ਮੁੰਬਈ : ਬਾਲੀਵੁੱਡ ਅਤੇ ਸੰਗੀਤ ਜਗਤ ਵਿੱਚ ਬੀਤੀ ਸ਼ਾਮ 27 ਜਨਵਰੀ, 2026 ਨੂੰ ਇੱਕ ਇਤਿਹਾਸਕ ਅਤੇ ਹੈਰਾਨ ਕਰਨ ਵਾਲਾ ਐਲਾਨ ਮਿਲਿਆ ਹੈ। ਦੇਸ਼ ਦੇ ਸਭ ਤੋਂ ਮਸ਼ਹੂਰ ਅਤੇ ਪ੍ਰਭਾਵਸ਼ਾਲੀ ਪਲੇਬੈਕ ਗਾਇਕਾਂ ਵਿੱਚੋਂ ਇੱਕ, ਅਰਿਜੀਤ ਸਿੰਘ ਨੇ ਸੋਸ਼ਲ ਮੀਡੀਆ ਰਾਹੀਂ ਐਲਾਨ ਕੀਤਾ ਕਿ ਉਹ ਹੁਣ ਕੋਈ ਵੀ ਨਵਾਂ ਪਲੇਬੈਕ ਗਾਇਕੀ ਦਾ ਕੰਮ ਨਹੀਂ ਲੈਣਗੇ। ਉਨ੍ਹਾਂ ਦੇ ਇਸ ਫ਼ੈੈਸਲੇ ਨੇ ਪ੍ਰਸ਼ੰਸਕਾਂ, ਉਦਯੋਗ ਅਤੇ ਸੰਗੀਤ ਪ੍ਰੇਮੀਆਂ ਵਿੱਚ ਇੱਕ ਡੂੰਘੀ ਪ੍ਰਤੀਕਿ ਰਿਆ ਅਤੇ ਭਾਵਨਾਤਮਕ ਹਲਚਲ ਪੈਦਾ ਕਰ ਦਿੱਤੀ ਹੈ।
ਅਰਿਜੀਤ ਨੇ ਆਪਣੀ ਇੰਸਟਾਗ੍ਰਾਮ ਪੋਸਟ ਵਿੱਚ ਲਿਖਿਆ, “ਹੈਲੋ, ਸਾਰਿਆਂ ਨੂੰ ਨਵਾਂ ਸਾਲ ਮੁਬਾਰਕ। ਮੈਂ ਤੁਹਾਡੇ ਸਾਰਿਆਂ ਦਾ ਸਾਲਾਂ ਤੋਂ ਤੁਹਾਡੇ ਪਿਆਰ ਲਈ ਧੰਨਵਾਦ ਕਰਨਾ ਚਾਹੁੰਦਾ ਹਾਂ। ਮੈਨੂੰ ਇਹ ਦੱਸਦੇ ਹੋਏ ਖੁਸ਼ੀ ਹੋ ਰਹੀ ਹੈ ਕਿ ਮੈਂ ਹੁਣ ਇੱਕ ਪਲੇਬੈਕ ਗਾਇਕ ਵਜੋਂ ਕੋਈ ਨਵਾਂ ਕੰਮ ਨਹੀਂ ਲਵਾਂਗਾ। ਮੈਂ ਇਸਨੂੰ ਖਤਮ ਕਰ ਰਿਹਾ ਹਾਂ – ਇਹ ਇੱਕ ਸ਼ਾਨਦਾਰ ਯਾਤਰਾ ਰਹੀ ਹੈ।”
ਅਰਿਜੀਤ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਉਹ ਸੰਗੀਤ ਤੋਂ ਪੂਰੀ ਤਰ੍ਹਾਂ ਸੰਨਿਆਸ ਨਹੀਂ ਲੈ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਉਹ ਸੰਗੀਤ ਵਿੱਚ ਸ਼ਾਮਲ ਰਹਿਣਗੇ, ਆਪਣੇ ਨਿੱਜੀ ਅਤੇ ਸੁਤੰਤਰ ਸੰਗੀਤ ਪ੍ਰੋਜੈਕਟਾਂ ‘ਤੇ ਕੰਮ ਕਰਨਗੇ ਅਤੇ ਮੌਜੂਦਾ ਪੈਡਿੰਗ ਕੰਮ ਪੂਰੇ ਕਰਨਗੇ। ਇਸਦਾ ਮਤਲਬ ਹੈ ਕਿ ਕੁਝ ਰਿਕਾਰਡ ਕੀਤੇ ਗੀਤ 2026 ਵਿੱਚ ਰਿਲੀਜ਼ ਹੋ ਸਕਦੇ ਹਨ, ਪਰ ਉਹ ਹੁਣ ਕੋਈ ਵੀ ਨਵਾਂ ਬਾਲੀਵੁੱਡ ਪਲੇਬੈਕ ਪ੍ਰੋਜੈਕਟ ਸਵੀਕਾਰ ਨਹੀਂ ਕਰਨਗੇ।
ਉਨ੍ਹਾਂ ਦੇ ਇਸ ਫ਼ੈਸਲੇ ਤੋਂ ਬਾਅਦ ਸੋਸ਼ਲ ਮੀਡੀਆ ‘ਤੇ ਭਾਰੀ ਪ੍ਰਤੀਕਿਰਿਆ ਦੇਖਣ ਨੂੰ ਮਿਲੀ ਹੈ। ਬਹੁਤ ਸਾਰੇ ਪ੍ਰਸ਼ੰਸਕਾਂ ਨੇ ਉਦਾਸੀ, ਸਦਮਾ ਅਤੇ ਭਾਵਨਾਤਮਕ ਪ੍ਰਤੀਕਿਰਿਆਵਾਂ ਪ੍ਰਗਟ ਕੀਤੀਆਂ, ਕੁਝ ਨੇ ਲਿਖਿਆ ਕਿ “ਬਾਲੀਵੁੱਡ ਸੰਗੀਤ ਉਨ੍ਹਾਂ ਦੇ ਬਿਨਾਂ ਅਧੂਰਾ ਮਹਿਸੂਸ ਹੁੰਦਾ ਹੈ,” ਜਦੋਂ ਕਿ ਕੁਝ ਨੇ ਉਨ੍ਹਾਂ ਦੇ ਨਵੇਂ ਕਲਾਤਮਕ ਸਫ਼ਰ ਦੇ ਲਈ ਸ਼ੁੱਭਕਾਮਨਾਵਾਂ ਦਿੱਤੀਆਂ।
ਦੱਸ ਦੇਈਏ ਕਿ ਅਰਿਜੀਤ ਸਿੰਘ ਦਾ ਕਰੀਅਰ 2005 ਵਿੱਚ ਫੇਮ ਗੁਰੂਕੁਲ ਵਰਗੇ ਰਿਐਲਿਟੀ ਸ਼ੋਅ ਨਾਲ ਸ਼ੁਰੂ ਹੋਇਆ ਸੀ, ਅਤੇ ਉਨਾਂ ਨੇ 2011 ਵਿੱਚ ਫਿਲਮ ਮਰਡਰ 2 ਵਿੱਚ ਆਪਣਾ ਪਲੇਬੈਕ ਡੈਬਿਊ ਕੀਤਾ ਸੀ। ਹਾਲਾਂਕਿ, 2013 ਵਿੱਚ ਫਿਲਮ ਆਸ਼ਿਕੀ 2 ਦੇ ਗੀਤ “ਤੁਮ ਹੀ ਹੋ” ਨੇ ਉਨ੍ਹਾਂ ਨੂੰ ਰਾਤੋ-ਰਾਤ ਸੁਪਰਸਟਾਰ ਬਣਾ ਦਿੱਤਾ। ਉਨ੍ਹਾਂ ਨੇ ਬਾਅਦ ਵਿੱਚ “ਚੰਨਾ ਮੇਰਿਆ,” “ਕੇਸਰੀਆ,” “ਏ ਦਿਲ ਹੈ ਮੁਸ਼ਕਲ,” ਅਤੇ “ਹਵਾਏਂ” ਵਰਗੇ ਕਈ ਹਿੱਟ ਗੀਤਾਂ ਨੂੰ ਆਪਣੀ ਆਵਾਜ਼ ਦਿੱਤੀ – ਇਹ ਗੀਤ ਅੱਜ ਵੀ ਸੰਗੀਤ ਪ੍ਰੇਮੀਆਂ ਦੇ ਦਿਲਾਂ ਵਿੱਚ ਉੱਕਰੇ ਹੋਏ ਹਨ।
