ਚੰਡੀਗੜ੍ਹ: ਨਕਲੀ ਇਮੀਗ੍ਰੇਸ਼ਨ ਕਾਰੋਬਾਰ ਚਲਾਉਣ ਵਾਲੀਆਂ ਕੰਪਨੀਆਂ ਵਿਰੁੱਧ ਈ.ਡੀ ਵੱਲੋਂ ਕਾਰਵਾਈ ਦੀ ਖ਼ਬਰ ਸਾਹਮਣੇ ਆਈ ਹੈ। ਜਾਣਕਾਰੀ ਅਨੁਸਾਰ, ਈ.ਡੀ ਦੀ ਟੀਮ ਨੇ ਸੈਕਟਰ-22ਸੀ, ਸੈਕਟਰ-34ਏ ਅਤੇ ਸੈਕਟਰ-44ਸੀ ਵਿੱਚ ਸਥਿਤ ਕਈ ਇਮੀਗ੍ਰੇਸ਼ਨ ਦਫ਼ਤਰਾਂ ‘ਤੇ ਛਾਪੇਮਾਰੀ ਕੀਤੀ ਹੈ। ਇਨ੍ਹਾਂ ਕੰਪਨੀਆਂ ‘ਤੇ ਵਿਦਿਆਰਥੀ ਵੀਜ਼ਾ ਦੇ ਨਾਮ ‘ਤੇ ਨੌਜਵਾਨਾਂ ਨੂੰ ਅਮਰੀਕਾ ਭੇਜਣ ਦੇ ਬਹਾਨੇ ਧੋਖਾਧੜੀ ਕਰਨ ਦੇ ਦੋਸ਼ ਹਨ।
ਛਾਪੇਮਾਰੀ ਦੌਰਾਨ ਅਧਿਕਾਰੀਆਂ ਨੂੰ ਕਈ ਜਾਅਲੀ ਦਸਤਾਵੇਜ਼ ਮਿਲੇ ਹਨ, ਜਿਨ੍ਹਾਂ ਦੀ ਵਰਤੋਂ ਵਿਦੇਸ਼ ਭੇਜਣ ਦੀ ਪ੍ਰਕਿਰਿਆ ਵਿੱਚ ਕੀਤੀ ਜਾ ਰਹੀ ਸੀ। ਜਾਂਚ ਵਿੱਚ ਖੁਲਾਸਾ ਹੋਇਆ ਹੈ ਕਿ ਇਹ ਕੰਪਨੀਆਂ ਵਿਦੇਸ਼ਾਂ ਵਿੱਚ ਸੈੱਲ ਕੰਪਨੀਆਂ ਬਣਾ ਕੇ ਭੁਗਤਾਨ ਗੇਟਵੇ ਰਾਹੀਂ ਵਿਦੇਸ਼ੀ ਨਾਗਰਿਕਾਂ ਤੋਂ ਪੈਸੇ ਇਕੱਠੇ ਕਰ ਰਹੀਆਂ ਸਨ। ਇਹ ਰਕਮ ਬੈਂਕਾਂ ਰਾਹੀਂ ਜਾਂ ਹਵਾਲਾ ਨੈੱਟਵਰਕ ਰਾਹੀਂ ਭਾਰਤ ਭੇਜੀ ਜਾਂਦੀ ਸੀ।
ਈ.ਡੀ ਨੂੰ ਇਕ ਕੰਪਨੀ ਵੀ ਮਿਲੀ ਹੈ ਜੋ ਅਮਰੀਕਾ ਵਿੱਚ FSAL ਤਕਨਾਲੋਜੀ ਦੇ ਨਾਮ ਹੇਠ ਚੱਲ ਰਹੀ ਸੀ। ਇਹ ਕੰਪਨੀ ਅਸਲ ਵਿੱਚ “geeksworldwidesolutions.com” ਨਾਮ ਦੀ ਇਕ ਜਾਅਲੀ ਵੈੱਬਸਾਈਟ ਚਲਾ ਰਹੀ ਸੀ, ਜੋ ਕਿ ਅਮਰੀਕਾ ਦੀ ਮਸ਼ਹੂਰ ਤਕਨਾਲੋਜੀ ਕੰਪਨੀ ‘ਗੀਕ ਸਕੁਐਡ’ ਦੀ ਕਾਪੀ ਸੀ। ਇਸ ਜਾਅਲੀ ਵੈੱਬਸਾਈਟ ਰਾਹੀਂ, ਤਕਨੀਕੀ ਸਹਾਇਤਾ ਦਾ ਵਾਅਦਾ ਕਰਕੇ ਵਿਦੇਸ਼ੀ ਗਾਹਕਾਂ ਤੋਂ ਪੈਸੇ ਵਸੂਲੇ ਜਾ ਰਹੇ ਸਨ। ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ FSAL ਤਕਨਾਲੋਜੀ ਵੈੱਬਸਾਈਟ ਅਤੇ ਨਕਲੀ ਗੀਕ ਸਕੁਐਡ ਵੈੱਬਸਾਈਟ ਇਕੋ ਸਰਵਰ ‘ਤੇ ਹੋਸਟ ਕੀਤੀਆਂ ਗਈਆਂ ਸਨ, ਜੋ ਉਨ੍ਹਾਂ ਦੇ ਆਪਸੀ ਸਬੰਧ ਦੀ ਪੁਸ਼ਟੀ ਕਰਦਾ ਹੈ।
