ਗੁਲਮਰਗ ਗੋਂਡੋਲਾ: ਗੁਲਮਰਗ ਗੋਂਡੋਲਾ ‘ਚ ਸੋਮਵਾਰ ਨੂੰ ਵੱਡਾ ਹਾਦਸਾ ਟਲ ਗਿਆ ਜਦੋਂ ਏਸ਼ੀਆ ਦੇ ਸਭ ਤੋਂ ਉੱਚੇ ਕੇਬਲ ਕਾਰ ਸਿਸਟਮ ਵਿੱਚ ਤਕਨੀਕੀ ਖਰਾਬੀ ਆਉਣ ਕਾਰਨ ਲਗਭਗ 300 ਸੈਲਾਨੀ ਹਵਾ ਵਿੱਚ ਫਸ ਗਏ। ਕਰੀਬ ਸੱਤ ਘੰਟੇ ਚੱਲੇ ਵੱਡੇ ਬਚਾਅ ਅਭਿਆਨ ਤੋਂ ਬਾਅਦ ਸਾਰੇ ਯਾਤਰੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ।
ਜਾਣਕਾਰੀ ਮੁਤਾਬਕ ਦੁਪਹਿਰ ਕਰੀਬ 1:30 ਵਜੇ ਗੁਲਮਰਗ ਗੋਂਡੋਲਾ ਦੇ 65 ਕੈਬਿਨ ਅਚਾਨਕ ਰੁਕ ਗਏ। ਕੁਝ ਕੈਬਿਨ ਜ਼ਮੀਨ ਤੋਂ ਲਗਭਗ 500 ਫੁੱਟ ਉਚਾਈ ’ਤੇ ਹਵਾ ਵਿੱਚ ਲਟਕਦੇ ਰਹੇ। ਹਰੇਕ ਕੈਬਿਨ ਵਿੱਚ ਛੇ ਲੋਕਾਂ ਦੇ ਬੈਠਣ ਦੀ ਸਮਰੱਥਾ ਹੈ, ਜਿਸ ਕਾਰਨ ਇੱਕ ਸਮੇਂ ਵਿੱਚ ਸੈਂਕੜੇ ਸੈਲਾਨੀ ਫਸ ਗਏ। ਘਟਨਾ ਦੌਰਾਨ ਇਲਾਕੇ ਵਿੱਚ ਭਾਰੀ ਬਾਰਿਸ਼ ਵੀ ਹੋ ਰਹੀ ਸੀ, ਜਿਸ ਨਾਲ ਬਚਾਅ ਕਾਰਜ ਹੋਰ ਮੁਸ਼ਕਲ ਹੋ ਗਿਆ।
ਘਟਨਾ ਦੀ ਸੂਚਨਾ ਮਿਲਦੇ ਹੀ Indian Army, SDRF, NDRF ਅਤੇ ਪੁਲਿਸ ਦੀਆਂ ਟੀਮਾਂ ਮੌਕੇ ’ਤੇ ਪਹੁੰਚ ਗਈਆਂ। ਸਾਂਝੇ ਤੌਰ ’ਤੇ ਚਲਾਏ ਗਏ ਰੈਸਕਿਊ ਆਪਰੇਸ਼ਨ ਦੌਰਾਨ ਫੌਜ ਦੇ ਜਵਾਨਾਂ ਨੇ ਅਸਾਧਾਰਣ ਬਹਾਦਰੀ ਦਿਖਾਈ। ਜਵਾਨ ਕੇਬਲਾਂ ਦੇ ਨਾਲ-ਨਾਲ ਰੇਂਗਦੇ ਹੋਏ ਕੈਬਿਨਾਂ ਤੱਕ ਪਹੁੰਚੇ ਅਤੇ ਫਸੇ ਹੋਏ ਸੈਲਾਨੀਆਂ ਨੂੰ ਬਾਹਰ ਕੱਢਿਆ।
ਬਚਾਅ ਕਾਰਜ ਦੌਰਾਨ ਰੱਸੀਆਂ ਅਤੇ ਪੌੜੀਆਂ ਦੀ ਵਰਤੋਂ ਕਰਕੇ ਯਾਤਰੀਆਂ ਨੂੰ ਹੌਲੀ-ਹੌਲੀ ਜ਼ਮੀਨ ’ਤੇ ਉਤਾਰਿਆ ਗਿਆ। ਬਚਾਏ ਗਏ ਲੋਕਾਂ ਵਿੱਚ ਵੱਡੀ ਗਿਣਤੀ ਵਿੱਚ ਔਰਤਾਂ, ਬੱਚੇ ਅਤੇ ਬਜ਼ੁਰਗ ਵੀ ਸ਼ਾਮਲ ਸਨ। ਫੌਜ ਵੱਲੋਂ ਦਿੱਤੀ ਜਾਣਕਾਰੀ ਮੁਤਾਬਕ ਪਹਿਲੇ ਪੰਜ ਘੰਟਿਆਂ ਵਿੱਚ ਹੀ 179 ਸੈਲਾਨੀਆਂ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ ਸੀ, ਜਦਕਿ ਰਾਤ ਕਰੀਬ 8:30 ਵਜੇ ਤੱਕ ਪੂਰਾ ਆਪਰੇਸ਼ਨ ਸਫਲਤਾਪੂਰਵਕ ਸਮਾਪਤ ਕਰ ਦਿੱਤਾ ਗਿਆ।
ਗੁਲਮਰਗ ਗੋਂਡੋਲਾ ਦੁਨੀਆ ਦੇ ਪ੍ਰਸਿੱਧ ਟੂਰਿਸਟ ਆਕਰਸ਼ਣਾਂ ਵਿੱਚੋਂ ਇੱਕ ਮੰਨੀ ਜਾਂਦੀ ਹੈ। ਇਹ ਦੋ ਪੜਾਵਾਂ ਵਿੱਚ ਚਲਦੀ ਹੈ। ਪਹਿਲਾ ਪੜਾਅ ਗੁਲਮਰਗ ਨੂੰ ਕਾਂਗਡੂਰੀ ਨਾਲ ਜੋੜਦਾ ਹੈ, ਜਦਕਿ ਦੂਜਾ ਪੜਾਅ ਕਾਂਗਡੂਰੀ ਤੋਂ ਅਪਰਵਤ ਸਟੇਸ਼ਨ ਤੱਕ ਜਾਂਦਾ ਹੈ। ਪੂਰੇ ਸਿਸਟਮ ਵਿੱਚ ਕੁੱਲ 108 ਕੈਬਿਨ ਹਨ ਅਤੇ ਇਹ ਸੈਲਾਨੀਆਂ ਲਈ ਕਸ਼ਮੀਰ ਦੀਆਂ ਬਰਫ਼ੀਲੀ ਵਾਦੀਆਂ ਦਾ ਖੂਬਸੂਰਤ ਨਜ਼ਾਰਾ ਪੇਸ਼ ਕਰਦੀ ਹੈ।
ਇਸ ਘਟਨਾ ਤੋਂ ਬਾਅਦ ਗੋਂਡੋਲਾ ਦੀ ਤਕਨੀਕੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ। ਅਧਿਕਾਰੀਆਂ ਵੱਲੋਂ ਖਰਾਬੀ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ ਤਾਂ ਜੋ ਭਵਿੱਖ ਵਿੱਚ ਅਜਿਹੀਆਂ ਘਟਨਾਵਾਂ ਤੋਂ ਬਚਿਆ ਜਾ ਸਕੇ।
