ਸਪੋਰਟਸ ਡੈਸਕ: ਵਿਸ਼ਵ ਕੱਪ ਵਿੱਚ 51 ਸਾਲ ਬਾਅਦ ਤਮਗਾ ਜਿੱਤਣ ਦਾ ਸੁਪਨਾ ਲੈ ਕੇ ਗਈ ਭਾਰਤੀ ਪੁਰਸ਼ ਹਾਕੀ ਟੀਮ ਦੇ ਸੈਮੀਫਾਈਨਲ ਵਿੱਚ ਵੀ ਪਹੁੰਚਣ ਵਿੱਚ ਨਾਕਾਮ ਰਹਿਣ ਤੋਂ ਬਾਅਦ ਸਾਬਕਾ ਦਿੱਗਜ ਖਿਡਾਰੀਆਂ ਨੇ ਨੌਜਵਾਨ ਖਿਡਾਰੀਆਂ ਨੂੰ ਮੌਕਾ ਨਾ ਦੇਣ ਅਤੇ ਉਸੇ ਕੋਰ ਗਰੁੱਪ ਨਾਲ ਲਗਾਤਾਰ ਖੇਡਣ ’ਤੇ ਸਵਾਲ ਚੁੱਕੇ ਹਨ।
ਅਰਜਨਟੀਨਾ ਤੋਂ 3-5 ਨਾਲ ਹਾਰਨ ਤੋਂ ਬਾਅਦ ਭਾਰਤ ਦੀਆਂ ਸੈਮੀਫਾਈਨਲ ਵਿੱਚ ਪਹੁੰਚਣ ਦੀਆਂ ਉਮੀਦਾਂ ਵੀ ਖਤਮ ਹੋ ਗਈਆਂ ਅਤੇ ਇਸ ਨਾਲ ਉਹ ਕਮਜ਼ੋਰੀਆਂ ਵੀ ਸਾਹਮਣੇ ਆ ਗਈਆਂ, ਜੋ ਪੈਰਿਸ ਓਲੰਪਿਕ ਤੋਂ ਬਾਅਦ ਲਗਾਤਾਰ ਚੱਲ ਰਹੀਆਂ ਸਨ। ਸਾਬਕਾ ਖਿਡਾਰੀਆਂ ਦਾ ਮੰਨਣਾ ਹੈ ਕਿ ਹੌਲੀ ਸ਼ੁਰੂਆਤ, ਮੌਕੇ ਗੁਆਉਣ ਅਤੇ ਡਿਫੈਂਸ ਵਿੱਚ ਗਲਤੀਆਂ ਤੋਂ ਇਲਾਵਾ ਸਮੱਸਿਆ ਇਸ ਤੋਂ ਕਿਤੇ ਵੱਡੀ ਹੈ ਅਤੇ ਇਸ ਦਾ ਹੱਲ ਕਾਫ਼ੀ ਪਹਿਲਾਂ ਕੱਢਿਆ ਜਾਣਾ ਚਾਹੀਦਾ ਸੀ।
ਸਵਿਟਜ਼ਰਲੈਂਡ ਵਿੱਚ ਬੂਟ ਕੈਂਪ
ਭਾਰਤੀ ਟੀਮ ਵਿਸ਼ਵ ਕੱਪ ਤੋਂ ਪਹਿਲਾਂ ਮਾਨਸਿਕ ਮਜ਼ਬੂਤੀ ਵਧਾਉਣ ਲਈ ਸਵਿਟਜ਼ਰਲੈਂਡ ਵਿੱਚ ਬੂਟ ਕੈਂਪ ਵਿੱਚ ਗਈ ਸੀ, ਪਰ ਟੂਰਨਾਮੈਂਟ ਵਿੱਚ ਦਬਾਅ ਦਾ ਸਾਹਮਣਾ ਨਹੀਂ ਕਰ ਸਕੀ। ਡਰੈਗ ਫਲਿਕਰ ਅਤੇ ਕਪਤਾਨ ਹਰਮਨਪ੍ਰੀਤ ਸਿੰਘ ’ਤੇ ਜ਼ਿਆਦਾ ਨਿਰਭਰਤਾ ਦਾ ਖਾਮਿਆਜ਼ਾ ਭੁਗਤਣਾ ਪਿਆ, ਜਦਕਿ ਉਹ ਪੂਰੀ ਤਰ੍ਹਾਂ ਫਿੱਟ ਵੀ ਨਹੀਂ ਸਨ। ਮਨਪ੍ਰੀਤ ਸਿੰਘ ਅਤੇ ਮਨਦੀਪ ਸਿੰਘ ਵਰਗੇ ਸੀਨੀਅਰ ਖਿਡਾਰੀ ਵੀ ਉਮੀਦਾਂ ’ਤੇ ਖਰੇ ਨਹੀਂ ਉਤਰ ਸਕੇ।
ਪੀ. ਆਰ. ਸ਼੍ਰੀਜੇਸ਼ ਨੇ ਚੁੱਕੇ ਸਵਾਲ
ਪੈਰਿਸ ਓਲੰਪਿਕ ਵਿੱਚ ਕਾਂਸੀ ਦਾ ਤਮਗਾ ਜਿੱਤਣ ਤੋਂ ਬਾਅਦ ਸੰਨਿਆਸ ਲੈਣ ਵਾਲੇ ਗੋਲਕੀਪਰ ਪੀ. ਆਰ. ਸ਼੍ਰੀਜੇਸ਼ ਨੇ ਜੂਨੀਅਰ ਖਿਡਾਰੀਆਂ ਨੂੰ ਸਮੇਂ ਸਿਰ ਮੌਕੇ ਨਾ ਦਿੱਤੇ ਜਾਣ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਸੀਨੀਅਰ ਖਿਡਾਰੀਆਂ ਦੇ ਜਾਣ ਤੋਂ ਬਾਅਦ ਉਨ੍ਹਾਂ ਦੀ ਥਾਂ ਕੌਣ ਲਵੇਗਾ। ਕੀ ਅਸੀਂ ਦੂਜੀ ਕਤਾਰ ਤਿਆਰ ਕੀਤੀ ਹੈ? ਲਾਸ ਏਂਜਲਸ ਓਲੰਪਿਕ ਵਿੱਚ ਸਿਰਫ਼ ਦੋ ਸਾਲ ਬਚੇ ਹਨ ਅਤੇ ਇਸ ਤੋਂ ਪਹਿਲਾਂ ਲਗਭਗ 30 ਅੰਤਰਰਾਸ਼ਟਰੀ ਮੈਚ ਹੀ ਹੋਣਗੇ। ਕੀ ਇੰਨੇ ਮੈਚਾਂ ਵਿੱਚ ਓਲੰਪਿਕ ਲਈ ਖਿਡਾਰੀ ਤਿਆਰ ਕੀਤੇ ਜਾ ਸਕਦੇ ਹਨ?
ਉਨ੍ਹਾਂ ਕਿਹਾ ਕਿ ਵਿਸ਼ਵ ਕੱਪ ਦੀ ਟੀਮ ਵਿੱਚ ਵੀ ਉਹੀ ਕੋਰ ਖਿਡਾਰੀ ਹਨ, ਜਦਕਿ ਮਨਮੀਤ ਸਿੰਘ, ਆਮਿਰ ਅਲੀ, ਰੋਸ਼ਨ ਕੁਜੂਰ, ਤਾਲੇਮ ਪ੍ਰਿਯਬਰਤ, ਰੋਹਿਤ ਅਤੇ ਅਰਸ਼ਦੀਪ ਵਰਗੇ ਕਈ ਪ੍ਰਤਿਭਾਸ਼ਾਲੀ ਜੂਨੀਅਰ ਖਿਡਾਰੀ ਹਾਲੇ ਵੀ ਮੌਕੇ ਦੀ ਉਡੀਕ ਕਰ ਰਹੇ ਹਨ।
ਸਾਬਕਾ ਓਲੰਪੀਅਨ ਜਗਬੀਰ ਸਿੰਘ ਨੇ ਵੀ ਸਾਧਿਆ ਨਿਸ਼ਾਨਾ
ਸਾਬਕਾ ਓਲੰਪੀਅਨ ਜਗਬੀਰ ਸਿੰਘ ਨੇ ਕਿਹਾ ਕਿ ਚੋਣ ਦੇ ਕੁਝ ਫ਼ੈਸਲੇ ਬਿਹਤਰ ਹੋ ਸਕਦੇ ਸਨ। ਉਨ੍ਹਾਂ ਕਿਹਾ ਕਿ ਜੂਨੀਅਰ ਖਿਡਾਰੀਆਂ ਨੂੰ ਸਹੀ ਸਮੇਂ ’ਤੇ ਮੌਕੇ ਮਿਲਣੇ ਚਾਹੀਦੇ ਹਨ ਅਤੇ ਚੋਣ ਦੇ ਕੁਝ ਫ਼ੈਸਲੇ ਬਿਹਤਰ ਹੋ ਸਕਦੇ ਸਨ। ਤਿਆਰੀ ਓਲੰਪਿਕ ਤੋਂ ਓਲੰਪਿਕ ਤੱਕ ਦੀ ਹੋਣੀ ਚਾਹੀਦੀ ਹੈ। ਕੋਚਿੰਗ ਸਟਾਫ ਨੇ ਤਜਰਬੇ ਨੂੰ ਹੀ ਤਰਜੀਹ ਦਿੱਤੀ, ਜੋ ਕੰਮ ਨਹੀਂ ਆਈ। ਭਾਰਤ ਕੋਲ ਇਹ ਸਰਵੋਤਮ ਮੌਕਾ ਸੀ, ਪਰ ਪ੍ਰਦਰਸ਼ਨ ਵਿੱਚ ਨਿਰੰਤਰਤਾ ਨਹੀਂ ਦਿਖੀ। ਹਰ ਦਸ ਮਿੰਟ ਬਾਅਦ ਡਿਫੈਂਸ ਚਰਮਰਾ ਰਿਹਾ ਸੀ।
ਸਾਬਕਾ ਕਪਤਾਨ ਵਾਸੁਦੇਵਨ ਭਾਸਕਰਨ ਨੇ ਟੀਮ ਨੂੰ ਘੇਰਿਆ
ਓਲੰਪਿਕ ਸੋਨ ਤਮਗਾ ਜੇਤੂ ਕਪਤਾਨ ਰਹੇ ਵਾਸੁਦੇਵਨ ਭਾਸਕਰਨ ਨੇ ਕਿਹਾ, “ਮੈਂ ਪਿਛਲੇ ਚਾਰ ਸਾਲਾਂ ਵਿੱਚ ਕਿਸੇ ਭਾਰਤੀ ਫਾਰਵਰਡ ਨੂੰ ਚੰਗਾ ਖੇਡਦੇ ਨਹੀਂ ਦੇਖਿਆ। ਬੈਕ ਪਾਸ ਕਿੱਥੇ ਸਨ? ਗੋਲ ’ਤੇ ਕਿੰਨੇ ਹਮਲੇ ਕੀਤੇ ਗਏ? ਅਤੇ ਫੁੱਲ ਪ੍ਰੈੱਸ ’ਤੇ ਜਾਣ ਸਮੇਂ ਮਿਡਫੀਲਡ ਨੂੰ ਪੂਰੀ ਤਰ੍ਹਾਂ ਖਾਲੀ ਛੱਡ ਦਿੱਤਾ ਗਿਆ।”
