ਅਟਲਾਂਟਾ: ਮੌਜੂਦਾ ਚੈਂਪੀਅਨ ਅਰਜਨਟੀਨਾ ਨੇ ਸ਼ਾਨਦਾਰ ਵਾਪਸੀ ਕਰਦਿਆਂ ਫੀਫਾ ਵਿਸ਼ਵ ਕੱਪ ਦੇ ਸੈਮੀਫਾਈਨਲ ਵਿੱਚ ਇੰਗਲੈਂਡ ਨੂੰ 2-1 ਨਾਲ ਹਰਾਕੇ ਲਗਾਤਾਰ ਦੂਜੀ ਵਾਰ ਫਾਈਨਲ ਵਿੱਚ ਆਪਣੀ ਜਗ੍ਹਾ ਪੱਕੀ ਕਰ ਲਈ ਹੈ। ਲਿਓਨਲ ਮੇਸੀ ਦੀ ਅਗਵਾਈ ਵਾਲੀ ਟੀਮ ਨੇ ਮੈਚ ਦੇ ਆਖਰੀ ਪਲਾਂ ਵਿੱਚ ਦੋ ਗੋਲ ਕਰਕੇ ਹਾਰ ਨੂੰ ਯਾਦਗਾਰ ਜਿੱਤ ਵਿੱਚ ਬਦਲ ਦਿੱਤਾ।
ਅਟਲਾਂਟਾ ਵਿੱਚ ਖੇਡੇ ਗਏ ਰੋਮਾਂਚਕ ਸੈਮੀਫਾਈਨਲ ਵਿੱਚ ਇੰਗਲੈਂਡ ਨੇ 55ਵੇਂ ਮਿੰਟ ਵਿੱਚ ਐਂਥਨੀ ਗੋਰਡਨ ਦੇ ਗੋਲ ਦੀ ਬਦੌਲਤ 1-0 ਦੀ ਬੜ੍ਹਤ ਹਾਸਲ ਕਰ ਲਈ ਸੀ। ਇਸ ਤੋਂ ਬਾਅਦ ਲੰਬੇ ਸਮੇਂ ਤੱਕ ਇੰਗਲੈਂਡ ਦਾ ਦਬਦਬਾ ਬਣਿਆ ਰਿਹਾ ਅਤੇ ਟੀਮ ਫਾਈਨਲ ਦੇ ਬਹੁਤ ਨੇੜੇ ਦਿਖਾਈ ਦੇ ਰਹੀ ਸੀ। ਪਰ ਅਰਜਨਟੀਨਾ ਨੇ ਆਖਰੀ ਮਿੰਟਾਂ ਵਿੱਚ ਜ਼ਬਰਦਸਤ ਖੇਡ ਦਿਖਾਈ ਅਤੇ ਮੈਚ ਦਾ ਰੁਖ ਬਦਲ ਦਿੱਤਾ।
ਮੈਚ ਦੇ 85ਵੇਂ ਮਿੰਟ ਵਿੱਚ ਐਂਜ਼ੋ ਫਰਨਾਂਡੇਜ਼ ਨੇ ਲਿਓਨਲ ਮੇਸੀ ਦੇ ਪਾਸ ‘ਤੇ ਕਰੀਬ 25 ਗਜ਼ ਦੀ ਦੂਰੀ ਤੋਂ ਸ਼ਾਨਦਾਰ ਗੋਲ ਕਰਕੇ ਸਕੋਰ 1-1 ਨਾਲ ਬਰਾਬਰ ਕਰ ਦਿੱਤਾ। ਇਸ ਗੋਲ ਨੇ ਅਰਜਨਟੀਨਾ ਦੇ ਖਿਡਾਰੀਆਂ ਅਤੇ ਸਮਰਥਕਾਂ ਵਿੱਚ ਨਵਾਂ ਜੋਸ਼ ਭਰ ਦਿੱਤਾ। ਇਸ ਤੋਂ ਬਾਅਦ ਇੰਜਰੀ ਟਾਈਮ ਦੇ ਦੂਜੇ ਮਿੰਟ ਵਿੱਚ ਬਦਲਵੇਂ ਖਿਡਾਰੀ ਲੌਟਾਰੋ ਮਾਰਟੀਨੇਜ਼ ਨੇ ਮੇਸੀ ਦੇ ਕਰਾਸ ‘ਤੇ ਸ਼ਾਨਦਾਰ ਹੈਡਰ ਲਗਾ ਕੇ ਟੀਮ ਨੂੰ 2-1 ਦੀ ਅਹਿਮ ਜਿੱਤ ਦਿਵਾਈ।
ਲਿਓਨਲ ਮੇਸੀ ਨੇ ਭਾਵੇਂ ਖੁਦ ਗੋਲ ਨਹੀਂ ਕੀਤਾ, ਪਰ ਦੋਵੇਂ ਗੋਲਾਂ ਦੀ ਨੀਂਹ ਰੱਖਣ ਵਿੱਚ ਅਹਿਮ ਭੂਮਿਕਾ ਨਿਭਾਈ। ਉਨ੍ਹਾਂ ਦੀ ਖੇਡ ਸਮਝ ਅਤੇ ਸਟੀਕ ਪਾਸਿੰਗ ਨੇ ਇਕ ਵਾਰ ਫਿਰ ਸਾਬਤ ਕਰ ਦਿੱਤਾ ਕਿ ਉਹ ਅਜੇ ਵੀ ਵਿਸ਼ਵ ਫੁੱਟਬਾਲ ਦੇ ਸਭ ਤੋਂ ਪ੍ਰਭਾਵਸ਼ਾਲੀ ਖਿਡਾਰੀਆਂ ਵਿੱਚੋਂ ਇੱਕ ਹਨ।
ਇਸ ਜਿੱਤ ਨਾਲ ਅਰਜਨਟੀਨਾ ਹੁਣ 19 ਜੁਲਾਈ ਨੂੰ ਹੋਣ ਵਾਲੇ ਫਾਈਨਲ ਵਿੱਚ ਸਪੇਨ ਦਾ ਸਾਹਮਣਾ ਕਰੇਗਾ। ਫੁੱਟਬਾਲ ਪ੍ਰੇਮੀਆਂ ਨੂੰ ਇਸ ਮੁਕਾਬਲੇ ਤੋਂ ਇੱਕ ਹੋਰ ਉੱਚ ਪੱਧਰੀ ਅਤੇ ਰੋਮਾਂਚਕ ਫਾਈਨਲ ਦੀ ਉਮੀਦ ਹੈ।
ਹਾਲਾਂਕਿ ਮੈਚ ਤੋਂ ਬਾਅਦ ਇੱਕ ਹੋਰ ਮਾਮਲੇ ਨੇ ਸੁਰਖੀਆਂ ਬਟੋਰੀਆਂ। ਜਿੱਤ ਦੇ ਜਸ਼ਨ ਦੌਰਾਨ ਕੁਝ ਅਰਜਨਟੀਨੀ ਖਿਡਾਰੀਆਂ ਅਤੇ ਸਮਰਥਕਾਂ ਨੇ “ਲਾਸ ਮਾਲਵਿਨਸ ਸੋਨ ਅਰਜਨਟੀਨਾ” ਲਿਖਿਆ ਬੈਨਰ ਲਹਿਰਾਇਆ। ਇਹ ਫਾਕਲੈਂਡ ਟਾਪੂਆਂ (ਮਾਲਵਿਨਸ) ਨੂੰ ਲੈ ਕੇ ਅਰਜਨਟੀਨਾ ਦੇ ਦਾਅਵੇ ਨਾਲ ਜੁੜਿਆ ਨਾਅਰਾ ਹੈ। ਇਸ ਬੈਨਰ ਨੂੰ ਲੈ ਕੇ ਅਰਜਨਟੀਨਾ ਅਤੇ ਇੰਗਲੈਂਡ ਦੇ ਸਮਰਥਕਾਂ ਵਿਚਾਲੇ ਤਿੱਖੀ ਬਹਿਸ ਅਤੇ ਕੁਝ ਥਾਵਾਂ ‘ਤੇ ਝੜਪਾਂ ਦੀਆਂ ਖ਼ਬਰਾਂ ਵੀ ਸਾਹਮਣੇ ਆਈਆਂ।
ਫਾਕਲੈਂਡ ਟਾਪੂਆਂ ਨੂੰ ਲੈ ਕੇ ਦੋਵੇਂ ਦੇਸ਼ਾਂ ਵਿਚਕਾਰ ਦਹਾਕਿਆਂ ਤੋਂ ਵਿਵਾਦ ਚੱਲ ਰਿਹਾ ਹੈ। ਇਸ ਕਾਰਨ ਮੈਚ ਤੋਂ ਬਾਅਦ ਲਹਿਰਾਏ ਗਏ ਬੈਨਰ ਨੇ ਖੇਡ ਦੇ ਨਾਲ-ਨਾਲ ਸਿਆਸੀ ਚਰਚਾ ਨੂੰ ਵੀ ਜਨਮ ਦੇ ਦਿੱਤਾ ਹੈ।
