ਜੰਮੂ : ਨਰਾਤਿਆਂ ਅਤੇ ਰਮਜ਼ਾਨ ਵਿੱਚ ਪ੍ਰਧਾਨ ਮੰਤਰੀ ਮੋਦੀ ਕਸ਼ਮੀਰ ਦੇ ਲਈ ਰੇਲ ਸੇਵਾ ਸ਼ੁਰੂ ਕਰ ਜੰਮੂ-ਕਸ਼ਮੀਰ ਦੇ ਲੋਕਾਂ ਨੂੰ ਤੋਹਫ਼ਾ ਦੇ ਸਕਦੇ ਹਨ । ਕਸ਼ਮੀਰ ਜਾਣ ਵਾਲੀ ਵੰਦੇ ਭਾਰਤ ਐਕਸਪ੍ਰੈਸ ਨੂੰ ਨਿਯਮਤ ਤੌਰ ‘ਤੇ ਚਲਾਉਣ ਦੀ ਯੋਜਨਾ ‘ਤੇ ਜੰਗੀ ਪੱਧਰ ‘ਤੇ ਤਿਆਰੀਆਂ ਚੱਲ ਰਹੀਆਂ ਹਨ।
ਰੇਲਵੇ ਸੂਤਰਾਂ ਮੁਤਾਬਕ ਈਦ ਅਤੇ ਨਵਰਾਤਰੀ ਦੇ ਪਵਿੱਤਰ ਤਿਉਹਾਰ ‘ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਕਟੜਾ-ਸ਼੍ਰੀਨਗਰ ਟਰੈਕ ‘ਤੇ ਚੱਲਣ ਵਾਲੀ ਰੇਲ ਗੱਡੀ ਦਾ ਉਦਘਾਟਨ ਕਰ ਸਕਦੇ ਹਨ। ਹਾਲਾਂਕਿ ਅਜੇ ਅਧਿਕਾਰਤ ਤੌਰ ‘ਤੇ ਕਿਸੇ ਤਰੀਕ ਦਾ ਐਲਾਨ ਨਹੀਂ ਕੀਤਾ ਗਿਆ ਹੈ ਪਰ ਸੂਤਰਾਂ ਦਾ ਕਹਿਣਾ ਹੈ ਕਿ ਰੇਲਵੇ ਪ੍ਰਸ਼ਾਸਨ ਨੇ ਤਿਆਰੀਆਂ ਸ਼ੁਰੂ ਕਰ ਦਿੱਤੀਆਂ ਹਨ ਅਤੇ ਪਹਿਲੀ ਰੇਲ ਗੱਡੀ ਵਜੋਂ ਵੰਦੇ ਭਾਰਤ ਐਕਸਪ੍ਰੈਸ ਚਲਾਉਣ ਦੀ ਗੱਲ ਕਹੀ ਜਾ ਰਹੀ ਹੈ।
ਜ਼ਿਕਰਯੋਗ ਹੈ ਕਿ ਇਸ ਰੇਲਵੇ ਟਰੈਕ ‘ਤੇ ਟ੍ਰੇਨ ਚਲਾਉਣ ਦਾ ਸਫ਼ਲ ਟ੍ਰਾਇਲ ਕੀਤਾ ਗਿਆ ਹੈ ਅਤੇ ਲਗਭਗ 75 ਤੋਂ 80 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਇਸ ਟਰੈਕ ‘ਤੇ ਟ੍ਰੇਨ ਚਲਾਈ ਗਈ ਹੈ। ਹੁਣ ਵੰਦੇ ਭਾਰਤ ਤੋਂ ਸ਼੍ਰੀਨਗਰ ਤੱਕ ਮੇਲ ਅਤੇ ਐਕਸਪ੍ਰੈਸ ਰੇਲ ਗੱਡੀਆਂ ਚਲਾਉਣ ਦੀ ਤਿਆਰੀ ਵੀ ਕੀਤੀ ਜਾ ਚੁੱਕੀ ਹੈ।
ਦੱਸ ਦੇਈਏ ਕਿ ਸ਼੍ਰੀ ਮਾਤਾ ਵੈਸ਼ਨੋ ਦੇਵੀ ਕਟੜਾ ਰੇਲਵੇ ਸਟੇਸ਼ਨ ਤੋਂ ਸ਼੍ਰੀਨਗਰ ਤੱਕ ਰੇਲ ਮਾਰਗ ਦੀ ਦੂਰੀ ਲਗਭਗ 200 ਕਿਲੋਮੀਟਰ ਹੈ ਅਤੇ ਇਹ ਦੂਰੀ ਲਗਭਗ 3 ਘੰਟੇ 10 ਮਿੰਟ ਵਿੱਚ ਪੂਰੀ ਹੋ ਜਾਵੇਗੀ, ਜਦੋਂ ਕਿ ਮੇਲ ਐਕਸਪ੍ਰੈਸ ਰੇਲ ਗੱਡੀ ਇਸ ਦੂਰੀ ਨੂੰ ਲਗਭਗ 3 ਘੰਟੇ ਅਤੇ 20 ਮਿੰਟਾਂ ਵਿੱਚ ਪੂਰਾ ਕਰੇਗੀ।
ਵੰਦੇ ਭਾਰਤ ਟ੍ਰੇਨ ਹਫ਼ਤੇ ‘ਚ 6 ਦਿਨ ਚੱਲੇਗੀ। ਇਹ ਕਟੜਾ ਸਟੇਸ਼ਨ ਤੋਂ ਸਵੇਰੇ 8:10 ਵਜੇ ਰਵਾਨਾ ਹੋਵੇਗੀ ਅਤੇ ਸਵੇਰੇ 11:20 ਵਜੇ ਸ਼੍ਰੀਨਗਰ ਪਹੁੰਚੇਗੀ। ਇਸ ਦੇ ਨਾਲ ਹੀ ਮੇਲ ਐਕਸਪ੍ਰੈਸ ਟ੍ਰੇਨ ਰੋਜ਼ਾਨਾ ਚੱਲੇਗੀ। ਕਟੜਾ ਸਟੇਸ਼ਨ ਤੋਂ ਇਹ ਰੇਲ ਗੱਡੀ ਸਵੇਰੇ 9.50 ਵਜੇ ਰਵਾਨਾ ਹੋਵੇਗੀ ਅਤੇ ਦੁਪਹਿਰ 1.10 ਵਜੇ ਸ਼੍ਰੀਨਗਰ ਰੇਲਵੇ ਸਟੇਸ਼ਨ ਪਹੁੰਚੇਗੀ, ਜਦੋਂ ਕਿ ਦੂਜੀ ਮੇਲ ਐਕਸਪ੍ਰੈਸ ਰੇਲ ਗੱਡੀ ਕਟੜਾ ਸਟੇਸ਼ਨ ਤੋਂ ਸ਼ਾਮ 4 ਵਜੇ ਰਵਾਨਾ ਹੋਵੇਗੀ ਅਤੇ ਸ਼ਾਮ 6.20 ਵਜੇ ਸ਼੍ਰੀਨਗਰ ਰੇਲਵੇ ਸਟੇਸ਼ਨ ਪਹੁੰਚੇਗੀ।
ਵਾਪਸੀ ਦੀ ਯਾਤਰਾ ‘ਤੇ ਵੰਦੇ ਭਾਰਤ ਐਕਸਪ੍ਰੈਸ ਸ਼੍ਰੀਨਗਰ ਤੋਂ ਦੁਪਹਿਰ 12.45 ਵਜੇ ਰਵਾਨਾ ਹੋਵੇਗੀ ਅਤੇ ਦੁਪਹਿਰ 3.55 ਵਜੇ ਕਟੜਾ ਪਹੁੰਚੇਗੀ, ਜਦੋਂ ਕਿ ਪਹਿਲੀ ਮੇਲ ਐਕਸਪ੍ਰੈਸ ਸ਼੍ਰੀਨਗਰ ਰੇਲਵੇ ਸਟੇਸ਼ਨ ਤੋਂ ਸਵੇਰੇ 8.45 ਵਜੇ ਰਵਾਨਾ ਹੋਵੇਗੀ ਅਤੇ ਦੁਪਹਿਰ 12 ਵਜੇ ਕਟੜਾ ਪਹੁੰਚੇਗੀ। ਦੂਜੀ ਰੇਲ ਗੱਡੀ ਕਟੜਾ ਤੋਂ ਦੁਪਹਿਰ 3:10 ਵਜੇ ਰਵਾਨਾ ਹੋਵੇਗੀ ਅਤੇ ਸ਼ਾਮ 6:00 ਵਜੇ ਕਟੜਾ ਪਹੁੰਚੇਗੀ।
