ਸ਼ਿਮਲਾ: ਸ਼ਿਮਲਾ ਦੇ ਮਸ਼ਹੂਰ ਬੋਰਡਿੰਗ ਸਕੂਲ ਦੇ ਤਿੰਨ ਵਿਦਿਆਰਥੀਆਂ ਦੇ ਅਗਵਾ ਮਾਮਲੇ ਵਿੱਚ ਇੱਕ ਹੈਰਾਨ ਕਰਨ ਵਾਲਾ ਖੁਲਾਸਾ ਹੋਇਆ ਹੈ। ਦੋਸ਼ੀ ਸੁਮਿਤ ਸੂਦ ਨੇ ਪੁਲਿਸ ਨੂੰ ਦੱਸਿਆ ਹੈ ਕਿ ਉਸਨੇ ਟੀ.ਵੀ ਪ੍ਰੋਗਰਾਮ ਕ੍ਰਾਈਮ ਪੈਟਰੋਲ ਦੇਖਣ ਤੋਂ ਬਾਅਦ ਇਸ ਅਪਰਾਧ ਦੀ ਯੋਜਨਾ ਬਣਾਈ ਸੀ। ਇਹ ਘਟਨਾ ਹਿਮਾਚਲ ਪ੍ਰਦੇਸ਼ ਦੇ ਸ਼ਿਮਲਾ ਦੇ ਇੱਕ ਮਸ਼ਹੂਰ ਬੋਰਡਿੰਗ ਸਕੂਲ ਦੀ ਹੈ। ਸ਼ਨੀਵਾਰ ਨੂੰ ਇੱਥੇ ਤਿੰਨ ਬੱਚਿਆਂ ਨੂੰ ਅਗਵਾ ਕੀਤਾ ਗਿਆ ਸੀ। ਸੁਮਿਤ ਨੇ ਅੱਠ-ਦਸ ਦਿਨ ਪਹਿਲਾਂ ਅਗਵਾ ਕਰਨ ਦਾ ਫ਼ੈਸਲਾ ਕੀਤਾ ਸੀ, ਕਿਉਂਕਿ ਉਸਨੂੰ ਆਪਣੇ ਕਾਰੋਬਾਰ ਵਿੱਚ ਭਾਰੀ ਨੁਕਸਾਨ ਹੋਇਆ ਸੀ ਅਤੇ ਉਸਨੂੰ ਪੈਸਿਆਂ ਦੀ ਸਖ਼ਤ ਜ਼ਰੂਰਤ ਸੀ।
ਖੁਦ ਬੋਰਡਿੰਗ ਸਕੂਲ ਦਾ ਵਿਦਿਆਰਥੀ ਰਿਹਾ ਹੈ ਦੋਸ਼ੀ
ਸੁਮਿਤ ਸੂਦ ਖੁਦ ਬੀ.ਸੀ.ਐਸ. ਦਾ ਸਾਬਕਾ ਵਿਦਿਆਰਥੀ ਰਿਹਾ ਹੈ। ਉਸਨੇ ਇਸ ਸਕੂਲ ਵਿੱਚ ਤੀਜੀ ਤੋਂ ਅੱਠਵੀਂ ਜਮਾਤ ਤੱਕ ਪੜ੍ਹਾਈ ਕੀਤੀ ਸੀ ਅਤੇ ਉਸਨੂੰ ਪਤਾ ਸੀ ਕਿ ਰੱਖੜੀ ਵਾਲੇ ਦਿਨ, ਜ਼ਿਆਦਾਤਰ ਵਿਦਿਆਰਥੀ ਆਪਣੇ ਘਰ ਜਾਣ ਲਈ ਟਾਊਨ ਆਊਟਿੰਗ ‘ਤੇ ਜਾਂਦੇ ਹਨ। ਇਸਦਾ ਫਾਇਦਾ ਉਠਾਉਂਦੇ ਹੋਏ, ਉਸਨੇ ਅਗਵਾ ਦੀ ਯੋਜਨਾ ਬਣਾਈ। ਉਸਨੇ ਇਹ ਵੀ ਦੱਸਿਆ ਕਿ ਉਸਨੇ ਫਿਰੌਤੀ ਮੰਗਣ ਲਈ ਕੈਲੀਫੋਰਨੀਆ ਤੋਂ ਇੱਕ ਵਰਚੁਅਲ ਨੰਬਰ ਦੀ ਵਰਤੋਂ ਕੀਤੀ ਤਾਂ ਜੋ ਉਸਨੂੰ ਫੜਿਆ ਨਾ ਜਾ ਸਕੇ।
ਘਟਨਾ ਵਾਲੇ ਦਿਨ, ਸੁਮਿਤ ਸਵੇਰੇ 5:45 ਵਜੇ ਸਕੂਲ ਦੇ ਗੇਟ ਦੇ ਨੇੜੇ ਪਹੁੰਚ ਗਿਆ ਸੀ। ਜਦੋਂ ਤਿੰਨੋਂ ਵਿਦਿਆਰਥੀ ਦੁਪਹਿਰ 12:12 ਵਜੇ ਸਕੂਲ ਤੋਂ ਬਾਹਰ ਆਏ, ਤਾਂ ਸੁਮਿਤ ਨੇ ਆਪਣੇ ਆਪ ਨੂੰ ਸਕੂਲ ਦੇ ਪੁਰਾਣੇ ਵਿਦਿਆਰਥੀ ਵਜੋਂ ਪੇਸ਼ ਕਰਕੇ ਉਨ੍ਹਾਂ ਨਾਲ ਦੋਸਤੀ ਕੀਤੀ । ਉਸਨੇ ਬੱਚਿਆਂ ਨੂੰ ਧੋਖਾ ਦਿੱਤਾ ਅਤੇ ਕਿਹਾ ਕਿ ਉਹ ਉਨ੍ਹਾਂ ਨੂੰ ਆਕਲੈਂਡ ਸੁਰੰਗ ਦੇ ਨੇੜੇ ਛੱਡ ਦੇਵੇਗਾ, ਜਿੱਥੋਂ ਉਹ ਆਸਾਨੀ ਨਾਲ ਮਾਲ ਰੋਡ ‘ਤੇ ਪਹੁੰਚ ਸਕਦੇ ਹਨ। ਬੱਚੇ ਉਸ ਦੀਆਂ ਗੱਲਾਂ ‘ਚ ਆ ਗਏ ਅਤੇ ਕਾਰ ਵਿੱਚ ਬੈਠ ਗਏ।
ਜਿਵੇਂ ਹੀ ਸੁਮਿਤ ਨੇ ਬੱਚਿਆਂ ਨੂੰ ਗਲਤ ਦਿਸ਼ਾ ਵਿੱਚ ਲਿਜਾਣਾ ਸ਼ੁਰੂ ਕੀਤਾ, ਬੱਚਿਆਂ ਨੇ ਵਿਰੋਧ ਕੀਤਾ। ਫਿਰ ਸੁਮਿਤ ਨੇ ਬੱਚਿਆਂ ਨੂੰ ਦੱਸਿਆ ਕਿ ਉਨ੍ਹਾਂ ਨੂੰ ਅਗਵਾ ਕਰ ਲਿਆ ਗਿਆ ਹੈ। ਬੱਚਿਆਂ ਨੇ ਸੋਚਿਆ ਕਿ ਉਹ ਮਜ਼ਾਕ ਕਰ ਰਿਹਾ ਹੈ, ਪਰ ਜਦੋਂ ਸੁਮਿਤ ਨੇ ਕੁਫ਼ਰੀ ਵਿੱਚ ਕਾਰ ਰੋਕੀ ਅਤੇ ਉਨ੍ਹਾਂ ਨੂੰ ਰਿਵਾਲਵਰ ਦਿਖਾਇਆ ਤਾਂ ਉਹ ਡਰ ਗਏ। ਇਸ ਤੋਂ ਬਾਅਦ, ਉਸਨੇ ਤਿੰਨਾਂ ਬੱਚਿਆਂ ਦੀਆਂ ਅੱਖਾਂ ‘ਤੇ ਟੇਪ ਲਗਾਈ ਅਤੇ ਉਨ੍ਹਾਂ ਨੂੰ ਆਪਣੇ ਘਰ ਕੋਟਖਾਈ ਦੇ ਕੋਕੁਨਾਲਾ ਸਥਿਤ ਲੈ ਗਿਆ। ਉੱਥੇ ਪਹੁੰਚ ਕੇ, ਉਸਨੇ ਬੱਚਿਆਂ ਦੇ ਕੱਪੜੇ ਬਦਲਵਾਏ, ਉਨ੍ਹਾਂ ਨੂੰ ਸਵੈਟਰ ਪਹਿਨਾਏ ਅਤੇ ਕਿਹਾ ਕਿ ਉਹ ਹਾਲੇ ਵੀ ਸੋਲਨ ਵਿੱਚ ਹਨ । ਉਸਨੇ ਫਰਿੱਜ ਵਿੱਚੋਂ ਪੀਜ਼ਾ ਕੱਢਿਆ ਅਤੇ ਉਨ੍ਹਾਂ ਨੂੰ ਖਾਣ ਲਈ ਦਿੱਤਾ ਅਤੇ ਉਨ੍ਹਾਂ ਦੇ ਮਾਪਿਆਂ ਦੇ ਨੰਬਰ ਪੁੱਛੇ।
ਪੁਲਿਸ ਕਾਰਵਾਈ
ਪੁਲਿਸ ਨੂੰ ਇਸ ਮਾਮਲੇ ਨੂੰ ਸੁਲਝਾਉਣ ਵਿੱਚ ਸੀ.ਸੀ.ਟੀ.ਵੀ. ਫੁਟੇਜ ਤੋਂ ਬਹੁਤ ਮਦਦ ਮਿਲੀ। ਪੁਲਿਸ ਨੇ ਬੀ.ਸੀ.ਐਸ. ਗੇਟ ਅਤੇ ਆਲੇ ਦੁਆਲੇ ਦੇ ਇਲਾਕਿਆਂ ਵਿੱਚ ਲੱਗੇ ਸੀ.ਸੀ.ਟੀ.ਵੀ. ਫੁਟੇਜ ਦੀ ਜਾਂਚ ਕੀਤੀ। ਸੀ.ਸੀ.ਟੀ.ਵੀ. ਵਿੱਚ ਇਕ ਸ਼ੱਕੀ ਦਿੱਲੀ ਨੰਬਰ ਦੀ ਕਾਰ ਦਿਖਾਈ ਦਿੱਤੀ, ਜਿਸ ਵਿੱਚ ਤਿੰਨੋਂ ਬੱਚੇ ਲਿਜਾਏ ਗਏ ਸਨ। ਪੁਲਿਸ ਨੇ ਤੁਰੰਤ ਇਸ ਕਾਰ ਨੂੰ ਟਰੇਸ ਕੀਤਾ ਅਤੇ ਦੋਸ਼ੀ ਸੁਮਿਤ ਸੂਦ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਦੋਸ਼ੀ ਨੂੰ ਬੀਤੇ ਦਿਨ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿੱਥੋਂ ਉਸਨੂੰ 13 ਅਗਸਤ ਤੱਕ ਪੁਲਿਸ ਰਿਮਾਂਡ ‘ਤੇ ਭੇਜ ਦਿੱਤਾ ਗਿਆ ਹੈ ਤਾਂ ਜੋ ਮਾਮਲੇ ਦੀ ਪੂਰੀ ਜਾਂਚ ਕੀਤੀ ਜਾ ਸਕੇ।
