ਚੰਡੀਗੜ੍ਹ: ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ (CBSA) ਨੇ ਜਬਰੀ ਵਸੂਲੀ ਅਤੇ ਸੰਗਠਿਤ ਅਪਰਾਧ ਨਾਲ ਜੁੜੀਆਂ ਗਤੀਵਿਧੀਆਂ ਦੇ ਮਾਮਲਿਆਂ ਵਿੱਚ ਪੰਜਾਬ ਨਾਲ ਸਬੰਧਤ ਚਾਰ ਭਾਰਤੀ ਨਾਗਰਿਕਾਂ ਨੂੰ ਕੈਨੇਡਾ ਤੋਂ ਡਿਪੋਰਟ ਕੀਤਾ ਹੈ। ਏਜੰਸੀ ਵੱਲੋਂ ਜਾਰੀ ਜਾਣਕਾਰੀ ਮੁਤਾਬਕ ਡਿਪੋਰਟ ਕੀਤੇ ਗਏ ਵਿਅਕਤੀਆਂ ਦੇ ਨਾਮ ਪਲਵਿੰਦਰ ਸਿੰਘ, ਜਸਮੇਰ ਸਿੰਘ, ਅਮਿਤੋਜ਼ ਬਾਜਵਾ ਅਤੇ ਸਾਹਿਬਜੋਤ ਸਿੰਘ ਹਨ।
CBSA ਮੁਤਾਬਕ ਚਾਰਾਂ ਮਾਮਲਿਆਂ ਵਿੱਚ ਵਿਅਕਤੀਆਂ ਨੂੰ ਕੈਨੇਡਾ ਦੇ Immigration and Refugee Protection Act (IRPA) ਤਹਿਤ ਦੇਸ਼ ਵਿੱਚ ਰਹਿਣ ਲਈ ਅਯੋਗ ਪਾਇਆ ਗਿਆ। ਪਲਵਿੰਦਰ ਸਿੰਘ ਨੂੰ 2025 ਦੀ ਪਤਝੜ ਵਿੱਚ ਜਬਰੀ ਵਸੂਲੀ ਨਾਲ ਜੁੜੀ ਗੋਲੀਬਾਰੀ ਦੇ ਮਾਮਲੇ ਨਾਲ ਸਬੰਧਤ ਇੱਕ ਅਪਰਾਧਿਕ ਸੰਗਠਨ ਦਾ ਮੈਂਬਰ ਪਾਏ ਜਾਣ ਤੋਂ ਬਾਅਦ ਹਟਾਇਆ ਗਿਆ। ਇਮੀਗ੍ਰੇਸ਼ਨ ਐਂਡ ਰਿਫਿਊਜੀ ਬੋਰਡ ਆਫ਼ ਕੈਨੇਡਾ ਨੇ ਉਸਨੂੰ ਕੈਨੇਡਾ ਵਿੱਚ ਰਹਿਣ ਲਈ ਅਯੋਗ ਕਰਾਰ ਦਿੱਤਾ ਸੀ।
ਜਸਮੇਰ ਸਿੰਘ ਨੂੰ ਕੈਨੇਡਾ ਵਿੱਚ ਜ਼ਬਰਦਸਤੀ ਕਿਸੇ ਵਿਅਕਤੀ ਨੂੰ ਬੰਦੀ ਬਣਾਉਣ ਦੇ ਮਾਮਲੇ ਵਿੱਚ ਦੋਸ਼ੀ ਠਹਿਰਾਏ ਜਾਣ ਤੋਂ ਬਾਅਦ ਗੰਭੀਰ ਅਪਰਾਧਿਕਤਾ ਦੇ ਆਧਾਰ ’ਤੇ ਅਯੋਗ ਪਾਇਆ ਗਿਆ। ਉਸਦੇ ਖ਼ਿਲਾਫ਼ ਡਿਪੋਰਟੇਸ਼ਨ ਆਰਡਰ ਜਾਰੀ ਹੋਣ ਤੋਂ ਬਾਅਦ ਉਸਨੂੰ ਕੈਨੇਡਾ ਤੋਂ ਹਟਾਇਆ ਗਿਆ।
ਇਸੇ ਤਰ੍ਹਾਂ ਅਮਿਤੋਜ਼ ਬਾਜਵਾ ਨੂੰ ਅਜਿਹੇ ਸੰਗਠਨ ਨਾਲ ਸਬੰਧਾਂ ਕਾਰਨ ਅਯੋਗ ਪਾਇਆ ਗਿਆ ਜਿਸ ’ਤੇ ਲਗਾਤਾਰ ਅਪਰਾਧਿਕ ਗਤੀਵਿਧੀਆਂ ਵਿੱਚ ਸ਼ਾਮਲ ਹੋਣ ਦੇ ਦੋਸ਼ ਸਨ। CBSA ਮੁਤਾਬਕ ਉਸਦਾ ਸਬੰਧ ਹਥਿਆਰਾਂ ਨਾਲ ਜੁੜੀ ਗਤੀਵਿਧੀ ਅਤੇ ਜਬਰੀ ਵਸੂਲੀ ਨਾਲ ਸਬੰਧਤ ਗੋਲੀਬਾਰੀ ਨਾਲ ਵੀ ਜੋੜਿਆ ਗਿਆ ਸੀ। ਸਾਹਿਬਜੋਤ ਸਿੰਘ ਨੂੰ ਵੀ ਅਜਿਹੇ ਸੰਗਠਨ ਨਾਲ ਸਬੰਧਾਂ ਕਾਰਨ ਅਯੋਗ ਪਾਇਆ ਗਿਆ ਅਤੇ CBSA ਮੁਤਾਬਕ ਉਸਨੇ ਉਸ ਸੰਗਠਨ ਦੀਆਂ ਅਪਰਾਧਿਕ ਗਤੀਵਿਧੀਆਂ ਨਾਲ ਜੁੜੇ ਕੁਝ ਅਪਰਾਧ ਕਰਨ ਦੀ ਗੱਲ ਮੰਨੀ ਸੀ।
CBSA ਦੇ ਅੰਕੜਿਆਂ ਮੁਤਾਬਕ 3 ਸਤੰਬਰ 2026 ਤੱਕ ਕੈਨੇਡਾ ਵਿੱਚ ਵੱਖ-ਵੱਖ ਅਯੋਗਤਾ ਦੇ ਆਧਾਰ ’ਤੇ 188 ਰਿਮੂਵਲ ਆਰਡਰ ਜਾਰੀ ਕੀਤੇ ਜਾ ਚੁੱਕੇ ਸਨ ਅਤੇ 111 ਵਿਅਕਤੀਆਂ ਨੂੰ ਦੇਸ਼ ਤੋਂ ਹਟਾਇਆ ਜਾ ਚੁੱਕਾ ਸੀ। ਇਨ੍ਹਾਂ ਵਿੱਚ ਪੈਸਿਫਿਕ ਖੇਤਰ ਵਿੱਚ 91 ਆਰਡਰ ਅਤੇ 58 ਰਿਮੂਵਲ, ਪ੍ਰੇਰੀ ਖੇਤਰ ਵਿੱਚ 47 ਆਰਡਰ ਅਤੇ 30 ਰਿਮੂਵਲ, ਜਦਕਿ ਗ੍ਰੇਟਰ ਟੋਰਾਂਟੋ ਖੇਤਰ ਵਿੱਚ 50 ਆਰਡਰ ਅਤੇ 23 ਰਿਮੂਵਲ ਸ਼ਾਮਲ ਹਨ।
