ਗੁਜਰਾਤ : ਅੱਜ , ਸ਼ੁੱਕਰਵਾਰ, 27 ਜੂਨ ਨੂੰ 2013 ਦੇ ਬਲਾਤਕਾਰ ਮਾਮਲੇ ਵਿੱਚ ਦੋਸ਼ੀ ਠਹਿਰਾਏ ਗਏ ਅਤੇ ਉਮਰ ਕੈਦ ਦੀ ਸਜ਼ਾ ਕੱਟ ਰਹੇ ਆਸਾਰਾਮ ਨੂੰ ਗੁਜਰਾਤ ਹਾਈ ਕੋਰਟ ਨੇ ਵੱਡੀ ਰਾਹਤ ਦਿੱਤੀ ਹੈ। ਅਦਾਲਤ ਨੇ ਉਸਦੀ ਅਸਥਾਈ ਜ਼ਮਾਨਤ 7 ਜੁਲਾਈ, 2025 ਤੱਕ ਵਧਾ ਦਿੱਤੀ ਹੈ। ਇਹ ਫ਼ੈੈਸਲਾ ਜਸਟਿਸ ਇਲੇਸ਼ ਜੇ. ਵੋਰਾ ਅਤੇ ਜਸਟਿਸ ਸੰਦੀਪ ਐਨ. ਭੱਟ ਦੀ ਡਿਵੀਜ਼ਨ ਬੈਂਚ ਨੇ ਦਿੱਤਾ। ਅਦਾਲਤ ਨੇ ਇਹ ਵਾਧਾ ਆਸਾਰਾਮ ਦੇ ਵਕੀਲ ਦੁਆਰਾ ਪਟੀਸ਼ਨ ਵਿੱਚ ਦਸਤਾਵੇਜ਼ ਦਾਇਰ ਕਰਨ ਲਈ ਮੰਗੇ ਗਏ ਵਾਧੂ ਸਮੇਂ ਦੇ ਆਧਾਰ ‘ਤੇ ਕੀਤਾ।
ਇਸ ਤੋਂ ਪਹਿਲਾਂ, ਮਿਲੀ ਸੀ ਤਿੰਨ ਮਹੀਨਿਆਂ ਦੀ ਅਸਥਾਈ ਜ਼ਮਾਨਤ
ਹਾਈ ਕੋਰਟ ਨੇ ਪਹਿਲਾਂ 28 ਮਾਰਚ, 2025 ਨੂੰ ਆਸਾਰਾਮ ਨੂੰ ਤਿੰਨ ਮਹੀਨਿਆਂ ਦੀ ਅਸਥਾਈ ਜ਼ਮਾਨਤ ਦਿੱਤੀ ਸੀ। ਇਹ ਜ਼ਮਾਨਤ ਉਸਦੀ ਸਿਹਤ ਸਥਿਤੀ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਦਿੱਤੀ ਗਈ ਸੀ। ਉਸ ਸਮੇਂ, ਸੁਪਰੀਮ ਕੋਰਟ ਦੁਆਰਾ ਦਿੱਤੀ ਗਈ ਅੰਤਰਿਮ ਜ਼ਮਾਨਤ 30 ਜੂਨ ਨੂੰ ਖਤਮ ਹੋ ਰਹੀ ਸੀ। ਹੁਣ ਜਦੋਂ ਇਹ ਮਿਆਦ 30 ਜੂਨ ਨੂੰ ਖਤਮ ਹੋ ਰਹੀ ਸੀ, ਤਾਂ ਅਦਾਲਤ ਨੇ ਇਸਨੂੰ 7 ਜੁਲਾਈ ਤੱਕ ਵਧਾਉਣ ਦਾ ਫ਼ੈੈਸਲਾ ਕੀਤਾ।
ਵਕੀਲ ਨੇ ਕਿਉਂ ਮੰਗਿਆ ਸਮਾਂ ?
ਆਸਾਰਾਮ ਦੇ ਵਕੀਲ ਨੇ ਅਦਾਲਤ ਤੋਂ ਕੁਝ ਹੋਰ ਦਿਨ ਮੰਗੇ ਤਾਂ ਜੋ ਉਹ ਪਟੀਸ਼ਨ ਵਿੱਚ ਲੋੜੀਂਦੇ ਦਸਤਾਵੇਜ਼ ਅਦਾਲਤ ਦੇ ਰਿਕਾਰਡ ਵਿੱਚ ਪੇਸ਼ ਕਰ ਸਕੇ। ਉਨ੍ਹਾਂ ਕਿਹਾ ਕਿ 28 ਮਾਰਚ ਨੂੰ ਅਦਾਲਤ ਵੱਲੋਂ ਜ਼ਮਾਨਤ ਦੇਣ ਤੋਂ ਬਾਅਦ, ਜੋਧਪੁਰ ਜੇਲ੍ਹ ਤੋਂ ਰਿਹਾਈ ਲਈ ਲਗਭਗ 10 ਦਿਨ ਲੱਗ ਗਏ ਸਨ, ਅਤੇ ਆਸਾਰਾਮ ਨੂੰ 7 ਅਪ੍ਰੈਲ ਨੂੰ ਰਿਹਾਅ ਕਰ ਦਿੱਤਾ ਗਿਆ ਸੀ। ਇਸ ਲਈ, ਉਨ੍ਹਾਂ ਨੇ ਅਦਾਲਤ ਤੋਂ ਦੋ ਹੋਰ ਦਿਨ ਮੰਗੇ ਤਾਂ ਜੋ ਦਸਤਾਵੇਜ਼ ਸਮੇਂ ਸਿਰ ਦਾਇਰ ਕੀਤੇ ਜਾ ਸਕਣ ਅਤੇ ਬਚਾਅ ਪੱਖ ਉਨ੍ਹਾਂ ਦੀ ਜਾਂਚ ਕਰ ਸਕੇ।
ਅਦਾਲਤ ਦਾ ਕੀ ਹੁਕਮ ਸੀ?
ਅਦਾਲਤ ਨੇ ਆਪਣੇ ਹੁਕਮ ਵਿੱਚ ਕਿਹਾ, “ਮੌਜੂਦਾ ਮਾਮਲੇ ਦੇ ਵਿਸ਼ੇਸ਼ ਤੱਥਾਂ, ਖਾਸ ਕਰਕੇ ਨਾਲਸਾ ਤੋਂ ਸਰਟੀਫਿਕੇਟ ਪ੍ਰਾਪਤ ਕਰਨ ਦੀ ਪ੍ਰਕਿ ਰਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਅਸੀਂ ਅਸਥਾਈ ਜ਼ਮਾਨਤ ਦੀ ਮਿਆਦ 7 ਜੁਲਾਈ ਤੱਕ ਵਧਾ ਰਹੇ ਹਾਂ।” ਹੁਣ ਇਸ ਮਾਮਲੇ ਦੀ ਅਗਲੀ ਸੁਣਵਾਈ 2 ਜੁਲਾਈ, 2025 ਨੂੰ ਹੋਣੀ ਹੈ।
ਆਸਾਰਾਮ ਵਿਰੁੱਧ ਮਾਮਲੇ ਦਾ ਪੂਰਾ ਸੰਦਰਭ
ਗਾਂਧੀਨਗਰ ਦੀ ਇੱਕ ਅਦਾਲਤ ਨੇ ਜਨਵਰੀ 2023 ਵਿੱਚ ਆਸਾਰਾਮ ਨੂੰ ਇਕ ਮਹਿਲਾ ਅਨੁਯਾਈ ਨਾਲ 2001 ਤੋਂ 2006 ਦੇ ਵਿਚਕਾਰ ਵਾਰ-ਵਾਰ ਬਲਾਤਕਾਰ ਕਰਨ ਦੇ ਦੋਸ਼ ਵਿੱਚ ਉਮਰ ਕੈਦ ਦੀ ਸਜ਼ਾ ਸੁਣਾਈ ਸੀ। ਇਸ ਤੋਂ ਪਹਿਲਾਂ, ਉਹ 2013 ਵਿੱਚ ਰਾਜਸਥਾਨ ਦੇ ਜੋਧਪੁਰ ਆਸ਼ਰਮ ਵਿੱਚ ਇਕ ਨਾਬਾਲਗ ਲੜਕੀ ਦੇ ਜਿਨਸੀ ਸ਼ੋਸ਼ਣ ਦੇ ਮਾਮਲੇ ਵਿੱਚ ਵੀ ਉਮਰ ਕੈਦ ਦੀ ਸਜ਼ਾ ਕੱਟ ਰਿਹਾ ਹੈ। ਇਹ ਆਸਾਰਾਮ ਵਿਰੁੱਧ ਦੋ ਮਾਮਲੇ ਦੇਸ਼ ਭਰ ਵਿੱਚ ਔਰਤਾਂ ਦੀ ਸੁਰੱਖਿਆ ਅਤੇ ਧਾਰਮਿਕ ਗੁਰੂਆਂ ਦੀ ਜਵਾਬਦੇਹੀ ‘ਤੇ ਗੰਭੀਰ ਸਵਾਲ ਖੜ੍ਹੇ ਕਰਦੇ ਹਨ।
