ਹੈਦਰਾਬਾਦ: ਤੇਲੰਗਾਨਾ ਦੇ ਹੈਦਰਾਬਾਦ ਵਿੱਚ ਫੂਡ ਸੇਫਟੀ ਵਿਭਾਗ ਦੀਆਂ ਟੀਮਾਂ ਵੱਲੋਂ ਰੈਸਟੋਰੈਂਟਾਂ ਅਤੇ ਖਾਣ-ਪੀਣ ਵਾਲੀਆਂ ਥਾਵਾਂ ਦੀ ਜਾਂਚ ਦੌਰਾਨ ਸਫ਼ਾਈ ਨਾਲ ਜੁੜੀਆਂ ਕਈ ਗੰਭੀਰ ਖਾਮੀਆਂ ਸਾਹਮਣੇ ਆਈਆਂ ਹਨ। ਜਾਂਚ ਤੋਂ ਬਾਅਦ ਅੱਠ ਰੈਸਟੋਰੈਂਟਾਂ ਦੇ FSSAI ਲਾਇਸੈਂਸ ਸਸਪੈਂਡ ਕਰਕੇ ਉਨ੍ਹਾਂ ਨੂੰ ਕੰਮ ਬੰਦ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ।
15 ਥਾਵਾਂ ’ਤੇ ਕੀਤੀ ਗਈ ਛਾਪੇਮਾਰੀ
ਜਾਣਕਾਰੀ ਮੁਤਾਬਕ ਫੂਡ ਸੇਫਟੀ ਅਧਿਕਾਰੀਆਂ ਅਤੇ ਪੁਲਿਸ ਦੀਆਂ ਅੱਠ ਟੀਮਾਂ ਨੇ ਹੈਦਰਾਬਾਦ ਦੇ ਵੱਖ-ਵੱਖ ਇਲਾਕਿਆਂ ਵਿੱਚ 15 ਖਾਣ-ਪੀਣ ਵਾਲੀਆਂ ਥਾਵਾਂ ਦੀ ਜਾਂਚ ਕੀਤੀ। ਇਸ ਦੌਰਾਨ ਭੋਜਨ ਦੇ 16 ਸੈਂਪਲ ਇਕੱਠੇ ਕੀਤੇ ਗਏ। ਜਾਂਚ ਦੌਰਾਨ ਕੁਝ ਥਾਵਾਂ ’ਤੇ ਕੀੜੇ-ਮਕੌੜੇ, ਮਿਆਦ ਪੁੱਗਿਆ ਖਾਣਾ, ਗੰਦਗੀ ਅਤੇ ਰਸੋਈ ਵਿੱਚ ਸਫ਼ਾਈ ਦੀ ਘਾਟ ਵਰਗੀਆਂ ਉਲੰਘਣਾਵਾਂ ਦਰਜ ਕੀਤੀਆਂ ਗਈਆਂ।
ਰੈਸਟੋਰੈਂਟ ਵਿੱਚ ਮਿਲਿਆ ਵੱਡੀ ਮਾਤਰਾ ’ਚ ਐਕਸਪਾਇਰਡ ਚੌਲ
ਰਾਇਦੁਰਗ ਇਲਾਕੇ ਦੇ ‘ਪਕਵਾਨ ਗ੍ਰੈਂਡ ਰੈਸਟੋਰੈਂਟ’ ਦੀ ਜਾਂਚ ਦੌਰਾਨ ਅਧਿਕਾਰੀਆਂ ਨੂੰ ਲਗਭਗ 1,170 ਕਿਲੋ ਮਿਆਦ ਪੁੱਗੇ ਚੌਲ ਅਤੇ 45 ਕਿਲੋ ਨੂਡਲਜ਼ ਮਿਲੇ। ਇਨ੍ਹਾਂ ਉਤਪਾਦਾਂ ਦੀ ਲੇਬਲਿੰਗ ਵਿੱਚ ਵੀ ਖਾਮੀਆਂ ਪਾਈਆਂ ਗਈਆਂ। ਇਸ ਤੋਂ ਇਲਾਵਾ ਰੈਸਟੋਰੈਂਟ ਵਿੱਚ ਖਰਾਬ ਅੰਡੇ, ਚੂਹਿਆਂ ਦੀ ਮੌਜੂਦਗੀ ਅਤੇ ਠੀਕ ਢੰਗ ਨਾਲ ਸੰਭਾਲੇ ਨਾ ਗਏ ਰੈਫ੍ਰਿਜਰੇਟਰ ਵੀ ਮਿਲੇ।
ਇੱਕ ਹੋਰ ਰੈਸਟੋਰੈਂਟ ਵਿੱਚ ਚੂਹੇ ਅਤੇ ਕਾਕਰੋਚ ਮਿਲੇ
ਗੱਚੀਬੌਲੀ ਸਥਿਤ ‘ਅਰੋਮਾ ਮਲਟੀ-ਕੁਜ਼ੀਨ ਰੈਸਟੋਰੈਂਟ’ ਦਾ FSSAI ਲਾਇਸੈਂਸ ਵੀ ਸਸਪੈਂਡ ਕੀਤਾ ਗਿਆ ਹੈ। ਜਾਂਚ ਦੌਰਾਨ ਇੱਥੇ ਚੂਹਿਆਂ ਅਤੇ ਕਾਕਰੋਚਾਂ ਦੀ ਮੌਜੂਦਗੀ, ਕੀੜਿਆਂ ਨਾਲ ਦੂਸ਼ਿਤ ਖਾਣਾ ਅਤੇ ਮਿਆਦ ਪੁੱਗੇ ਖੁਰਾਕੀ ਉਤਪਾਦ ਮਿਲਣ ਦੀ ਜਾਣਕਾਰੀ ਸਾਹਮਣੇ ਆਈ। ਇਸ ਤੋਂ ਇਲਾਵਾ ਇੱਥੇ ਪੈਸਟ ਕੰਟਰੋਲ ਨਾਲ ਸਬੰਧਤ ਜ਼ਰੂਰੀ ਰਿਕਾਰਡ ਅਤੇ ਫੂਡ ਹੈਂਡਲਰਾਂ ਦੇ ਸਿਹਤ ਰਿਕਾਰਡ ਵੀ ਮੌਜੂਦ ਨਹੀਂ ਸਨ।
ਕਈ ਹੋਰ ਥਾਵਾਂ ਨੂੰ ਨੋਟਿਸ ਜਾਰੀ ਕਰਨ ਦੀ ਤਿਆਰੀ
ਜਾਂਚ ਵਿੱਚ ਖਾਮੀਆਂ ਮਿਲਣ ਤੋਂ ਬਾਅਦ ‘ਗਰਲ ਫ੍ਰੈਂਡ ਮੰਡੀ’, ‘ਈਟ ਕਲੱਬ ਬ੍ਰਾਂਡਸ’ ਦੇ ‘ਬਾਕਸ 8’ ਅਤੇ ‘ਮੋਜੋ ਪਿਜ਼ਜ਼ਾ’ ਆਊਟਲੈਟ, ‘ਸੀਜ਼ਨਜ਼ ਐਕਸਪ੍ਰੈੱਸ’ ਅਤੇ ‘ਯਮੀ ਬੀ’ ਸਮੇਤ ਕੁਝ ਹੋਰ ਅਦਾਰਿਆਂ ਨੂੰ ਸੁਧਾਰ ਲਈ ਨੋਟਿਸ ਭੇਜਣ ਦੀ ਤਿਆਰੀ ਹੈ।
ਪੁੱਪਲਗੁਡਾ ਸਥਿਤ ‘ਆਸਾ ਨਿਊ ਇੰਡੀਅਨ ਕਿਚਨ’ ਖ਼ਿਲਾਫ਼ ਵੀ ਕਾਰਨ ਦੱਸੋ ਨੋਟਿਸ ਜਾਰੀ ਕਰਨ ਦੀ ਤਜਵੀਜ਼ ਹੈ। ਅਧਿਕਾਰੀਆਂ ਮੁਤਾਬਕ ਭਵਿੱਖ ਵਿੱਚ ਦੁਬਾਰਾ ਨਿਯਮਾਂ ਦੀ ਉਲੰਘਣਾ ਮਿਲਣ ’ਤੇ ਜੁਰਮਾਨੇ ਸਮੇਤ ਹੋਰ ਕਾਰਵਾਈ ਕੀਤੀ ਜਾ ਸਕਦੀ ਹੈ।
ਇਨ੍ਹਾਂ ਥਾਵਾਂ ਦੇ ਲਾਇਸੈਂਸ ਵੀ ਸਸਪੈਂਡ
FSSAI ਲਾਇਸੈਂਸ ਸਸਪੈਂਡ ਕੀਤੇ ਗਏ ਹੋਰ ਅਦਾਰਿਆਂ ਵਿੱਚ ਸਫ਼ੀਲਗੁਡਾ ਦਾ ‘ਆਦਿਤਿਆ ਰੈਸਟੋਰੈਂਟ ਐਂਡ ਬਾਰ’, ਬੇਗਮ ਬਾਜ਼ਾਰ ਦਾ ‘ਵੈਸ਼ਨਵੀ ਦਰਸ਼ਨੀ’, ਕੋਠਾਪੇਟ ਦਾ ‘ਸਪਾਈਸੀ ਹੱਬ’ (ਗ੍ਰੀਨ ਟ੍ਰੀਟ ਰੈਸਟੋਰੈਂਟ), ਹਫ਼ੀਜ਼ਪੇਟ ਦਾ ‘ਗੋਦਾਵਰੀ ਘੁਮਾਘੁਮਾਲੂ’, ਗੋਪਨਪੱਲੀ ਦਾ ‘ਸ਼੍ਰੀ ਕ੍ਰਿਸ਼ਨਾ ਫੈਮਿਲੀ ਢਾਬਾ ਪਿਊਰ ਵੈਜ’ ਅਤੇ ਕੋਂਡਾਪੁਰ ਦਾ ‘ਸ਼੍ਰੀ ਸਾਈ ਮੇਸ’ ਸ਼ਾਮਲ ਹਨ।
ਅਧਿਕਾਰੀਆਂ ਵੱਲੋਂ ਕਿਹਾ ਗਿਆ ਹੈ ਕਿ ਖਾਣ-ਪੀਣ ਵਾਲੇ ਅਦਾਰਿਆਂ ਵਿੱਚ ਸਫ਼ਾਈ ਅਤੇ ਫੂਡ ਸੇਫਟੀ ਦੇ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣ ਲਈ ਜਾਂਚ ਮੁਹਿੰਮ ਜਾਰੀ ਰਹੇਗੀ।
