ਬਿਹਾਰ: ਦਿੱਲੀ ਦੀ ਮੁੱਖ ਮੰਤਰੀ ਰੇਖਾ ਗੁਪਤਾ ਬਿਹਾਰ ਵਿਧਾਨ ਸਭਾ ਚੋਣਾਂ ਵਿੱਚ ਪ੍ਰਚਾਰ ਕਰਨਗੇ ਅਤੇ ਉਪ ਮੁੱਖ ਮੰਤਰੀ ਵਿਜੇ ਸਿਨਹਾ ਵੱਲੋਂ ਨਾਮਜ਼ਦਗੀ ਪੱਤਰ ਦਾਖਲ ਕਰਨ ਵੇਲੇ ਮੌਜੂਦ ਰਹਿਣਗੇ, ਅਧਿਕਾਰੀਆਂ ਨੇ ਬੀਤੇ ਦਿਨ ਇਹ ਜਾਣਕਾਰੀ ਦਿੱਤੀ ।
ਵਿਜੇ ਸਿਨਹਾ ਲਖੀਸਰਾਏ ਤੋਂ ਦਾਖਲ ਕਰਨਗੇ ਆਪਣਾ ਨਾਮਜ਼ਦਗੀ ਪੱਤਰ , ਦਿੱਲੀ ਦੀ ਮੁੱਖ ਮੰਤਰੀ ਰਹਿਣਗੇ ਮੌਜੂਦ
ਰੇਖਾ ਗੁਪਤਾ 14 ਭਾਜਪਾ ਸ਼ਾਸਿਤ ਰਾਜਾਂ ਵਿੱਚ ਇਕਲੌਤੇ ਮਹਿਲਾ ਮੁੱਖ ਮੰਤਰੀ ਹਨ। ਦਿੱਲੀ ਦੇ ਮੁੱਖ ਮੰਤਰੀ ਦਫ਼ਤਰ (ਸੀ.ਐਮ.ਓ.) ਦੇ ਅਨੁਸਾਰ, ਉਹ ਅੱਜ , ਬੁੱਧਵਾਰ ਨੂੰ ਲਖੀਸਰਾਏ ਪਹੁੰਚ ਕੇ ਸਿਨਹਾ ਦੇ ਨਾਮਜ਼ਦਗੀ ਪੱਤਰ ਦਾਖਲ ਕਰਦੇ ਸਮੇਂ ਉਨ੍ਹਾਂ ਦੇ ਨਾਲ ਰਹਿਣਗੇ ਅਤੇ ਕੇ.ਆਰ.ਕੇ. ਗਰਾਊਂਡ ਵਿੱਚ ਇੱਕ ਜਨਤਕ ਮੀਟਿੰਗ ਨੂੰ ਸੰਬੋਧਨ ਕਰਨਗੇ।
ਸੁਨੀਲ ਕੁਮਾਰ ਬਿਹਾਰ ਸ਼ਰੀਫ ਵਿੱਚ ਅੱਜ ਦਾਖਲ ਕਰਨਗੇ ਆਪਣਾ ਨਾਮਜ਼ਦਗੀ ਪੱਤਰ
ਦੂਜੇ ਪਾਸੇ, ਬਿਹਾਰ ਸ਼ਰੀਫ ਸੀਟ ਤੋਂ ਭਾਜਪਾ ਉਮੀਦਵਾਰ ਅਤੇ ਸੀਨੀਅਰ ਸੂਬਾਈ ਨੇਤਾ ਡਾ. ਸੁਨੀਲ ਕੁਮਾਰ ਵੀ ਅੱਜ ਆਪਣਾ ਨਾਮਜ਼ਦਗੀ ਪੱਤਰ ਦਾਖਲ ਕਰਨਗੇ। ਸੁਨੀਲ ਕੁਮਾਰ ਦੇ ਸਮਰਥਨ ਵਿੱਚ ਰੇਖਾ ਗੁਪਤਾ ਇੱਕ ਜਨਤਕ ਮੀਟਿੰਗ ਨੂੰ ਵੀ ਸੰਬੋਧਨ ਕਰਨਗੇ। ਅਧਿਕਾਰੀਆਂ ਨੇ ਕਿਹਾ ਕਿ ਮੁੱਖ ਮੰਤਰੀ ਗੁਪਤਾ ਉਸੇ ਦਿਨ ਦਿੱਲੀ ਵਾਪਸ ਆਉਣਗੇ।
ਛੇ ਦਿਨਾਂ ਲਈ ਬਿਹਾਰ ਵਿੱਚ ਪ੍ਰਚਾਰ ਕਰਨਗੇ ਰੇਖਾ ਗੁਪਤਾ
ਭਾਜਪਾ ਆਗੂਆਂ ਨੇ ਦਾਅਵਾ ਕੀਤਾ ਕਿ ਇਸ ਸਾਲ ਫਰਵਰੀ ਵਿੱਚ ਦਿੱਲੀ ਦੇ ਮੁੱਖ ਮੰਤਰੀ ਬਣੇ ਗੁਪਤਾ ਦੀ ਬਿਹਾਰ ਚੋਣਾਂ ਵਿੱਚ ਪ੍ਰਚਾਰ ਕਰਨ ਲਈ ਬਹੁਤ ਮੰਗ ਹੈ। ਉਨ੍ਹਾਂ ਕਿਹਾ ਕਿ ਉਹ ਚੋਣਾਂ ਦੇ ਦੋਵਾਂ ਪੜਾਵਾਂ ਦੌਰਾਨ ਬਿਹਾਰ ਦੇ ਵੱਖ-ਵੱਖ ਵਿਧਾਨ ਸਭਾ ਹਲਕਿਆਂ ਵਿੱਚ ਘੱਟੋ-ਘੱਟ ਛੇ ਦਿਨ ਪ੍ਰਚਾਰ ਕਰਨਗੇ। ਇੱਕ ਪਾਰਟੀ ਨੇਤਾ ਨੇ ਕਿਹਾ, “ਬਿਹਾਰ ਚੋਣਾਂ ਦਾ ਨਤੀਜਾ ਜ਼ਿਆਦਾਤਰ ਔਰਤਾਂ ਦੀ ਵੋਟਿੰਗ ‘ਤੇ ਨਿਰਭਰ ਕਰੇਗਾ। ਗੁਪਤਾ, ਭਾਜਪਾ ਸ਼ਾਸਿਤ ਰਾਜ ਵਿੱਚ ਇਕਲੌਤੇ ਮਹਿਲਾ ਮੁੱਖ ਮੰਤਰੀ ਹੋਣ ਤੋਂ ਇਲਾਵਾ, ਇੱਕ ਚੰਗੇ ਬੁਲਾਰੇ ਵੀ ਹਨ ਜੋ ਸਿੱਧੀ ਗੱਲਬਾਤ ਰਾਹੀਂ ਲੋਕਾਂ ਨਾਲ ਜੁੜਦੇ ਹਨ।” ਬਿਹਾਰ ਵਿਧਾਨ ਸਭਾ ਚੋਣਾਂ 6 ਅਤੇ 11 ਨਵੰਬਰ ਨੂੰ ਦੋ ਪੜਾਵਾਂ ਵਿੱਚ ਹੋਣਗੀਆਂ। ਵੋਟਾਂ ਦੀ ਗਿਣਤੀ 14 ਨਵੰਬਰ ਨੂੰ ਹੋਵੇਗੀ।
