ਨਿਊਯਾਰਕ : ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕਿਹਾ ਹੈ ਕਿ ਨਿਊਯਾਰਕ ਸ਼ਹਿਰ ਦੇ ਨਵੇਂ ਚੁਣੇ ਮੇਅਰ, ਜੋਹਰਾਨ ਮਮਦਾਨੀ, ਸ਼ੁੱਕਰਵਾਰ ਨੂੰ ਉਨ੍ਹਾਂ ਨਾਲ ਵ੍ਹਾਈਟ ਹਾਊਸ ਵਿੱਚ ਮੁਲਾਕਾਤ ਕਰਨਗੇ। ਦੱਸ ਦੇਈਏ ਕਿ ਟਰੰਪ ਨੇ ਮਮਦਾਨੀ ਦੀਆਂ ਨੀਤੀਆਂ ਦੀ ਪਹਿਲਾਂ ਸਖ਼ਤ ਆਲੋਚਨਾ ਕੀਤੀ ਸੀ। 4 ਨਵੰਬਰ ਨੂੰ ਹੋਈ ਚੋਣ ਤੋਂ ਇੱਕ ਦਿਨ ਪਹਿਲਾਂ ਟਰੰਪ ਨੇ ਚੇਤਾਵਨੀ ਦਿੱਤੀ ਸੀ ਕਿ ਜੇਕਰ ਮਮਦਾਨੀ ਜਿੱਤ ਗਏ ਤਾਂ ਨਿਊਯਾਰਕ ਸ਼ਹਿਰ ਲਈ ਇਹ ‘ਆਰਥਿਕ ਅਤੇ ਸਮਾਜਿਕ ਆਫ਼ਤ’ ਸਾਬਤ ਹੋਵੇਗੀ। ਬੁੱਧਵਾਰ ਨੂੰ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ ਟ੍ਰੂਥ ਸੋਸ਼ਲ ‘ਤੇ ਟਰੰਪ ਨੇ ਲਿਖਿਆ, ‘ਨਿਊਯਾਰਕ ਸ਼ਹਿਰ ਦੇ ਕਮਿਊਨਿਸਟ ਮੇਅਰ ਜ਼ੋਹਰਾਨ ‘ਕੁਆਮੇ’ ਮਮਦਾਨੀ ਨੇ ਮੀਟਿੰਗ ਲਈ ਬੇਨਤੀ ਕੀਤੀ ਹੈ। ਅਸੀਂ ਸਹਿਮਤ ਹੋਏ ਹਾਂ ਕਿ ਇਹ ਮੀਟਿੰਗ ਸ਼ੁੱਕਰਵਾਰ, 21 ਨਵੰਬਰ ਨੂੰ ਓਵਲ ਆਫਿਸ ਵਿੱਚ ਹੋਵੇਗੀ। ਹੋਰ ਜਾਣਕਾਰੀ ਜਲਦੀ ਹੀ ਪ੍ਰਦਾਨ ਕੀਤੀ ਜਾਵੇਗੀ।”
ਜਿੱਤ ਤੋਂ ਬਾਅਦ ਮਮਦਾਨੀ ਨੇ ਟਰੰਪ ‘ਤੇ ਸਾਧਿਆ ਸੀ ਨਿਸ਼ਾਨਾ
ਜੀਤ ਤੋਂ ਬਾਅਦ ਆਪਣੇ ਜੋਸ਼ੀਲੇ ਭਾਸ਼ਣ ਵਿੱਚ, ਮਮਦਾਨੀ ਨੇ ਟਰੰਪ ਨੂੰ ਸਿੱਧੀ ਚੁਣੌਤੀ ਦਿੱਤੀ ਸੀ। ਟਰੰਪ ਆਪਣੇ ਦੂਜੇ ਕਾਰਜਕਾਲ ਵਿੱਚ ਗੈਰ-ਕਾਨੂੰਨੀ ਪ੍ਰਵਾਸੀਆਂ ‘ਤੇ ਸਖ਼ਤ ਕਾਰਵਾਈ ਕਰ ਰਹੇ ਹਨ, ਜਦਕਿ ਮਮਦਾਨੀ ਨੇ ਕਿਹਾ ਸੀ ਕਿ ਨਿਊਯਾਰਕ ਸ਼ਹਿਰ ਨੂੰ ਪ੍ਰਵਾਸੀ ਹੀ ਤਾਕਤ ਦਿੰਦੇ ਹਨ ਅਤੇ ਹੁਣ ਇਹ ਸ਼ਹਿਰ ‘ਇੱਕ ਪ੍ਰਵਾਸੀ ਦੀ ਅਗਵਾਈ ਵਿੱਚ ਚੱਲੇਗਾ’। ਮਮਦਾਨੀ ਨੇ ਕਿਹਾ ਸੀ, ‘ਆਖਰਕਾਰ, ਜੇਕਰ ਕੋਈ ਡੋਨਾਲਡ ਟਰੰਪ ਦੁਆਰਾ ਧੋਖਾ ਦਿੱਤੇ ਗਏ ਦੇਸ਼ ਨੂੰ ਉਸਨੂੰ ਹਰਾਉਣ ਦਾ ਤਰੀਕਾ ਦਿਖਾ ਸਕਦਾ ਹੈ ਤਾਂ ਉਹ ਨਿਊਯਾਰਕ ਹੀ ਹੈ ਜਿਸਨੇ ਉਸਨੂੰ ਸਿਖਰ ‘ਤੇ ਪਹੁੰਚਾਇਆ। ਜੇਕਰ ਕਿਸੇ ਤਾਨਾਸ਼ਾਹ ਨੂੰ ਡਰਾਉਣ ਦਾ ਕੋਈ ਤਰੀਕਾ ਹੈ, ਤਾਂ ਉਹ ਉਨ੍ਹਾਂ ਹੀ ਹਾਲਾਤਾਂ ਨੂੰ ਖਤਮ ਕਰਨਾ ਹੈ ਜਿਨ੍ਹਾਂ ਨੇ ਉਸਨੂੰ ਸੱਤਾ ਹਾਸਲ ਕਰਨ ਵਿੱਚ ਮਦਦ ਕੀਤੀ। ਇਹੀ ਤਰੀਕਾ ਹੈ ਟਰੰਪ ਨੂੰ ਰੋਕਣ ਦਾ ਅਤੇ ਆਉਣ ਵਾਲੇ ਅਗਲੇ ਟਰੰਪ ਨੂੰ ਰੋਕਣ ਦਾ ਵੀ। ਸੋ ਡੋਨਾਲਡ ਟਰੰਪ, ਮੈਂ ਜਾਣਦਾ ਹਾਂ ਤੁਸੀਂ ਵੇਖ ਰਹੇ ਹੋ। ਮੈਂ 4 ਸ਼ਬਦ ਕਹਾਂਗਾ, ਆਵਾਜ਼ ਹੋਰ ਤੇਜ਼ ਕਰੋ!’
