ਬੈਂਗਲੁਰੂ: ਤਿਉਹਾਰਾਂ ਦੇ ਸੀਜ਼ਨ ਦੌਰਾਨ ਆਮ ਲੋਕਾਂ ਨੂੰ ਮਹਿੰਗਾਈ ਦਾ ਇੱਕ ਹੋਰ ਝਟਕਾ ਲੱਗਾ ਹੈ। ਕਰਨਾਟਕ ਵਿੱਚ ਪ੍ਰਸਿੱਧ ਦੁੱਧ ਬ੍ਰਾਂਡ ‘ਨੰਦਿਨੀ’ ਦੀਆਂ ਕੀਮਤਾਂ ਵਿੱਚ 8 ਰੁਪਏ ਪ੍ਰਤੀ ਲੀਟਰ ਦਾ ਵਾਧਾ ਕਰ ਦਿੱਤਾ ਗਿਆ ਹੈ। ਨਵੀਆਂ ਕੀਮਤਾਂ 1 ਨਵੰਬਰ ਤੋਂ ਲਾਗੂ ਹੋ ਗਈਆਂ ਹਨ। ਦੁੱਧ ਮਹਿੰਗਾ ਹੋਣ ਕਾਰਨ ਹੁਣ ਬੈਂਗਲੁਰੂ ਦੇ ਹੋਟਲਾਂ, ਰੈਸਟੋਰੈਂਟਾਂ ਅਤੇ ਕੈਫੇ ਵਿੱਚ ਚਾਹ, ਕੌਫੀ ਤੇ ਨਾਸ਼ਤੇ ਦੀਆਂ ਚੀਜ਼ਾਂ ਵੀ ਮਹਿੰਗੀਆਂ ਹੋਣ ਦੀ ਸੰਭਾਵਨਾ ਹੈ।
ਜਾਣਕਾਰੀ ਅਨੁਸਾਰ, 29 ਅਕਤੂਬਰ ਨੂੰ ਕਰਨਾਟਕ ਮੰਤਰੀ ਮੰਡਲ ਨੇ ਨੰਦਿਨੀ ਦੁੱਧ ਦੀ ਕੀਮਤ ਵਿੱਚ ਵਾਧੇ ਨੂੰ ਮਨਜ਼ੂਰੀ ਦਿੱਤੀ ਸੀ। ਇਸ ਫ਼ੈਸਲੇ ਤੋਂ ਬਾਅਦ ਟੋਨਡ ਦੁੱਧ ਦੀ ਕੀਮਤ 46 ਰੁਪਏ ਤੋਂ ਵਧ ਕੇ 54 ਰੁਪਏ ਪ੍ਰਤੀ ਲੀਟਰ ਹੋ ਗਈ ਹੈ।
ਕੀਮਤ ਵਿੱਚ ਕੀਤੇ ਗਏ ਕੁੱਲ 8 ਰੁਪਏ ਦੇ ਵਾਧੇ ਵਿੱਚੋਂ 7 ਰੁਪਏ ਡੇਅਰੀ ਕਿਸਾਨਾਂ ਨੂੰ ਦਿੱਤੇ ਜਾਣਗੇ, ਜਦਕਿ 1 ਰੁਪਿਆ ਦੁੱਧ ਯੂਨੀਅਨਾਂ ਦੇ ਹਿੱਸੇ ਆਵੇਗਾ। ਦੁੱਧ ਯੂਨੀਅਨਾਂ ਵੱਲੋਂ ਪਸ਼ੂਆਂ ਦੇ ਚਾਰੇ, ਦਵਾਈਆਂ, ਆਵਾਜਾਈ ਅਤੇ ਪੈਕਿੰਗ ਦੇ ਵਧਦੇ ਖਰਚਿਆਂ ਕਾਰਨ ਕੀਮਤਾਂ ਵਧਾਉਣ ਦੀ ਮੰਗ ਕੀਤੀ ਗਈ ਸੀ।
ਦੁੱਧ ਦੀਆਂ ਕੀਮਤਾਂ ਵਿੱਚ ਵਾਧੇ ਤੋਂ ਬਾਅਦ ਬੈਂਗਲੁਰੂ ਹੋਟਲਜ਼ ਐਸੋਸੀਏਸ਼ਨ ਨੇ ਵੀ ਚਿੰਤਾ ਜਤਾਈ ਹੈ। ਐਸੋਸੀਏਸ਼ਨ ਮੁਤਾਬਕ ਜੇਕਰ ਦੁੱਧ ਸਿਰਫ਼ 2 ਤੋਂ 3 ਰੁਪਏ ਮਹਿੰਗਾ ਹੁੰਦਾ ਤਾਂ ਹੋਟਲ ਮਾਲਕ ਇਸ ਵਾਧੂ ਖਰਚੇ ਨੂੰ ਖੁਦ ਸਹਿ ਸਕਦੇ ਸਨ। ਪਰ 8 ਰੁਪਏ ਪ੍ਰਤੀ ਲੀਟਰ ਦੇ ਵਾਧੇ ਕਾਰਨ ਹੁਣ ਦੁੱਧ ਤੋਂ ਤਿਆਰ ਹੋਣ ਵਾਲੀਆਂ ਖਾਣ-ਪੀਣ ਦੀਆਂ ਚੀਜ਼ਾਂ ਦੀਆਂ ਕੀਮਤਾਂ ਵਧਾਉਣੀਆਂ ਪੈ ਸਕਦੀਆਂ ਹਨ।
ਦੁੱਧ ਮਹਿੰਗਾ ਹੋਣ ਦਾ ਸਿੱਧਾ ਅਸਰ ਆਮ ਗਾਹਕਾਂ ਦੀ ਜੇਬ ‘ਤੇ ਪੈ ਸਕਦਾ ਹੈ। ਬੈਂਗਲੁਰੂ ਦੇ ਬੇਕਰੀਆਂ, ਦੱਖਣੀ ਭਾਰਤੀ ਟਿਫਿਨ ਸੈਂਟਰਾਂ ਅਤੇ ਕੈਫੇ ਵਿੱਚ ਚਾਹ, ਕੌਫੀ, ਮਿਠਾਈਆਂ ਅਤੇ ਹੋਰ ਦੁੱਧ ਤੋਂ ਬਣਨ ਵਾਲੀਆਂ ਚੀਜ਼ਾਂ ਦੇ ਰੇਟ ਵਧ ਸਕਦੇ ਹਨ।
ਹਾਲਾਂਕਿ, ਐਸੋਸੀਏਸ਼ਨ ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਸਾਰੇ ਹੋਟਲਾਂ ਵਿੱਚ 1 ਨਵੰਬਰ ਤੋਂ ਹੀ ਕੀਮਤਾਂ ਵਧਾਉਣੀਆਂ ਲਾਜ਼ਮੀ ਨਹੀਂ ਹਨ। ਹਰੇਕ ਹੋਟਲ ਮਾਲਕ ਆਪਣੇ ਖਰਚਿਆਂ ਅਤੇ ਦੁੱਧ ਦੀ ਖਪਤ ਦੇ ਹਿਸਾਬ ਨਾਲ ਕੀਮਤਾਂ ਵਿੱਚ ਬਦਲਾਅ ਕਰਨ ਦਾ ਫ਼ੈਸਲਾ ਲਵੇਗਾ।
