ਅਮਰੀਕਾ : ਅਮਰੀਕਾ ਨੇ ਕਿਊਬਾ ਦੇ ਕਿਰਤ ਨਿਰਯਾਤ ਯੋਜਨਾ ਵਿੱਚ ਕਥਿਤ ਸ਼ਮੂਲੀਅਤ ਦੇ ਕਾਰਨ ਬ੍ਰਾਜ਼ੀਲ ਦੇ ਕਈ ਸਰਕਾਰੀ ਅਧਿਕਾਰੀਆਂ ਦੇ ਵੀਜ਼ਾ ਰੱਦ ਕਰ ਦਿੱਤੇ ਹਨ ਅਤੇ ਉਨ੍ਹਾਂ ਉੱਤੇ ਵੀਜ਼ਾ ਪਾਬੰਦੀਆਂ ਲਗਾਈਆਂ ਹਨ। ਅਮਰੀਕੀ ਵਿਦੇਸ਼ ਵਿਭਾਗ ਨੇ ਇੱਕ ਬਿਆਨ ਵਿੱਚ ਇਹ ਜਾਣਕਾਰੀ ਦਿੰਦੇ ਹੋਏ ਕਿਹਾ, ‘ਅੱਜ, ਵਿਦੇਸ਼ ਵਿਭਾਗ ਨੇ ਕਿਊਬਾ ਸਰਕਾਰ ਦੀ ਕਿਰਤ ਨਿਰਯਾਤ ਯੋਜਨਾ ਵਿੱਚ ਮਿਲੀਭੁਗਤ ਦੇ ਕਾਰਨ ਕਈ ਬ੍ਰਾਜ਼ੀਲੀਆਈ ਸਰਕਾਰੀ ਅਧਿਕਾਰੀਆਂ, ਪੈਨ ਅਮਰੀਕਨ ਹੈਲਥ ਆਰਗੇਨਾਈਜੇਸ਼ਨ (ਪੀ.ਏ.ਐਚ.ਓ) ਦੇ ਸਾਬਕਾ ਅਧਿਕਾਰੀਆਂ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਦੇ ਵੀਜ਼ਾ ਰੱਦ ਕਰਨ ਅਤੇ ਉਨ੍ਹਾਂ ਉੱਤੇ ਵੀਜ਼ਾ ਪਾਬੰਦੀਆਂ ਲਗਾਉਣ ਦੇ ਲਈ ਕਦਮ ਚੁੱਕੇ ਹਨ।
ਇਹ ਅਧਿਕਾਰੀ ਕਿਊਬਾ ਸਰਕਾਰ ਦੀ ਲਾਜ਼ਮੀ ਕਿਰਤ ਨਿਰਯਾਤ ਯੋਜਨਾ ਨੂੰ ਉਤਸ਼ਾਹਿਤ ਕਰਨ ਵਿੱਚ ਸ਼ਾਮਲ ਸਨ, ਜੋ ਕਿ ਕਿਊਬਾ ਦੇ ਮੈਡੀਕਲ ਕਰਮਚਾਰੀਆਂ ਦਾ ਜਬਰੀ ਮਜ਼ਦੂਰੀ ਰਾਹੀਂ ਸ਼ੋਸ਼ਣ ਕਰਦੀ ਹੈ।’ ਅਮਰੀਕੀ ਵਿਦੇਸ਼ ਵਿਭਾਗ ਨੇ ਮੋਜ਼ਾਰਟ ਜੂਲੀਓ ਤਾਬੋਸਾ ਸੇਲਜ਼ ਅਤੇ ਅਲਬਰਟੋ ਕਲੇਮੰਸ ਦੇ ਵੀਜ਼ੇ ਰੱਦ ਕਰ ਦਿੱਤੇ ਹਨ, ਇਹ ਦੋਵੇਂ ਬ੍ਰਾਜ਼ੀਲ ਦੇ ਸਿਹਤ ਮੰਤਰਾਲੇ ਵਿੱਚ ਮਾਸ ਮੈਡੀਕੋਸ ਪ੍ਰੋਗਰਾਮ ਵਿੱਚ ਕੰਮ ਕਰ ਰਹੇ ਸਨ।
