ਚੀਨ : ਦੱਖਣ-ਪੱਛਮੀ ਚੀਨ ਦੇ ਗੁਈਝੌ ਸੂਬੇ ਦੇ ਰੋਂਗਜਿਆਂਗ ਕਾਉਂਟੀ ਵਿੱਚ ਹੜ੍ਹਾਂ ਨੇ ਤਬਾਹੀ ਮਚਾ ਦਿੱਤੀ ਹੈ। ਸਥਾਨਕ ਹੜ੍ਹ ਕੰਟਰੋਲ ਅਧਿਕਾਰੀਆਂ ਨੇ ਪੁਸ਼ਟੀ ਕੀਤੀ ਹੈ ਕਿ ਛੇ ਲੋਕਾਂ ਦੀ ਮੌਤ ਹੋ ਗਈ ਹੈ। ਕਾਉਂਟੀ ਵਿੱਚ ਕਈ ਨਦੀਆਂ ਵਿੱਚ ਪਾਣੀ ਦਾ ਪੱਧਰ ਤੇਜ਼ੀ ਨਾਲ ਵੱਧ ਰਿਹਾ ਹੈ। ਵੱਧ ਤੋਂ ਵੱਧ ਵਹਾਅ 11,360 ਘਣ ਮੀਟਰ ਪ੍ਰਤੀ ਸਕਿੰਟ ਤੱਕ ਪਹੁੰਚ ਗਿਆ ਹੈ। ਹੜ੍ਹ ਨੇ ਕਈ ਨੀਵੇਂ ਇਲਾਕਿਆਂ ਨੂੰ ਡੋਬ ਦਿੱਤਾ ਹੈ। ਕਈ ਸ਼ਹਿਰਾਂ ਵਿੱਚ ਬੁਨਿਆਦੀ ਢਾਂਚਾ ਬੁਰੀ ਤਰ੍ਹਾਂ ਨੁਕਸਾਨਿਆ ਗਿਆ ਹੈ, ਸੜਕਾਂ ਬੰਦ ਹੋ ਗਈਆਂ ਹਨ। ਸੰਚਾਰ ਵਿਵਸਥਾ ਵਿਘਨ ਪਈ ਹੈ ਅਤੇ ਲੋਕ ਫਸੇ ਹੋਏ ਹਨ।
ਚੀਨ ਵਿੱਚ ਹੜ੍ਹਾਂ ਨੇ ਭਾਰੀ ਤਬਾਹੀ ਮਚਾਈ , ਛੇ ਲੋਕਾਂ ਦੀ ਮੌਤ
ਇਸ ਵੇਲੇ, ਜ਼ਿਲ੍ਹਾ ਹੈੱਡਕੁਆਰਟਰ ਵਿੱਚ ਪਾਣੀ ਦਾ ਪੱਧਰ ਚੇਤਾਵਨੀ ਪੱਧਰ ਤੋਂ ਹੇਠਾਂ ਆ ਗਿਆ ਹੈ। ਬਚਾਅ ਟੀਮਾਂ ਪਾਣੀ ਦੀ ਨਿਕਾਸੀ, ਮਹਾਂਮਾਰੀ ਨੂੰ ਰੋਕਣ, ਪ੍ਰਭਾਵਿਤ ਖੇਤਰਾਂ ਨੂੰ ਕੀਟਾਣੂ ਰਹਿਤ ਕਰਨ, ਆਫ਼ਤ ਤੋਂ ਬਾਅਦ ਦੀ ਰਿਕਵਰੀ ਸ਼ੁਰੂ ਕਰਨ ਅਤੇ ਹੜ੍ਹਾਂ ਵਿੱਚ ਫਸੇ ਲੋਕਾਂ ਦੀ ਭਾਲ ਕਰਨ ਦੀ ਕੋਸ਼ਿਸ਼ ਕਰ ਰਹੀਆਂ ਹਨ।
ਇਸ ਤੋਂ ਪਹਿਲਾਂ 25 ਜੂਨ ਨੂੰ, ਚੀਨ ਦੇ ਰਾਸ਼ਟਰੀ ਵਿਕਾਸ ਅਤੇ ਸੁਧਾਰ ਕਮਿਸ਼ਨ (ਐਨ.ਡੀ.ਆਰ.ਸੀ.) ਨੇ ਦੱਖਣ-ਪੱਛਮੀ ਚੀਨ ਦੇ ਗੁਈਝੌ ਸੂਬੇ ਵਿੱਚ ਆਫ਼ਤ ਰਾਹਤ ਯਤਨਾਂ ਦਾ ਸਮਰਥਨ ਕਰਨ ਲਈ 100 ਮਿਲੀਅਨ ਯੂਆਨ (ਲਗਭਗ $13.95 ਮਿਲੀਅਨ) ਅਲਾਟ ਕੀਤੇ ਸਨ। ਐਨ.ਡੀ.ਆਰ.ਸੀ. ਨੇ ਕਿਹਾ ਕਿ ਫੰਡਾਂ ਦੀ ਵਰਤੋਂ ਗੁਈਝੌ ਵਿੱਚ ਜ਼ਰੂਰੀ ਬੁਨਿਆਦੀ ਢਾਂਚੇ ਅਤੇ ਜਨਤਕ ਸੇਵਾਵਾਂ, ਜਿਵੇਂ ਕਿ ਸੜਕਾਂ, ਹੜ੍ਹ ਕੰਟਰੋਲ ਪ੍ਰਣਾਲੀਆਂ, ਹਸਪਤਾਲਾਂ ਅਤੇ ਸਕੂਲਾਂ ਨੂੰ ਬਹਾਲ ਕਰਨ ਲਈ ਕੀਤੀ ਜਾਵੇਗੀ।
ਵੱਡੀ ਗਿਣਤੀ ਵਿੱਚ ਲੋਕਾਂ ਆਪਣੇ ਘਰ ਖਾਲੀ ਕਰਨ ਲਈ ਹੋਏ ਮਜਬੂਰ
ਐਨ.ਡੀ.ਆਰ.ਸੀ. ਨੇ ਕਿਹਾ ਕਿ ਦੱਖਣੀ ਅਤੇ ਮੱਧ ਚੀਨ ਵਿੱਚ ਗੁਆਂਗਡੋਂਗ ਅਤੇ ਹੁਨਾਨ ਪ੍ਰਾਂਤਾਂ ਲਈ 100 ਮਿਲੀਅਨ ਯੂਆਨ ਰੱਖੇ ਗਏ ਹਨ ਤਾਂ ਜੋ ਜਲਦੀ ਤੋਂ ਜਲਦੀ ਆਮ ਜੀਵਨ ਬਹਾਲ ਕੀਤਾ ਜਾ ਸਕੇ। ਲਗਾਤਾਰ ਭਾਰੀ ਮੀਂਹ ਅਤੇ ਉੱਪਰਲੇ ਖੇਤਰਾਂ ਵਿੱਚ ਪਾਣੀ ਦੇ ਓਵਰਫਲੋਅ ਕਾਰਨ ਦੱਖਣ-ਪੱਛਮੀ ਚੀਨ ਦੇ ਗੁਈਝੌ ਸੂਬੇ ਵਿੱਚ ਦੋ ਕਾਉਂਟੀਆਂ ਵਿੱਚ ਗੰਭੀਰ ਹੜ੍ਹ ਆ ਗਏ ਹਨ, ਜਿਸ ਕਾਰਨ ਵੱਡੀ ਗਿਣਤੀ ਵਿੱਚ ਲੋਕਾਂ ਨੂੰ ਆਪਣੇ ਘਰ ਖਾਲੀ ਕਰਨ ਲਈ ਮਜਬੂਰ ਹੋਣਾ ਪਿਆ ਹੈ। ਹੁਣ ਤੱਕ, ਰੋਂਗਜਿਆਂਗ ਕਾਉਂਟੀ ਵਿੱਚ 48,900 ਤੋਂ ਵੱਧ ਲੋਕਾਂ ਅਤੇ ਕਾਂਗਜਿਆਂਗ ਕਾਉਂਟੀ ਵਿੱਚ 32,000 ਤੋਂ ਵੱਧ ਲੋਕਾਂ ਨੂੰ ਅਸਥਾਈ ਤੌਰ ‘ਤੇ ਬਾਹਰ ਕੱਢਿਆ ਗਿਆ ਹੈ।
