ਚੀਨ : ਅਮਰੀਕੀ ਨੌਸੇਨਾ ਦੇ ਬੇੜੇ ‘ਚ ਇੱਕ ਵੱਡਾ ਹਾਦਸਾ ਵਾਪਰਿਆ ਹੈ। ਦੱਖਣੀ ਚੀਨ ਸਾਗਰ ‘ਚ ਨੌਸੇਨਾ ਦਾ ਇੱਕ ਹੈਲੀਕਾਪਟਰ ਅਤੇ ਇੱਕ ਫਾਈਟਰ ਜੈਟ ਹਾਦਸਾਗ੍ਰਸਤ ਹੋ ਗਿਆ ਹੈ। ਵੱਖ-ਵੱਖ ਆਪਰੇਸ਼ਨ ਦੌਰਾਨ ਵੱਖ-ਵੱਖ ਹਾਦਸੇ ਵਾਪਰੇ, ਜਿਨ੍ਹਾਂ ‘ਚ ਨੌਸੇਨਾ ਦੇ 5 ਅਫਸਰ ਜ਼ਖਮੀ ਹੋਏ ਹਨ। ਹਾਲਾਂਕਿ ਹੈਲੀਕਾਪਟਰ ਅਤੇ ਫਾਈਟਰ ਜੈਟ ‘ਚ ਸਵਾਰ 5 ਕਰੂ ਮੈਂਬਰਾਂ ਨੂੰ ਬਚਾ ਲਿਆ ਗਿਆ, ਪਰ ਮਾਮੂਲੀ ਸੱਟਾਂ ਲੱਗਣ ਕਾਰਨ ਉਨ੍ਹਾਂ ਨੂੰ ਹਸਪਤਾਲ ‘ਚ ਦਾਖਲ ਕਰਾਇਆ ਗਿਆ ਹੈ। ਨੌਸੇਨਾ ਦੇ ਸੂਤਰਾਂ ਮੁਤਾਬਕ, ਪੰਜਾਂ ਦੀ ਹਾਲਤ ਹੁਣ ਸਥਿਰ ਹੈ ਅਤੇ ਹਾਦਸੇ ਦੇ ਕਾਰਨ ਦਾ ਪਤਾ ਲਗਾਇਆ ਜਾ ਰਿਹਾ ਹੈ। ਹਾਦਸੇ ਦੀ ਜਾਂਚ ਦੇ ਹੁਕਮ ਜਾਰੀ ਕੀਤੇ ਗਏ ਹਨ।
ਉਡਾਣ ਭਰਦੇ ਹੀ ਗਿਰ ਗਏ ਸਨ ਦੋਵੇਂ ਜਹਾਜ਼
ਅਮਰੀਕੀ ਪੈਸਿਫਿਕ ਫਲੀਟ ਦੇ ਅਨੁਸਾਰ, ਦੱਖਣੀ ਚੀਨ ਸਾਗਰ ਵਿੱਚ ਏਅਰਕ੍ਰਾਫਟ ਕੈਰੀਅਰ USS ਨਿਮਿਟਜ਼ ਤਾਇਨਾਤ ਹੈ, ਜਿੱਥੋਂ ਬੀਤੇ ਦਿਨ ਭਾਰਤੀ ਸਮੇਂ ਅਨੁਸਾਰ ਲਗਭਗ 2 ਵਜੇ 45 ਮਿੰਟ ‘ਤੇ ਬੈਟਲ ਕੈਟਸ ਸਕਵਾਡਰਨ-73 ਦੇ MH-60R ਸੀ-ਹਾਕ ਹੈਲੀਕੌਪਟਰ ਨੇ ਉਡਾਣ ਭਰੀ, ਪਰ ਕੁਝ ਹੀ ਸਕਿੰਟਾਂ ਵਿੱਚ ਹੈਲੀਕੌਪਟਰ ਦੁਰਘਟਨਾਗ੍ਰਸਤ ਹੋਕੇ ਡਿੱਗ ਗਿਆ। ਦੁਰਘਟਨਾ ਹੋਣ ਦੇ ਤੁਰੰਤ ਬਾਅਦ ਕੈਰੀਅਰ ਸਟਰਾਈਕ ਗਰੁੱਪ-11 ਦੀ ਟੀਮ ਕਰੂ ਮੈਂਬਰਾਂ ਨੂੰ ਬਚਾਉਣ ਲਈ ਨਿਕਲੀ ਅਤੇ ਤੁਰੰਤ ਕਾਰਵਾਈ ਕਰਦਿਆਂ ਤਿੰਨਾਂ ਕਰੂ ਮੈਂਬਰਾਂ ਨੂੰ ਬਚਾ ਲਿਆ ਗਿਆ।
ਇਸ ਹਾਦਸੇ ਤੋਂ ਤੀਹ ਮਿੰਟ ਬਾਅਦ, ਦੁਪਹਿਰ 3:15 ਵਜੇ ਦੇ ਕਰੀਬ, ਫਾਈਟਿੰਗ ਰੈੱਡਹਾਕਸ ਸਕੁਐਡਰਨ 22 ਦਾ ਇੱਕ F/A-18F ਸੁਪਰ ਹੌਰਨੇਟ ਲੜਾਕੂ ਜਹਾਜ਼ ਵੀ ਇੱਕ ਆਪ੍ਰੇਸ਼ਨ ‘ਤੇ ਉਡਾਣ ਭਰਿਆ, ਪਰ ਇਹ ਵੀ ਉਡਾਣ ਭਰਨ ਤੋਂ ਥੋੜ੍ਹੀ ਦੇਰ ਬਾਅਦ ਸਮੁੰਦਰ ਵਿੱਚ ਹਾਦਸਾਗ੍ਰਸਤ ਹੋ ਗਿਆ। ਦੋਵੇਂ ਪਾਇਲਟ ਛਾਲ ਮਾਰ ਕੇ ਪੈਰਾਸ਼ੂਟ ਰਾਹੀਂ ਬਚ ਗਏ। ਹਾਲਾਂਕਿ ਦੋਵਾਂ ਜਹਾਜ਼ਾਂ ਵਿੱਚ ਸਵਾਰ ਸਾਰੇ ਪੰਜ ਲੋਕਾਂ ਨੂੰ ਬਚਾ ਲਿਆ ਗਿਆ ਸੀ, ਪਰ ਅਮਰੀਕੀ ਜਲ ਸੈਨਾ ਦਾ ਸੀ ਹਾਕ ਹੈਲੀਕਾਪਟਰ ਅਤੇ ਲੜਾਕੂ ਜਹਾਜ਼ ਹਾਦਸੇ ਵਿੱਚ ਪੂਰੀ ਤਰ੍ਹਾਂ ਤਬਾਹ ਹੋ ਗਏ।
ਅਮਰੀਕੀ ਜਲ ਸੈਨਾ ਵੱਲੋਂ ਜਾਰੀ ਕੀਤਾ ਬਿਆਨ
ਅਮਰੀਕੀ ਜਲ ਸੈਨਾ ਵੱਲੋਂ ਬਿਆਨ ਜਾਰੀ ਕਰਕੇ ਹਾਦਸਿਆਂ ਦੀ ਜਾਣਕਾਰੀ ਦਿੱਤੀ ਗਈ। ਜਲ ਸੈਨਾ ਨੇ ਦੱਸਿਆ ਕਿ ਹਾਦਸੇ ਦੀ ਜਾਣਕਾਰੀ ਡਿਫੈਂਸ ਮਿਨਿਸਟਰੀ ਨੂੰ ਦਿੱਤੀ ਗਈ ਹੈ। ਇੱਕ ਹੈਲੀਕਾਪਟਰ ਅਤੇ ਇੱਕ ਫਾਈਟਰ ਜੈੱਟ ਕਰੈਸ਼ ਹੋਇਆ ਹੈ। ਦੋਵਾਂ ਵਿੱਚ ਸਵਾਰ 5 ਲੋਕ ਸੁਰੱਖਿਅਤ ਹਨ ਅਤੇ ਉਨ੍ਹਾਂ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾ ਕੇ ਉਨ੍ਹਾਂ ਦਾ ਮੈਡੀਕਲ ਚੈੱਕਅੱਪ ਕੀਤਾ ਗਿਆ ਹੈ।
ਉਨ੍ਹਾਂ ਤੋਂ ਜਾਣਕਾਰੀ ਲਈ ਗਈ ਹੈ ਕਿ ਆਖ਼ਰੀ ਪਲਾਂ ਵਿੱਚ ਕੀ ਹੋਇਆ ਸੀ, ਜੋ ਹੈਲੀਕਾਪਟਰ ਅਤੇ ਫਾਈਟਰ ਜੈੱਟ ਕ੍ਰੈਸ਼ ਹੋਏ। ਹਾਦਸੇ ਉਸ ਸਮੇਂ ਹੋਏ ਹਨ, ਜਦੋਂ ਅਮਰੀਕੀ ਜਲ ਸੈਨਾ ਦੱਖਣੀ ਚੀਨ ਸਾਗਰ ਵਿੱਚ ਸਰਗਰਮੀ ਵਧਾ ਰਹੀ ਹੈ। ਸੁਰੱਖਿਆ ਪ੍ਰੋਟੋਕੋਲ ਦੇ ਤਹਿਤ ਆਪ੍ਰੇਸ਼ਨ ਵਿੱਚ ਵਰਤੇ ਜਾਣ ਵਾਲੇ ਜਹਾਜ਼ਾਂ ਦੀ ਜਾਂਚ ਦੇ ਹੁਕਮ ਦੇ ਦਿੱਤੇ ਗਏ ਹਨ।
