ਚੰਡੀਗੜ੍ਹ: ਪੰਜਾਬ ਵਿਧਾਨ ਸਭਾ ਦੇ ਵਿਸ਼ੇਸ਼ ਸੈਸ਼ਨ ਦਾ ਅੱਜ ਆਖਰੀ ਦਿਨ ਹੈ। ਦੱਸ ਦੇਈਏ ਕਿ ਪੰਜਾਬ ਵਿਧਾਨ ਸਭਾ ਦੀ ਕਾਰਵਾਈ ਸ਼ੁਰੂ ਹੋ ਗਈ ਹੈ । ਅੱਜ ਦੇ ਸੈਸ਼ਨ ਵਿੱਚ, ਵਿਰੋਧੀ ਧਿਰ ਵੱਲੋਂ ਐਸ.ਡੀ.ਆਰ.ਐਫ਼. ਲਈ 12,000 ਕਰੋੜ ਰੁਪਏ ਅਤੇ ਹੜ੍ਹ ਪ੍ਰਭਾਵਿਤ ਲੋਕਾਂ ਲਈ ਮੁਆਵਜ਼ੇ ਦੀਆਂ ਮੰਗਾਂ ਨਾਲ ਸਰਕਾਰ ਨੂੰ ਘੇਰਨ ਦੀ ਉਮੀਦ ਹੈ। ਸੈਸ਼ਨ ਦੌਰਾਨ 20,000 ਕਰੋੜ ਰੁਪਏ ਦੇ ਰਾਹਤ ਪੈਕੇਜ ਦੀ ਮੰਗ ਕਰਨ ਵਾਲਾ ਮਤਾ ਪਾਸ ਕੀਤਾ ਜਾ ਸਕਦਾ ਹੈ। ਇਸ ਦੇ ਨਾਲ ਹੀ, ਕੇਂਦਰ ਸਰਕਾਰ ਵੱਲੋਂ ਰਾਹਤ ਪੈਕੇਜ ਪ੍ਰਦਾਨ ਕਰਨ ਵਿੱਚ ਅਸਫ਼ਲ ਰਹਿਣ ਲਈ ਨਿੰਦਾ ਮਤਾ ਵੀ ਸਦਨ ਵਿੱਚ ਪੇਸ਼ ਕੀਤਾ ਜਾ ਸਕਦਾ ਹੈ।
ਵਿਧਾਨ ਸਭਾ ਵਿੱਚ ਇਨ੍ਹਾਂ ਬਿੱਲਾਂ ਨੂੰ ਦਿੱਤੀ ਜਾ ਸਕਦੀ ਹੈ ਮਨਜ਼ੂਰੀ :
ਹੜ੍ਹ ਰਾਹਤ ਪੈਕੇਜ ਅਧੀਨ ਨਿਯਮਾਂ ਵਿੱਚ ਸੋਧ ਅਤੇ ਮੁਆਵਜ਼ਾ ਵੰਡ ਨਾਲ ਸਬੰਧਤ ਕਾਨੂੰਨ।
ਹੜ੍ਹ ਪ੍ਰਭਾਵਿਤ ਕਿਸਾਨਾਂ ਨੂੰ 200,000 ਕੁਇੰਟਲ ਕਣਕ ਦਾ ਬੀਜ ਮੁਫ਼ਤ ਪ੍ਰਦਾਨ ਕਰਨ ਦੀ ਯੋਜਨਾ।
ਕਾਰੋਬਾਰ ਦੇ ਅਧਿਕਾਰ ਕਾਨੂੰਨ ਵਿੱਚ ਸੋਧਾਂ ਰਾਹੀਂ ਉਦਯੋਗਾਂ ਲਈ ਹੋਰ ਸਹੂਲਤਾਂ।
ਪੰਜਾਬ ਜੀ.ਐਸ.ਟੀ. ਸੋਧ ਬਿੱਲ 2025, ਅਪਾਰਟਮੈਂਟ ਅਤੇ ਜਾਇਦਾਦ ਨਿਯਮ ਸੋਧ ਬਿੱਲ, ਸਹਿਕਾਰੀ ਸਭਾਵਾਂ ਬਿੱਲ ਅਤੇ ਨਗਰ ਸੁਧਾਰ ਬਿੱਲ ਵਰਗੇ ਮੁੱਖ ਬਿੱਲ ਵੀ ਸਦਨ ਦੇ ਏਜੰਡੇ ਵਿੱਚ ਹਨ।
ਇਸ ਤੋਂ ਇਲਾਵਾ, ਵਿੱਤੀ ਸਾਲ 2023-24 ਦੇ ਲੇਖੇ ਅਤੇ ਸਰਕਾਰ ਦੀਆਂ ਪ੍ਰਾਪਤੀਆਂ ਦੀ ਰਿਪੋਰਟ ਵੀ ਸਦਨ ਵਿੱਚ ਪੇਸ਼ ਕੀਤੀ ਜਾਵੇਗੀ।
