ਦੇਹਰਾਦੂਨ: ਉੱਤਰਾਖੰਡ ਦੀ ਰਾਜਧਾਨੀ ਦੇਹਰਾਦੂਨ ਵਿੱਚ ਇੱਕ ਦਰਦਨਾਕ ਸੜਕ ਹਾਦਸੇ ਨੇ ਇੱਕ ਪਰਿਵਾਰ ਦੀਆਂ ਖੁਸ਼ੀਆਂ ਉਜਾੜ ਦਿੱਤੀਆਂ। ਮੋਹੱਬੇਵਾਲਾ ਇਲਾਕੇ ਵਿੱਚ ਖਾਦ ਨਾਲ ਲੱਦਿਆ ਇੱਕ ਓਵਰਲੋਡ ਕੰਟੇਨਰ ਅਚਾਨਕ ਕਾਰ ਉੱਤੇ ਪਲਟ ਗਿਆ। ਇਸ ਹਾਦਸੇ ਵਿੱਚ ਇੱਕੋ ਪਰਿਵਾਰ ਦੇ ਤਿੰਨ ਜੀਆਂ ਸਮੇਤ ਚਾਰ ਲੋਕਾਂ ਦੀ ਮੌਤ ਹੋ ਗਈ, ਜਦਕਿ ਕਾਰ ਵਿੱਚ ਸਵਾਰ ਛੇ ਸਾਲਾ ਮਾਸੂਮ ਬੱਚਾ ਸੁਰੱਖਿਅਤ ਬਚ ਗਿਆ।
ਮ੍ਰਿਤਕਾਂ ਦੀ ਪਛਾਣ ਸਹਾਰਨਪੁਰ ਦੀ ਗੋਕੁਲ ਧਾਮ ਕਾਲੋਨੀ ਦੇ ਰਹਿਣ ਵਾਲੇ ਵਿਸ਼ੇਸ਼ ਕਪੂਰ (38), ਉਨ੍ਹਾਂ ਦੀ ਮਾਤਾ ਕਿਰਨ ਕਪੂਰ (63), ਪਤਨੀ ਨਿਸ਼ਾ ਕਪੂਰ (38) ਅਤੇ ਕਾਰ ਚਾਲਕ ਨੀਰਜ ਵਜੋਂ ਹੋਈ ਹੈ। ਇਸ ਹਾਦਸੇ ਵਿੱਚ ਵਿਸ਼ੇਸ਼ ਕਪੂਰ ਦਾ ਛੇ ਸਾਲਾ ਪੁੱਤਰ ਮਾਹੇਰ ਕਪੂਰ ਵਾਲ-ਵਾਲ ਬਚ ਗਿਆ।
ਜਾਣਕਾਰੀ ਅਨੁਸਾਰ ਵਿਸ਼ੇਸ਼ ਕਪੂਰ ਆਪਣੀ ਮਾਤਾ, ਪਤਨੀ ਅਤੇ ਪੁੱਤਰ ਨਾਲ ਦੇਹਰਾਦੂਨ ਵਿੱਚ ਰਹਿੰਦੇ ਆਪਣੇ ਛੋਟੇ ਭਰਾ ਦੀਪੇਸ਼ ਕਪੂਰ ਦੇ ਘਰ ਜਾ ਰਹੇ ਸਨ। ਇਸੇ ਦੌਰਾਨ ਮੋਹੱਬੇਵਾਲਾ ਇਲਾਕੇ ਵਿੱਚ ਖਾਦ ਨਾਲ ਭਰਿਆ ਭਾਰੀ ਕੰਟੇਨਰ ਉਨ੍ਹਾਂ ਦੀ ਕਾਰ ਉੱਤੇ ਪਲਟ ਗਿਆ। ਕੰਟੇਨਰ ਹੇਠਾਂ ਆਉਣ ਕਾਰਨ ਕਾਰ ਪੂਰੀ ਤਰ੍ਹਾਂ ਦੱਬ ਗਈ ਅਤੇ ਅੰਦਰ ਸਵਾਰ ਲੋਕ ਫਸ ਗਏ।
ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਪੁਲਸ, ਫਾਇਰ ਸਰਵਿਸ ਅਤੇ ਬਚਾਅ ਟੀਮਾਂ ਮੌਕੇ ’ਤੇ ਪਹੁੰਚ ਗਈਆਂ। ਕੰਟੇਨਰ ਦਾ ਭਾਰ ਜ਼ਿਆਦਾ ਹੋਣ ਕਾਰਨ ਰਾਹਤ ਕਾਰਜਾਂ ਵਿੱਚ ਕਾਫ਼ੀ ਮੁਸ਼ਕਲ ਆਈ। ਇਸ ਤੋਂ ਬਾਅਦ ਗੈਸ ਕਟਰ ਦੀ ਮਦਦ ਨਾਲ ਕਾਰ ਦੇ ਦਰਵਾਜ਼ੇ ਅਤੇ ਹੋਰ ਹਿੱਸੇ ਕੱਟ ਕੇ ਅੰਦਰ ਫਸੇ ਲੋਕਾਂ ਨੂੰ ਬਾਹਰ ਕੱਢਿਆ ਗਿਆ। ਇਸ ਦੌਰਾਨ ਛੇ ਸਾਲਾ ਮਾਹੇਰ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ, ਪਰ ਚਾਰ ਲੋਕਾਂ ਦੀ ਜਾਨ ਨਹੀਂ ਬਚ ਸਕੀ।
ਉੱਧਰ, ਹਾਦਸੇ ਦੀ ਖ਼ਬਰ ਸਹਾਰਨਪੁਰ ਵਿੱਚ ਪਰਿਵਾਰ ਦੇ ਘਰ ਪਹੁੰਚਦਿਆਂ ਹੀ ਸੋਗ ਦੀ ਲਹਿਰ ਦੌੜ ਗਈ। ਪੂਰੀ ਕਾਲੋਨੀ ਵਿੱਚ ਮਾਤਮ ਛਾ ਗਿਆ ਅਤੇ ਪਰਿਵਾਰਕ ਮੈਂਬਰਾਂ ਦਾ ਰੋ-ਰੋ ਕੇ ਬੁਰਾ ਹਾਲ ਹੈ।
