ਮੁੰਬਈ : ਮੁੰਬਈ ਦੀਆਂ ਸੜਕਾਂ ‘ਤੇ ਇਕ ਵਿਅਕਤੀ ਹੱਥ ‘ਚ ਕਟੋਰਾ ਲੈ ਕੇ ਲੋਕਾਂ ਦੇ ਸਾਹਮਣੇ ਹੱਥ ਫੈਲਾ ਰਿਹਾ ਸੀ। ਉਸਦੇ ਕੱਪੜੇ ਫਟੇ ਹੋਏ ਅਤੇ ਪੁਰਾਣੇ ਸਨ, ਉਸਦੇ ਚਿਹਰੇ ‘ਤੇ ਬੇਵਸੀ ਦੀ ਭਾਵਨਾ ਸੀ ਅਤੇ ਲੋਕ ਉਸਨੂੰ ਇੱਕ ਆਮ ਭਿਖਾਰੀ ਸਮਝ ਕੇ ਅੱਗੇ ਵਧ ਰਹੇ ਸਨ। ਕਿਸੇ ਨੇ ਪੈਸੇ ਦਿੱਤੇ ਤੇ ਕਿਸੇ ਨੇ ਖਾਣ-ਪੀਣ ਦੀਆਂ ਚੀਜ਼ਾਂ ਦਿੱਤੀਆਂ। ਪਰ ਕਿਸੇ ਨੂੰ ਇਹ ਨਹੀਂ ਪਤਾ ਸੀ ਕਿ ਜਿਸ ਵਿਅਕਤੀ ਨੂੰ ਉਹ ਭਿਖਾਰੀ ਸਮਝ ਰਹੇ ਸਨ, ਉਹ ਘਾਟਕੋਪਰ ਪੂਰਬੀ ਤੋਂ ਭਾਜਪਾ ਵਿਧਾਇਕ ਪਰਾਗ ਸ਼ਾਹ ਹਨ , ਜਿਨ੍ਹਾਂ ਦੀ ਜਾਇਦਾਦ ਹਜ਼ਾਰਾਂ ਕਰੋੜ ਰੁਪਏ ਦੱਸੀ ਜਾਂਦੀ ਹੈ। ਦਰਅਸਲ, ਇਹ ਉਨ੍ਹਾਂ ਦਾ ਅਧਿਆਤਮਿਕ ਅਨੁਭਵ ਸੀ, ਜਿਸ ਦੇ ਤਹਿਤ ਉਨ੍ਹਾਂ ਨੇ ਇੱਕ ਦਿਨ ਲਈ ਆਪਣਾ ਸਾਰਾ ਅਹੁਦਾ, ਪੈਸਾ ਅਤੇ ਪ੍ਰਭਾਵ ਛੱਡ ਦਿੱਤਾ।
ਗੁਰੂ ਜੀ ਨੇ ਭਿਖਾਰੀ ਬਣਨ ਦਾ ਦਿੱਤਾ ਹੁਕਮ
ਜੈਨ ਧਰਮ ਦੇ ਚਤੁਰਮਾਸ ਦੌਰਾਨ, ਆਤਮ-ਸਾਧਨਾ ਅਤੇ ਆਤਮ ਮੰਥਨ ਦਾ ਦੌਰ ਚੱਲ ਰਿਹਾ ਹੈ। ਇਸ ਦੌਰਾਨ ਪਰਾਗ ਸ਼ਾਹ ਦੇ ਅਧਿਆਤਮਿਕ ਗੁਰੂ ਰਾਸ਼ਟਰਸੰਤ ਪੂਜਯ ਨਮਰਾਮੁਨੀ ਮਹਾਰਾਜ ਨੇ ਉਨ੍ਹਾਂ ਨੂੰ ਹਉਮੈ ਅਤੇ ਪਦਾਰਥਕ ਸੁੱਖਾਂ ਤੋਂ ਬਾਹਰ ਆ ਕੇ ਜੀਵਨ ਨੂੰ ਵੱਖਰੇ ਨਜ਼ਰੀਏ ਤੋਂ ਦੇਖਣ ਦਾ ਸੰਦੇਸ਼ ਦਿੱਤਾ। ਗੁਰੂ ਜੀ ਨੇ ਉਨ੍ਹਾਂ ਨੂੰ ਇੱਕ ਦਿਨ ਲਈ ਇੱਕ ਆਮ ਭਿਖਾਰੀ ਵਾਂਗ ਰਹਿਣ ਲਈ ਕਿਹਾ।
ਪਰਾਗ ਸ਼ਾਹ ਨੇ ਗੁਰੂ ਜੀ ਦੀ ਇਸ ਸਿੱਖਿਆ ਨੂੰ ਸਵੀਕਾਰ ਕਰ ਲਿਆ। ਉਹ ਆਪਣੀ ਸੁਰੱਖਿਆ, ਲਗਜ਼ਰੀ ਕਾਰਾਂ, ਮਹਿੰਗੇ ਕੱਪੜੇ ਅਤੇ ਹੋਰ ਸਹੂਲਤਾਂ ਪਿੱਛੇ ਛੱਡ ਗਏ। ਇਸ ਤੋਂ ਬਾਅਦ ਉਹ ਮੇਕਅੱਪ ਰਾਹੀਂ ਆਪਣਾ ਰੂਪ ਬਦਲ ਕੇ ਫਟੇ-ਫਟੇ ਕੱਪੜਿਆਂ ‘ਚ ਘਾਟਕੋਪਰ ਦੀਆਂ ਸੜਕਾਂ ‘ਤੇ ਨਿਕਲ ਗਏ।
ਰਾਹਗੀਰਾਂ ਅੱਗੇ ਵਧਾਇਆ ਹੱਥ
ਜਿਸ ਇਲਾਕੇ ਵਿਚ ਲੋਕ ਆਮ ਤੌਰ ‘ਤੇ ਵਿਧਾਇਕ ਨੂੰ ਮਿਲਣ ਅਤੇ ਆਪਣੀਆਂ ਸਮੱਸਿਆਵਾਂ ਦੱਸਣ ਲਈ ਆਉਂਦੇ ਹਨ, ਉਥੇ ਪਰਾਗ ਸ਼ਾਹ ਖੁਦ ਰਾਹਗੀਰਾਂ ਦੇ ਸਾਹਮਣੇ ਹੱਥ ਪਸਾਰ ਕੇ ਖੜ੍ਹੇ ਸਨ । ਉਨ੍ਹਾਂ ਨੇ ਲੋਕਾਂ ਤੋਂ ਮਦਦ ਮੰਗੀ ਅਤੇ ਘੰਟਿਆਂ ਬੱਧੀ ਸੜਕ ‘ਤੇ ਬਿਤਾਇਆ। ਕਿਸੇ ਨੇ ਉਨ੍ਹਾਂ ਨੂੰ ਪੈਸੇ ਦਿੱਤੇ ਤੇ ਕਿਸੇ ਨੇ ਖਾਣ-ਪੀਣ ਦੀਆਂ ਚੀਜ਼ਾਂ ਦਿੱਤੀਆਂ। ਕੁਝ ਲੋਕਾਂ ਨੇ ਉਨ੍ਹਾਂ ਨੂੰ ਨਜ਼ਰਅੰਦਾਜ਼ ਕੀਤਾ, ਜਦਕਿ ਕੁਝ ਨੇ ਉਨ੍ਹਾਂ ਨੂੰ ਝਿੜਕਿਆ।
ਸਭ ਤੋਂ ਖਾਸ ਗੱਲ ਇਹ ਸੀ ਕਿ ਇਸ ਦੌਰਾਨ ਜ਼ਿਆਦਾਤਰ ਲੋਕ ਉਨ੍ਹਾਂ ਨੂੰ ਪਛਾਣ ਨਹੀਂ ਸਕੇ। ਜਦੋਂ ਹਜ਼ਾਰਾਂ ਕਰੋੜਾਂ ਦੀ ਜਾਇਦਾਦ ਵਾਲੇ ਵਿਧਾਇਕ ਆਮ ਆਦਮੀ ਵਾਂਗ ਸੜਕ ‘ਤੇ ਖੜ੍ਹੇ ਸਨ ਤਾਂ ਉਨ੍ਹਾਂ ਨਾਲ ਨਾ ਤਾਂ ਕੋਈ ਸੁਰੱਖਿਆ ਘੇਰਾ ਸੀ ਅਤੇ ਨਾ ਹੀ ਲਗਜ਼ਰੀ ਗੱਡੀਆਂ ਦਾ ਕਾਫਲਾ।
