Bigg Boss 20: ਬਾਦਸ਼ਾਹ ਦੀ ਪਤਨੀ ਈਸ਼ਾ ਰਿਖੀ ਹੋਈ ਭਾਵੁਕ, ਸਲਮਾਨ ਖਾਨ ਨੇ ਦਿੱਤੀ ਅੱਗੇ ਵਧਣ ਦੀ ਸਲਾਹ

ਮੁੰਬਈ: ਰੈਪਰ ਬਾਦਸ਼ਾਹ ਦੀ ਸਾਬਕਾ ਪਤਨੀ ਈਸ਼ਾ ਰਿਖੀ ਨੇ ‘Bigg Boss 20’ ਵਿੱਚ ਐਂਟਰੀ ਕਰ ਲਈ ਹੈ। ਉਨ੍ਹਾਂ ਦੀ ਇਹ ਐਂਟਰੀ ਬਾਦਸ਼ਾਹ ਨਾਲ ਵਿਆਹ ਖ਼ਤਮ ਹੋਣ ਦੇ ਐਲਾਨ ਤੋਂ ਕੁਝ ਹੀ ਦਿਨਾਂ ਬਾਅਦ ਹੋਈ ਹੈ। 31 ਅਗਸਤ ਨੂੰ ਬਾਦਸ਼ਾਹ ਅਤੇ ਈਸ਼ਾ ਰਿਖੀ ਨੇ ਸੋਸ਼ਲ ਮੀਡੀਆ ਰਾਹੀਂ ਆਪਣੇ ਪੰਜ ਮਹੀਨੇ ਦੇ ਵਿਆਹ ਨੂੰ ਖ਼ਤਮ ਕਰਨ ਦਾ ਐਲਾਨ ਕੀਤਾ ਸੀ।

ਹੁਣ ‘Bigg Boss 20’ ਦੇ ਗ੍ਰੈਂਡ ਪ੍ਰੀਮੀਅਰ ਦੌਰਾਨ ਈਸ਼ਾ ਆਪਣੀ ਨਿੱਜੀ ਜ਼ਿੰਦਗੀ ਬਾਰੇ ਗੱਲ ਕਰਦਿਆਂ ਭਾਵੁਕ ਨਜ਼ਰ ਆਈ। ਇਸ ਦੌਰਾਨ ਸ਼ੋਅ ਦੇ ਹੋਸਟ ਸਲਮਾਨ ਖਾਨ ਨੇ ਉਨ੍ਹਾਂ ਨੂੰ ਅਤੀਤ ਨੂੰ ਪਿੱਛੇ ਛੱਡ ਕੇ ਆਪਣੀ ਜ਼ਿੰਦਗੀ ਵਿੱਚ ਅੱਗੇ ਵਧਣ ਦੀ ਸਲਾਹ ਦਿੱਤੀ।

ਬਾਦਸ਼ਾਹ ਤੋਂ ਵੱਖ ਹੋਣ ਤੋਂ ਬਾਅਦ ਭਾਵੁਕ ਹੋਈ ਈਸ਼ਾ ਰਿਖੀ

ਸ਼ੋਅ ਵਿੱਚ ਆਪਣੇ ਇੰਟਰੋਡਕਸ਼ਨ ਦੌਰਾਨ ਈਸ਼ਾ ਰਿਖੀ ਨੇ ਆਪਣੀ ਜ਼ਿੰਦਗੀ ਦੇ ਉਸ ਦੌਰ ਨੂੰ ਯਾਦ ਕੀਤਾ, ਜਦੋਂ ਉਹ ਬਾਲੀਵੁੱਡ ਅਤੇ ਪੰਜਾਬੀ ਸਿਨੇਮਾ ਵਿੱਚ ਕੰਮ ਕਰ ਰਹੀ ਸੀ। ਉਨ੍ਹਾਂ ਮੁਤਾਬਕ ਉਹ ਸਮਾਂ ਉਨ੍ਹਾਂ ਦੀ ਜ਼ਿੰਦਗੀ ਦੇ ਸਭ ਤੋਂ ਚੰਗੇ ਦੌਰਾਂ ਵਿੱਚੋਂ ਇੱਕ ਸੀ।

ਇਸ ਤੋਂ ਬਾਅਦ ਉਨ੍ਹਾਂ ਦੀ ਜ਼ਿੰਦਗੀ ਵਿੱਚ ਪਿਆਰ ਆਇਆ ਅਤੇ ਉਨ੍ਹਾਂ ਨੇ ਵਿਆਹ ਕਰਕੇ ਸੈਟਲ ਹੋਣ ਦਾ ਫ਼ੈਸਲਾ ਕੀਤਾ। ਹਾਲਾਂਕਿ, ਉਨ੍ਹਾਂ ਨੇ ਕਿਹਾ ਕਿ ਕੁਝ ਤਜਰਬੇ ਇਨਸਾਨ ਨੂੰ ਅੰਦਰੋਂ ਬਦਲ ਦਿੰਦੇ ਹਨ।

ਈਸ਼ਾ ਨੇ ਕਿਹਾ ਕਿ ਭਰੋਸਾ ਟੁੱਟਣ ਤੋਂ ਬਾਅਦ ਇਨਸਾਨ ਕਈ ਵਾਰ ਆਪਣੇ ਆਪ ਤੋਂ ਸਵਾਲ ਕਰਨ ਲੱਗਦਾ ਹੈ ਕਿ ਆਖ਼ਿਰ ਗਲਤੀ ਕਿੱਥੇ ਹੋਈ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਇੱਕ ਸਮੇਂ ਉਨ੍ਹਾਂ ਨੂੰ ਮਹਿਸੂਸ ਹੋਇਆ ਕਿ ਉਹ ਆਪਣੀ ਹੀ ਕਹਾਣੀ ਵਿੱਚ ਇੱਕ ਸਾਈਡ ਕੈਰੈਕਟਰ ਬਣ ਗਈਆਂ ਹਨ।

Bigg Boss 20 ਵਿੱਚ ਆਪਣੀ ਪਛਾਣ ਬਣਾਉਣਾ ਚਾਹੁੰਦੀ ਹੈ ਈਸ਼ਾ

ਈਸ਼ਾ ਰਿਖੀ ਨੇ ਕਿਹਾ ਕਿ ਉਹ ‘Bigg Boss 20’ ਵਿੱਚ ਆਪਣੀ ਜ਼ਿੰਦਗੀ ਦੇ ਮੁਸ਼ਕਲ ਦੌਰ ਤੋਂ ਬਾਹਰ ਨਿਕਲਣ ਅਤੇ ਆਪਣੀ ਵੱਖਰੀ ਪਛਾਣ ਬਣਾਉਣ ਲਈ ਆਈ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਉਹ ਸ਼ੋਅ ਤੋਂ ਸਿਰਫ਼ ਹਿੱਸਾ ਲੈ ਕੇ ਵਾਪਸ ਨਹੀਂ ਜਾਣਾ ਚਾਹੁੰਦੀ, ਸਗੋਂ ਉਨ੍ਹਾਂ ਦਾ ਟੀਚਾ ਜੇਤੂ ਬਣ ਕੇ ਬਾਹਰ ਆਉਣਾ ਹੈ।

ਸਲਮਾਨ ਖਾਨ ਨੇ ਦਿੱਤੀ ਅੱਗੇ ਵਧਣ ਦੀ ਸਲਾਹ

ਗ੍ਰੈਂਡ ਪ੍ਰੀਮੀਅਰ ਦੌਰਾਨ ਜਦੋਂ ਈਸ਼ਾ ਰਿਖੀ ਸਲਮਾਨ ਖਾਨ ਨੂੰ ਮਿਲੀ ਤਾਂ ਹੋਸਟ ਨੇ ਉਨ੍ਹਾਂ ਦੀ ਹਿੰਮਤ ਦੀ ਤਾਰੀਫ਼ ਕੀਤੀ। ਸਲਮਾਨ ਨੇ ਕਿਹਾ ਕਿ ਨਿੱਜੀ ਮਸਲਿਆਂ ਨੂੰ ਨਿੱਜੀ ਹੀ ਰੱਖਣਾ ਚਾਹੀਦਾ ਹੈ ਅਤੇ ਹੁਣ ਈਸ਼ਾ ਨੂੰ ਆਪਣੇ ਮੌਜੂਦਾ ਸਮੇਂ ਅਤੇ ਮੁਕਾਬਲੇ ‘ਤੇ ਧਿਆਨ ਦੇਣਾ ਚਾਹੀਦਾ ਹੈ।

ਸਲਮਾਨ ਨੇ ਉਨ੍ਹਾਂ ਨੂੰ ਅਤੀਤ ਵਿੱਚ ਫਸੇ ਰਹਿਣ ਦੀ ਬਜਾਏ ਆਪਣੀ ਮੌਜੂਦਾ ਜ਼ਿੰਦਗੀ ‘ਤੇ ਧਿਆਨ ਦੇਣ ਅਤੇ ‘Bigg Boss 20’ ਦੇ ਮੁਕਾਬਲੇਬਾਜ਼ਾਂ ‘ਤੇ ਫੋਕਸ ਕਰਨ ਦੀ ਸਲਾਹ ਦਿੱਤੀ।

ਹੁਣ ਦੇਖਣਾ ਦਿਲਚਸਪ ਹੋਵੇਗਾ ਕਿ ਈਸ਼ਾ ਰਿਖੀ ‘Bigg Boss 20’ ਦੇ ਘਰ ਵਿੱਚ ਆਪਣੀ ਨਵੀਂ ਪਛਾਣ ਬਣਾਉਣ ਵਿੱਚ ਕਿੰਨੀ ਕਾਮਯਾਬ ਰਹਿੰਦੀ ਹੈ।