Sports News : ਆਈ.ਸੀ.ਸੀ. ਅੰਡਰ-19 ਪੁਰਸ਼ ਵਰਲਡ ਕੱਪ 2026 ਲਈ ਆਸਟ੍ਰੇਲੀਆਈ ਟੀਮ ਦਾ ਐਲਾਨ ਹੋ ਗਿਆ ਹੈ। ਆਸਟ੍ਰੇਲੀਆ ਨੇ ਟੂਰਨਾਮੈਂਟ ਦੇ ਲਈ ਆਪਣੀ 15 ਮੈਂਬਰੀ ਟੀਮ ਦਾ ਐਲਾਨ ਕੀਤਾ ਹੈ। ਇਹ ਟੂਰਨਾਮੈਂਟ 15 ਜਨਵਰੀ ਤੋਂ 6 ਫਰਵਰੀ ਦੇ ਵਿਚਕਾਰ ਜ਼ਿੰਬਾਬਵੇ ਅਤੇ ਨਾਮੀਬੀਆ ਵਿੱਚ ਖੇਡਿਆ ਜਾਵੇਗਾ। ਮੌਜੂਦਾ ਚੈਂਪੀਅਨ ਆਸਟ੍ਰੇਲੀਆ ਇਸ ਵਾਰ ਆਪਣੇ ਖਿਤਾਬ ਦਾ ਬਚਾਅ ਕਰਨ ਦਾ ਟੀਚਾ ਨਾਲ ਮੈਦਾਨ ਵਿੱਚ ਉਤਰੇਗਾ, ਜਿਸਦੀ ਕਮਾਨ ਨੌਜਵਾਨ ਬੱਲੇਬਾਜ਼ ਓਲੀਵਰ ਪੀਕ ਨੂੰ ਸੌਂਪੀ ਗਈ ਹੈ। ਓਲੀਵਰ ਪੀਕ ਨੇ 2024 ਵਿੱਚ ਸਾਊਥ ਅਫ਼ਰੀਕਾ ਵਿੱਚ ਹੋਏ U19 ਵਰਲਡ ਕੱਪ ਵਿੱਚ ਆਸਟ੍ਰੇਲੀਆ ਦੀ ਜਿੱਤ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ। ਉਹ ਟੂਰਨਾਮੈਂਟ ਦੀ ਸ਼ੁਰੂਆਤ ਵਿੱਚ ਸੱਟ ਲੱਗੇ ਖਿਡਾਰੀ ਦੀ ਥਾਂ ‘ਤੇ ਸ਼ਾਮਲ ਕੀਤੇ ਗਏ ਸਨ। ਉਨ੍ਹਾਂ ਨੇ ਚਾਰ ਪਾਰੀਆਂ ਵਿੱਚ 120 ਦੌੜਾਂ ਬਣਾਈਆਂ। ਫਾਈਨਲ ਵਿੱਚ ਭਾਰਤ ਖਿਲਾਫ਼ ਉਨ੍ਹਾਂ ਨੇ 46* ਦੀ ਮਹੱਤਵਪੂਰਨ ਪਾਰੀ ਖੇਡੀ ਸੀ।
ਤਜਰਬੇ ਅਤੇ ਨੌਜਵਾਨ ਪ੍ਰਤਿਭਾ ਦਾ ਸੰਤੁਲਨ
ਖੱਬੇ ਹੱਥ ਦੇ ਬੱਲੇਬਾਜ਼ ਪੀਕ ਨੇ ਹਾਲ ਹੀ ਵਿੱਚ ਇੰਗਲੈਂਡ ਦੇ ਵਿਰੁੱਧ ਪੀਐਮ ਇਲੈਵਨ ਮੈਚ ਵਿੱਚ ਵੀ ਸ਼ਾਨਦਾਰ ਅਰਧ-ਸੈਂਕੜਾ ਵੀ ਲਗਾਇਆ ਸੀ। ਓਲਿਵਰ ਪੀਕ ਆਸਟ੍ਰੇਲੀਆ ਦੇ ਵਰਲਡ ਕਪ ਸਕਵਾਡ ਵਿੱਚ ਇਕੱਲੇ ਖਿਡਾਰੀ ਹਨ, ਜੋ ਪਿਛਲੇ U19 ਵਰਲਡ ਕੱਪ ਟੀਮ ਦਾ ਹਿੱਸਾ ਸਨ। ਇਹੀ ਕਾਰਨ ਹੈ ਕਿ ਉਨ੍ਹਾਂ ਨੂੰ ਟੀਮ ਦਾ ਕੈਪਟਨ ਬਣਾਇਆ ਗਿਆ ਹੈ। ਟੀਮ ਵਿੱਚ ਵਿਲ ਮਲੈਜਚੁਕ, ਨਿਤੇਸ਼ ਸੈਮੂਅਲ ਅਤੇ ਤੇਜ਼ ਗੇਂਦਬਾਜ਼ ਵਿਲੀਅਮ ਟੇਲਰ ਨੂੰ ਵੀ ਮੌਕਾ ਦਿੱਤਾ ਗਿਆ ਹੈ, ਜੋ ਟੂਰਨਾਮੈਂਟ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਣਗੇ।
ਕੋਚ ਨੇ ਟੀਮ ’ਤੇ ਜਤਾਇਆ ਭਰੋਸਾ
ਆਸਟ੍ਰੇਲੀਆ ਟੀਮ ਨੂੰ ਟਿਮ ਨੀਲਸਨ ਕੋਚ ਕਰਨਗੇ, ਅਤੇ ਉਨ੍ਹਾਂ ਦਾ ਮੰਨਣਾ ਹੈ ਕਿ ਟੀਮ ਲਗਾਤਾਰ ਦੋ ਖਿਤਾਬ ਜਿੱਤਣ ਦੇ ਲਈ ਚੰਗੀ ਤਰ੍ਹਾਂ ਸੰਤੁਲਿਤ ਹੈ। ਨੀਲਸਨ ਨੇ ਕਿਹਾ, “ਸਾਨੂੰ ਆਈ.ਸੀ.ਸੀ. ਅੰਡਰ-19 ਵਿਸ਼ਵ ਕੱਪ ਲਈ ਇੱਕ ਮਜ਼ਬੂਤ ਅਤੇ ਸੰਤੁਲਿਤ ਟੀਮ ਦਾ ਐਲਾਨ ਕਰਦੇ ਹੋਏ ਖੁਸ਼ੀ ਹੋ ਰਹੀ ਹੈ। ਸਾਡਾ ਫੋਕਸ ਇੱਕ ਅਜਿਹੀ ਟੀਮ ਚੁਣਨ ‘ਤੇ ਰਿਹਾ ਹੈ ਜਿਸ ਕੋਲ ਹੁਨਰ ਹੋਣ। ਜਿਨ੍ਹਾਂ ਖਿਡਾਰੀਆਂ ਨੂੰ ਚੁਣਿਆ ਗਿਆ ਹੈ, ਉਨ੍ਹਾਂ ਨੇ ਸਤੰਬਰ ਵਿੱਚ ਭਾਰਤ ਦੇ ਖਿਲਾਫ U19 ਸੀਰੀਜ਼ ਅਤੇ ਹਾਲ ਹੀ ਵਿੱਚ ਪਰਥ ਵਿੱਚ ਹੋਏ ਨੈਸ਼ਨਲ U19 ਚੈਂਪੀਅਨਸ਼ਿਪ ਵਿੱਚ ਆਪਣੀ ਕਾਰਗੁਜ਼ਾਰੀ ਨਾਲ ਪ੍ਰਭਾਵਿਤ ਕੀਤਾ ਹੈ। ਇਹ ਟੂਰਨਾਮੈਂਟ ਇਨ੍ਹਾਂ ਨੌਜਵਾਨ ਖਿਡਾਰੀਆਂ ਲਈ ਆਪਣੇ ਆਪ ਨੂੰ ਦੁਨੀਆ ਦੇ ਸਾਹਮਣੇ ਸਾਬਤ ਕਰਨ ਦਾ ਮੌਕਾ ਹੈ। ਕ੍ਰਿਕਟ ਆਸਟ੍ਰੇਲੀਆ ਦੀ ਰਾਸ਼ਟਰੀ ਵਿਕਾਸ ਮੁਖੀ, ਸੋਨੀਆ ਥੌਮਸਨ ਨੇ ਕਿਹਾ ਕਿ ਇਹ ਟੀਮ ਤਜਰਬੇ ਅਤੇ ਨਵੀਂ ਪ੍ਰਤਿਭਾ ਦੇ ਮਿਸ਼ਰਣ ਦੀ ਇੱਕ ਵਧੀਆ ਉਦਾਹਰਣ ਹੈ।
ਗਰੁੱਪ ਏ: ਆਇਰਲੈਂਡ, ਜਾਪਾਨ ਅਤੇ ਸ਼੍ਰੀਲੰਕਾ ਵਿਰੁੱਧ ਆਹਮੋ-ਸਾਹਮਣੇ
ਆਸਟ੍ਰੇਲੀਆ ਨੂੰ U19 ਵਿਸ਼ਵ ਕੱਪ ਲਈ ਗਰੁੱਪ ਏ ਵਿੱਚ ਰੱਖਿਆ ਗਿਆ ਹੈ, ਜਿੱਥੇ ਉਨ੍ਹਾਂ ਦਾ ਸਾਹਮਣਾ ਆਇਰਲੈਂਡ, ਜਾਪਾਨ ਅਤੇ ਸ਼੍ਰੀਲੰਕਾ ਨਾਲ ਹੋਵੇਗਾ। ਟੀਮ ਜਨਵਰੀ ਦੇ ਸ਼ੁਰੂ ਵਿੱਚ ਨਾਮੀਬੀਆ ਪਹੁੰਚੇਗੀ ਅਤੇ 9 ਤੋਂ 14 ਜਨਵਰੀ ਤੱਕ ਅਭਿਆਸ ਮੈਚ ਖੇਡੇਗੀ। ਇਸ ਵਾਰ, ਆਸਟ੍ਰੇਲੀਆ ਦਾ ਟੀਚਾ ਲਗਾਤਾਰ ਦੂਜੀ ਵਾਰ ਖਿਤਾਬ ਜਿੱਤਣਾ ਹੋਵੇਗਾ। ਟੀਮ ਦੇ ਸੰਤੁਲਨ ਅਤੇ ਪ੍ਰਤਿਭਾ ਨੂੰ ਦੇਖਦੇ ਹੋਏ, ਇਹ ਕਹਿਣਾ ਸੁਰੱਖਿਅਤ ਹੈ ਕਿ ਉਹ ਇੱਕ ਵਾਰ ਫਿਰ ਮਜ਼ਬੂਤ ਦਾਅਵੇਦਾਰੀ ਕਰਨ ਲਈ ਤਿਆਰ ਹਨ।
ਆਈ.ਸੀ.ਸੀ. ਅੰਡਰ-19 ਪੁਰਸ਼ ਵਿਸ਼ਵ ਕੱਪ ਲਈ ਆਸਟ੍ਰੇਲੀਆ ਦੀ ਟੀਮ: ਓਲਿਵਰ ਪੀਕ (ਕੈਪਟਨ), ਕੇਸੀ ਬਾਰਟਨ, ਨਾਦੇਨ ਕੂਰੇ, ਜੇਡਨ ਡਰੇਪਰ, ਸਟੀਵਨ ਹੋਗਨ, ਥੌਮਸ ਹੋਗਨ, ਬੇਨ ਗੋਰਡਨ, ਜੌਨ ਜੇਮਸ, ਚਾਰਲਸ ਲੈਕਮੰਡ, ਐਲੈਕਸ ਲੀ-ਯੰਗ, ਵਿਲ ਮਲੈਜਚੁਕ, ਨਿਤੇਸ਼ ਸੈਮੂਅਲ, ਹੈਡਨ ਸ਼ਿਲਰ, ਆਰਯਨ ਸ਼ਰਮਾ ਅਤੇ ਵਿਲੀਅਮ ਟੇਲਰ।
