ਨਵੀਂ ਦਿੱਲੀ: ਵਿਦੇਸ਼ ਸਕੱਤਰ ਵਿਕਰਮ ਮਿਸਰੀ ਭਲਕੇ ਤੋਂ ਫਰਾਂਸ ਅਤੇ ਜਰਮਨੀ ਦੇ ਤਿੰਨ ਦਿਨਾਂ ਦੌਰੇ ‘ਤੇ ਜਾ ਰਹੇ ਹਨ। ਪੈਰਿਸ ਵਿੱਚ, ਉਹ ਫਰਾਂਸ ਦੇ ਵਿਦੇਸ਼ ਮੰਤਰਾਲੇ ਦੇ ਸਕੱਤਰ-ਜਨਰਲ ਮਾਰਟਿਨ ਬ੍ਰਾਇਨਜ਼ ਦੇ ਨਾਲ ਭਾਰਤ-ਫਰਾਂਸ ਵਿਦੇਸ਼ ਦਫ਼ਤਰ ਸਲਾਹ-ਮਸ਼ਵਰੇ ਦੀ ਸਹਿ-ਪ੍ਰਧਾਨਗੀ ਕਰਨਗੇ।
ਮੀਟਿੰਗ ਵਿੱਚ ਰੱਖਿਆ, ਸਿਵਲ ਪਰਮਾਣੂ ਊਰਜਾ, ਪੁਲਾੜ, ਸਾਈਬਰ ਅਤੇ ਡਿਜੀਟਲ ਖੇਤਰਾਂ, ਨਕਲੀ ਬੁੱਧੀ, ਨਵੀਨਤਾ ਅਤੇ ਸੱਭਿਆਚਾਰਕ ਸਬੰਧਾਂ ਨੂੰ ਉਤਸ਼ਾਹਿਤ ਕਰਨ ‘ਤੇ ਚਰਚਾ ਹੋਵੇਗੀ। ਦੋਵੇਂ ਧਿਰਾਂ ਹਾਲੀਆ ਗਲੋਬਲ ਅਤੇ ਖੇਤਰੀ ਵਿਕਾਸ ‘ਤੇ ਵੀ ਵਿਚਾਰ-ਵਟਾਂਦਰਾ ਕਰਨਗੀਆਂ।
ਬਰਲਿਨ ਵਿੱਚ, ਸ਼੍ਰੀ ਮਿਸਰੀ ਜਰਮਨੀ ਦੇ ਵਿਦੇਸ਼ ਸਕੱਤਰ, ਡਾ. ਗੇਜ਼ਾ ਐਂਡਰੀਆਸ ਵਾਨ ਗੇਅਰ ਨਾਲ ਭਾਰਤ-ਜਰਮਨੀ ਵਿਦੇਸ਼ ਦਫ਼ਤਰ ਸਲਾਹ-ਮਸ਼ਵਰੇ ਦੀ ਸਹਿ-ਪ੍ਰਧਾਨਗੀ ਕਰਨਗੇ। ਇਸ ਮੀਟਿੰਗ ਵਿੱਚ ਵਪਾਰ, ਨਿਵੇਸ਼, ਰੱਖਿਆ ਅਤੇ ਸੁਰੱਖਿਆ, ਤਕਨਾਲੋਜੀ, ਹਰੀ ਊਰਜਾ, ਸਿੱਖਿਆ, ਦੇ ਨਾਲ-ਨਾਲ ਗਲੋਬਲ ਅਤੇ ਖੇਤਰੀ ਮਾਮਲਿਆਂ ਵਰਗੇ ਵਿਸ਼ੇ ਸ਼ਾਮਲ ਹੋਣਗੇ।
ਸ਼੍ਰੀ ਮਿਸਰੀ ਦੇ ਹੋਰ ਪਤਵੰਤਿਆਂ ਨਾਲ ਵੀ ਮੁਲਾਕਾਤਾਂ ਕਰਨ ਦੀ ਉਮੀਦ ਹੈ। ਵਿਦੇਸ਼ ਸਕੱਤਰ ਦੀ ਇਸ ਫੇਰੀ ਨੂੰ ਫਰਾਂਸ ਅਤੇ ਜਰਮਨੀ ਨਾਲ ਭਾਰਤ ਦੇ ਸਬੰਧਾਂ ਨੂੰ ਹੋਰ ਮਜ਼ਬੂਤ ਕਰਨ ਵੱਲ ਇੱਕ ਮਹੱਤਵਪੂਰਨ ਕਦਮ ਮੰਨਿਆ ਜਾ ਰਿਹਾ ਹੈ।
