ਮਹਾਰਾਸ਼ਟਰ : ਮਹਾਰਾਸ਼ਟਰ ਮਹਿਲਾ ਕਮਿਸ਼ਨ (Maharashtra Women’s Commission) ਦੀ ਮੁਖੀ ਰੂਪਾਲੀ ਚਾਕਣਕਰ (Rupali Chakankar) ਨੇ ਦਾਅਵਾ ਕੀਤਾ ਹੈ ਕਿ ਮੋਬਾਇਲ ਫੋਨ ਕਾਰਨ ਮਾਤਾ-ਪਿਤਾ ਅਤੇ ਬੱਚਿਆਂ ‘ਚ ‘ਸੰਵਾਦ ਦੀ ਕਮੀ’ ਕਾਰਨ ਲੜਕੀਆਂ ਪਿਆਰ ‘ਚ ਪੈ ਕੇ ਘਰੋਂ ਭੱਜ ਰਹੀਆਂ ਹਨ। ਉਨ੍ਹਾਂ ਕਿਹਾ ਕਿ ਕੋਵਿਡ-19 ਮਹਾਂਮਾਰੀ ਦੀ ਰੋਕਥਾਮ ਲਈ ਲਾਗੂ ਕੀਤੇ ਗਏ ਲੌਕਡਾਊਨ ਤੋਂ ਬਾਅਦ ਸੂਬੇ ਵਿੱਚ ਬਾਲ ਵਿਆਹ ਦੇ ਮਾਮਲਿਆਂ ਵਿੱਚ ਵਾਧਾ ਹੋਇਆ ਹੈ। ਲਾਤੂਰ ਵਿੱਚ ਬੀਤੇ ਦਿਨ ਇੱਕ ਪ੍ਰੈੱਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਚਾਕਣਕਰ ਨੇ ਕਿਹਾ ਕਿ ਇਕੱਲੇ ਲਾਤੂਰ ਵਿੱਚ 37 ਬਾਲ ਵਿਆਹਾਂ ਨੂੰ ਰੋਕਿਆ ਗਿਆ ਅਤੇ ਇਨ੍ਹਾਂ ਵਿੱਚੋਂ ਦੋ ਘਟਨਾਵਾਂ ਦੇ ਸਬੰਧ ਵਿੱਚ ਕੇਸ ਦਰਜ ਕੀਤੇ ਗਏ। ਹਾਲਾਂਕਿ, ਉਨ੍ਹਾਂ ਨੇ ਮਹਾਰਾਸ਼ਟਰ ਵਿੱਚ ਵੱਧ ਰਹੇ ਬਾਲ ਵਿਆਹ ਬਾਰੇ ਆਪਣੇ ਬਿਆਨ ਬਾਰੇ ਕੋਈ ਅੰਕੜੇ ਜਾਂ ਸਮਾਂ ਮਿਆਦ ਨਹੀਂ ਦਿੱਤੀ।
ਚਾਕਣਕਰ ਨੇ ਕਿਹਾ ਕਿ ਗ੍ਰਾਮ ਸਭਾਵਾਂ ਨੂੰ ਬਾਲ ਵਿਆਹਾਂ ਨੂੰ ਸਖ਼ਤੀ ਨਾਲ ਰੋਕਣ ਲਈ ਮਤੇ ਪਾਸ ਕਰਨੇ ਚਾਹੀਦੇ ਹਨ ਅਤੇ ਵਿਆਹ ਦੇ ਸੱਦੇ ਛਾਪਣ ਵਾਲਿਆਂ ਸਮੇਤ ਇਸ ਵਿੱਚ ਸ਼ਾਮਲ ਸਾਰੇ ਲੋਕਾਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਯਕੀਨੀ ਬਣਾਈ ਜਾਣੀ ਚਾਹੀਦੀ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਮੋਬਾਈਲ ਫੋਨ ਅਤੇ ਹੋਰ ਤਕਨੀਕ ਦੇ ਸਾਧਨਾਂ ਦੀ ਉਪਲਬਧਤਾ ਕਾਰਨ ਮਾਪਿਆਂ ਅਤੇ ਬੱਚਿਆਂ ਵਿਚਕਾਰ ‘ਸੰਵਾਦ ਦੀ ਘਾਟ’ ਪੈਦਾ ਹੋ ਰਹੀ ਹੈ, ਜਿਸ ਕਾਰਨ ਲੜਕੀਆਂ ਪਿਆਰ ਵਿੱਚ ਪੈ ਕੇ ਘਰੋਂ ਭੱਜ ਰਹੀਆਂ ਹਨ।
ਚਾਕਣਕਰ ਨੇ ਕਿਹਾ ਕਿ ਪੁਲਿਸ ਦੇ ‘ਦਾਮਿਨੀ ਸਕੁਐਡ’ ਨੂੰ ਲੜਕੀਆਂ ਦੀ ਸੁਰੱਖਿਆ ਲਈ ਵੱਧ ਤੋਂ ਵੱਧ ਗੱਲਬਾਤ ਕਰਨੀ ਚਾਹੀਦੀ ਹੈ। ਉਨ੍ਹਾਂ ਦੱਸਿਆ ਕਿ ਮਹਿਲਾ ਆਯੋਗ ਅਪਲਿਆ ਦਰੀ ਪਹਿਲਕਦਮੀ ਤਹਿਤ ਕਮਿਸ਼ਨ ਨੇ 28 ਜ਼ਿਲ੍ਹਿਆਂ ਤੋਂ ਕਰੀਬ 18,000 ਸ਼ਿਕਾਇਤਾਂ ਦਾ ਨਿਪਟਾਰਾ ਕੀਤਾ ਹੈ। ਬੀਤੇ ਦਿਨ ਸਾਨੂੰ ਲਾਤੂਰ ਵਿੱਚ 93 ਸ਼ਿਕਾਇਤਾਂ ਮਿਲੀਆਂ ਅਤੇ ਤਿੰਨ ਟੀਮਾਂ ਉਨ੍ਹਾਂ ਨੂੰ ਜਲਦੀ ਹੱਲ ਕਰਨ ਲਈ ਕੰਮ ਕਰਨਗੀਆਂ।
