚ ਸ਼ਾਮਲ ਹੋਣ ਕਾਰਨ ਉਨ੍ਹਾਂ ਦੀ ਮੁੱਢਲੀ ਮੈਂਬਰਸ਼ਿਪ ਤੁਰੰਤ ਪ੍ਰਭਾਵ ਨਾਲ ਖਤਮ ਕੀਤੀ ਜਾਂਦੀ ਹੈ। ਇਸ ਤੋਂ ਪਹਿਲਾਂ, ਪਾਰਟੀ ਨੇ ਇੱਕ ਸਾਬਕਾ ਮੰਤਰੀ ਸਮੇਤ 11 ਨੇਤਾਵਾਂ ਨੂੰ ਕੱਢ ਦਿੱਤਾ ਸੀ।

ਜਨਤਾ ਦਲ (ਯੂ) ਦੀ ਸੂਬਾ ਇਕਾਈ ਦੇ ਜਨਰਲ ਸਕੱਤਰ ਚੰਦਨ ਕੁਮਾਰ ਸਿੰਘ ਵੱਲੋਂ ਸ਼ਨੀਵਾਰ ਸ਼ਾਮ ਨੂੰ ਜਾਰੀ ਇੱਕ ਬਿਆਨ ਵਿੱਚ ਕਿਹਾ ਗਿਆ ਕਿ ਸਾਰੇ 11 ਆਗੂਆਂ ਨੂੰ ਪਾਰਟੀ ਦੀ ਮੁੱਢਲੀ ਮੈਂਬਰਸ਼ਿਪ ਤੋਂ ਵੀ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਕਿਹਾ, “ਪਾਰਟੀ ਨੇ ਪਾਇਆ ਕਿ ਇਹ ਸਾਰੇ 11 ਆਗੂ ਸੂਬੇ ਵਿੱਚ ਪਾਰਟੀ ਵਿਰੋਧੀ ਗਤੀਵਿਧੀਆਂ ਵਿੱਚ ਸ਼ਾਮਲ ਸਨ, ਜਿਸ ਤੋਂ ਬਾਅਦ ਪਾਰਟੀ ਨੇ ਅਨੁਸ਼ਾਸਨੀ ਕਾਰਵਾਈ ਕੀਤੀ।” ਜ਼ਿਕਰਯੋਗ ਹੈ ਕਿ ਬਿਹਾਰ ਵਿਧਾਨ ਸਭਾ ਦੀਆਂ 243 ਸੀਟਾਂ ਲਈ ਵੋਟਿੰਗ 6 ਨਵੰਬਰ ਅਤੇ 11 ਨਵੰਬਰ ਨੂੰ ਦੋ ਪੜਾਵਾਂ ਵਿੱਚ ਹੋਣੀ ਹੈ। ਵੋਟਾਂ ਦੀ ਗਿਣਤੀ 14 ਨਵੰਬਰ ਨੂੰ ਹੋਵੇਗੀ ਅਤੇ ਚੋਣ ਪ੍ਰਕਿ ਰਿਆ 16 ਨਵੰਬਰ ਤੱਕ ਪੂਰੀ ਹੋ ਜਾਵੇਗੀ। ਬਿਹਾਰ ਵਿਧਾਨ ਸਭਾ ਦਾ ਮੌਜੂਦਾ ਕਾਰਜਕਾਲ 22 ਨਵੰਬਰ, 2025 ਨੂੰ ਖਤਮ ਹੋ ਰਿਹਾ ਹੈ।