ਫਤਿਹਾਬਾਦ : ਫਤਿਹਾਬਾਦ ਤੋਂ ਇਸ ਸਮੇਂ ਦੀ ਵੱਡੀ ਖਬਰ ਸਾਹਮਣੇ ਆ ਰਹੀ ਹੈ, ਜਿੱਥੇ ਸੀ.ਆਈ.ਏ ਫਤਿਹਾਬਾਦ ਪੁਲਿਸ ਨੇ ਨਾਜਾਇਜ਼ ਸ਼ਰਾਬ ਦੀ ਵੱਡੀ ਖੇਪ ਬਰਾਮਦ ਕੀਤੀ ਹੈ। ਪੁਲਿਸ ਨੇ NH-9 ‘ਤੇ ਬੜੋਪਾਲ ਇਲਾਕੇ ‘ਚ ਗੁਜਰਾਤ ਨੰਬਰ ਦੇ ਟਰੱਕ ‘ਚੋਂ ਅੰਗਰੇਜ਼ੀ ਸ਼ਰਾਬ ਦੀਆਂ 800 ਪੇਟੀਆਂ ਬਰਾਮਦ ਕੀਤੀਆਂ ਹਨ। ਟਰੱਕ ਵਿੱਚ ਲੱਦਿਆ ਰੂੰ ਦੀਆਂ ਗੰਢਾਂ ਵਿੱਚ ਛੁਪਾ ਕੇ ਸ਼ਰਾਬ ਲਿਜਾਈ ਜਾ ਰਹੀ ਸੀ।
ਪੁਲਿਸ ਅਨੁਸਾਰ 2 ਅਕਤੂਬਰ ਨੂੰ ਸੀ.ਆਈ.ਏ. ਦੀ ਟੀਮ ਨਜਾਇਜ਼ ਸ਼ਰਾਬ ਦੀ ਤਸਕਰੀ ਨੂੰ ਰੋਕਣ ਅਤੇ ਅਪਰਾਧਾਂ ਨੂੰ ਰੋਕਣ ਲਈ ਧਰਨੀਆਂ ਟੀ-ਪੁਆਇੰਟ ਬੜੋਪਾਲ ਨੇੜੇ ਮੌਜੂਦ ਸੀ। ਇਸੇ ਦੌਰਾਨ ਪੁਲਿਸ ਨੂੰ ਸੂਚਨਾ ਮਿਲੀ ਕਿ ਬੜੋਪਾਲ ਪੁਲ ਤੋਂ ਪਿੰਡ ਬੜੋਪਾਲ ਵੱਲ ਨੂੰ NH-9 ’ਤੇ ਇੱਕ ਗੁਜਰਾਤ ਨੰਬਰ ਦਾ ਟਰੱਕ ਸ਼ੱਕੀ ਹਾਲਤ ਵਿੱਚ ਖੜ੍ਹਾ ਹੈ। ਸੂਚਨਾ ਦੇ ਆਧਾਰ ‘ਤੇ ਪੁਲਿਸ ਟੀਮ ਨੇ ਮੌਕੇ ‘ਤੇ ਪਹੁੰਚ ਕੇ ਹਰੇ ਰੰਗ ਦੀ ਤਰਪਾਲ ਨਾਲ ਢੱਕੇ ਟਾਟਾ ਐਲ.ਪੀ.ਟੀ. ਟਰੱਕ ਨੰਬਰ ਜੀ.ਜੇ-08ਵਾਈ-8184 ਦੀ ਜਾਂਚ ਕੀਤੀ। ਤਲਾਸ਼ੀ ਦੌਰਾਨ ਨਰਮੇ ਦੀਆਂ ਗੰਢਾਂ ਵਿਚਕਾਰ ਛੁਪੀ ਹੋਈ ਅੰਗਰੇਜ਼ੀ ਸ਼ਰਾਬ ਦੀ ਵੱਡੀ ਖੇਪ ਬਰਾਮਦ ਹੋਈ। ਗਿਣਨ ‘ਤੇ ਕੁੱਲ 800 ਪੇਟੀਆਂ ਸ਼ਰਾਬ ਬਰਾਮਦ ਹੋਈ।
ਖਾਸ ਗੱਲ ਇਹ ਹੈ ਕਿ ਬਰਾਮਦ ਕੀਤੇ ਗਏ ਸ਼ਰਾਬ ਦੇ ਡੱਬਿਆਂ ‘ਤੇ ‘ਫੌਰ ਸੇਲ ਇਨ ਪੰਜਾਬ ਓਨਲੀ’ ਲਿ ਖਿਆ ਹੋਇਆ ਸੀ। ਟਰੱਕ ਡਰਾਈਵਰ ਮੌਕੇ ਤੋਂ ਫਰਾਰ ਹੋ ਗਿਆ। ਪੁਲਿਸ ਨੇ ਸ਼ਰਾਬ ਅਤੇ ਟਰੱਕ ਨੂੰ ਕਬਜ਼ੇ ‘ਚ ਲੈ ਕੇ ਥਾਣਾ ਸਦਰ ਫਤਿਹਾਬਾਦ ਵਿਖੇ ਆਬਕਾਰੀ ਐਕਟ ਦੀ ਧਾਰਾ 61-4-20 ਅਧੀਨ ਮੁਕੱਦਮਾ ਨੰਬਰ 400 , ਮਿਤੀ 03 ਅਕਤੂਬਰ 2026 ਦਰਜ ਕਰ ਲਿਆ ਹੈ। ਹੁਣ ਪੁਲਿਸ ਇਸ ਗੱਲ ਦੀ ਜਾਂਚ ਵਿੱਚ ਜੁਟੀ ਹੋਈ ਹੈ ਕਿ ਸ਼ਰਾਬ ਦੀ ਇਹ ਖੇਪ ਕਿੱਥੋਂ ਲਿਆਂਦੀ ਗਈ ਅਤੇ ਕਿੱਥੇ ਸਪਲਾਈ ਕੀਤੀ ਜਾਣੀ ਸੀ। ਨਾਲ ਹੀ, ਪੁਲਿਸ ਸਮੁੱਚੀ ਸਪਲਾਈ ਚੇਨ ਅਤੇ ਤਸਕਰੀ ਦੇ ਨੈਟਵਰਕ ਨੂੰ ਟਰੇਸ ਕਰਨ ਵਿੱਚ ਰੁੱਝੀ ਹੋਈ ਹੈ।
