Sports News : ਮੁੰਬਈ ਇੰਡੀਅਨਜ਼ ਨੇ 2027 ਮਹਿਲਾ ਪ੍ਰੀਮੀਅਰ ਲੀਗ (WPL) ਦੀ ਤਿਆਰੀ ਦੇ ਵਿਚਕਾਰ ਮਹਿਲਾ ਟੀਮ ਵਿੱਚ ਇੱਕ ਵੱਡਾ ਬਦਲਾਅ ਕੀਤਾ ਹੈ। ਫਰੈਂਚਾਇਜ਼ੀ ਨੇ ਆਸਟ੍ਰੇਲੀਆ ਦੇ ਸਾਬਕਾ ਕ੍ਰਿਕਟਰ ਲੂਕ ਵਿਲੀਅਮਜ਼ ਨੂੰ ਟੀਮ ਦਾ ਨਵਾਂ ਹੈਡ ਕੋਚ ਨਿਯੁਕਤ ਕੀਤਾ ਹੈ।
ਉਹ ਲੀਜ਼ਾ ਕੀਟਲੀ ਦੀ ਜਗ੍ਹਾ ਲੈਣਗੇ, ਜਿਨ੍ਹਾਂ ਨੇ ਸਿਰਫ਼ ਇੱਕ ਸੀਜ਼ਨ ਟੀਮ ਦੀ ਕਮਾਨ ਸੰਭਾਲਣ ਦੇ ਬਾਅਦ ਅਹੁਦਾ ਛੱਡ ਦਿੱਤਾ ਹੈ। ਕੀਟਲੀ ਤੋਂ ਪਹਿਲਾਂ, ਸ਼ਾਰਲਟ ਐਡਵਰਡਸ ਟੀਮ ਦੀ ਕੋਚ ਸੀ।
46 ਸਾਲਾ ਲੂਕ ਵਿਲੀਅਮਜ਼ ਕੋਲ ਕੋਚਿੰਗ ਦਾ ਵਿਆਪਕ ਤਜਰਬਾ ਹੈ। ਉਨ੍ਹਾਂ ਨੇ 2024 ਵਿੱਚ ਰਾਇਲ ਚੈਲੇਂਜਰਜ਼ ਬੰਗਲੌਰ ਨੂੰ WPL ਖਿਤਾਬ ਦਿਲਵਾ ਚੁੱਕੇ ਹਨ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਐਡੀਲੇਡ ਸਟ੍ਰਾਈਕਰਜ਼ ਨੂੰ ਦੋ WBBL ਉਪ ਜੇਤੂ ਅਤੇ 2022-23 ਵਿੱਚ ਉਨ੍ਹਾਂ ਦਾ ਪਹਿਲਾ WBBL ਖਿਤਾਬ ਵੀ ਦਿਵਾਇਆ।
ਵਿਲੀਅਮਜ਼ 2023 ਵਿੱਚ ਮਹਿਲਾ ਹੰਡਰੇਡ ਦੀ ਟੀਮ, ਸਾਊਦਰਨ ਬ੍ਰੇਵ ਦੇ ਸਹਾਇਕ ਕੋਚ ਵੀ ਰਹੇ, ਜਦੋਂ ਟੀਮ ਨੇ ਇੱਕ ਸਫਲ ਮੁਹਿੰਮ ਪੂਰੀ ਕੀਤੀ ਸੀ। ਉਹ 2025 ਤੋਂ ਇੰਗਲੈਂਡ ਮਹਿਲਾ ਟੀਮ ਦੇ ਸਹਾਇਕ ਕੋਚ ਦੀ ਭੂਮਿਕਾ ਵੀ ਨਿਭਾ ਰਹੇ ਸਨ।
2026 ਵਿੱਚ ਮੁੰਬਈ ਇੰਡੀਅਨਜ਼ ਦਾ ਪ੍ਰਦਰਸ਼ਨ ਨਿਰਾਸ਼ਾਜਨਕ
ਵਿਲੀਅਮਜ਼ ਨੂੰ ਇੱਕ ਵਾਰ ਫਿਰ WPL ਵਿੱਚ ਮੁੰਬਈ ਇੰਡੀਅਨਜ਼ ਨੂੰ ਸਫਲਤਾ ਵੱਲ ਲੈ ਜਾਣ ਦੀ ਚੁਣੌਤੀ ਦਾ ਸਾਹਮਣਾ ਕਰਨਾ ਪਵੇਗਾ। ਦੋ ਵਾਰ WPL ਚੈਂਪੀਅਨ ਮੁੰਬਈ ਇੰਡੀਅਨਜ਼ ਦਾ 2026 ਦਾ ਸੀਜ਼ਨ ਬਹੁਤ ਮਾੜਾ ਰਿਹਾ। ਹਰਮਨਪ੍ਰੀਤ ਕੌਰ ਦੀ ਕਪਤਾਨੀ ਵਾਲੀ ਟੀਮ ਨੇ ਸਿਰਫ਼ ਤਿੰਨ ਮੈਚ ਜਿੱਤੇ ਅਤੇ ਅੰਕ ਸੂਚੀ ਵਿੱਚ ਚੌਥੇ ਸਥਾਨ ‘ਤੇ ਰਹੀ।
ਮੁੰਬਈ ਇੰਡੀਅਨਜ਼ ਵਿੱਚ ਸ਼ਾਮਲ ਹੋਣ ‘ਤੇ, ਵਿਲੀਅਮਜ਼ ਨੇ ਕਿਹਾ ਕਿ ਉਹ ਇਸ ਵੱਕਾਰੀ ਅਤੇ ਸਫਲ ਸੰਗਠਨ ਦਾ ਹਿੱਸਾ ਬਣਨ ਲਈ ਉਤਸ਼ਾਹਿਤ ਹੈ। ਉਨ੍ਹਾਂ ਨੇ ਟੀਮ ਦੇ ਪ੍ਰਤਿਭਾਸ਼ਾਲੀ ਖਿਡਾਰੀਆਂ ਅਤੇ ਸਹਾਇਕ ਸਟਾਫ ਨਾਲ ਕੰਮ ਕਰਨ ਵਿੱਚ ਆਪਣੀ ਖੁਸ਼ੀ ਵੀ ਪ੍ਰਗਟ ਕੀਤੀ।
ਨੀਤਾ ਅੰਬਾਨੀ ਨੇ ਵੀ ਦਿੱਤੀ ਪ੍ਰਤੀਕਿਰਿਆ
ਮੁੰਬਈ ਇੰਡੀਅਨਜ਼ ਦੀ ਮਾਲਕ ਨੀਤਾ ਅੰਬਾਨੀ ਨੇ ਲੂਕ ਵਿਲੀਅਮਜ਼ ਦੀ ਨਿਯੁਕਤੀ ਦਾ ਸਵਾਗਤ ਕੀਤਾ। ਉਨ੍ਹਾਂ ਨੇ ਕਿਹਾ ਕਿ ਵਿਲੀਅਮਜ਼ ਨੇ ਸਾਬਤ ਕਰ ਚੁੱਕੇ ਹਨ ਕਿ ਉਹ ਇੱਕ ਜੇਤੂ ਕੋਚ ਹਨ। ਉਨ੍ਹਾਂ ਦੇ ਕੋਲ ਮਹਿਲਾ ਕ੍ਰਿਕਟ ਵਿੱਚ ਡੂੰਘਾ ਤਜਰਬਾ ਹੈ ਅਤੇ ਖਿਡਾਰੀਆਂ ਦੇ ਵਿਕਾਸ ਲਈ ਵੀ ਇੱਕ ਮਜ਼ਬੂਤ ਵਚਨਬੱਧਤਾ ਹੈ।
ਨੀਤਾ ਅੰਬਾਨੀ ਨੇ ਕਿਹਾ ਕਿ ਮੁੰਬਈ ਇੰਡੀਅਨਜ਼ ਦੀ ਮਹਿਲਾ ਟੀਮ ਨੇ WPL ਵਿੱਚ ਇੱਕ ਮਜ਼ਬੂਤ ਵਿਰਾਸਤ ਬਣਾਈ ਹੈ ਅਤੇ ਉਨ੍ਹਾਂ ਨੂੰ ਵਿਸ਼ਵਾਸ ਹੈ ਕਿ ਟੀਮ ਲੂਕ ਵਿਲੀਅਮਜ਼ ਦੀ ਅਗਵਾਈ ਅਤੇ ਹਰਮਨਪ੍ਰੀਤ ਦੀ ਅਗਵਾਈ ਹੇਠ ਪ੍ਰਫੁੱਲਤ ਹੋਵੇਗੀ।
