ਜਲੰਧਰ: ਤਿਉਹਾਰਾਂ ਦਾ ਸੀਜ਼ਨ ਨੇੜੇ ਆਉਂਦੇ ਹੀ ਜਲੰਧਰ ਦੇ ਪਟਾਕਾ ਕਾਰੋਬਾਰੀਆਂ ਲਈ ਵੱਡੀ ਰਾਹਤ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਕਈ ਦਿਨਾਂ ਤੋਂ ਪਟਾਕਾ ਮਾਰਕੀਟ ਲਈ ਢੁਕਵੀਂ ਜਗ੍ਹਾ ਦੀ ਭਾਲ ਨੂੰ ਲੈ ਕੇ ਬਣੀ ਦੁਵਿਧਾ ਹੁਣ ਖਤਮ ਹੁੰਦੀ ਨਜ਼ਰ ਆ ਰਹੀ ਹੈ। ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਪਠਾਨਕੋਟ ਰੋਡ ’ਤੇ ਪਿੰਡ ਰਾਓਵਾਲੀ ਵਿੱਚ ਕਰੀਬ 5.5 ਏਕੜ ਜ਼ਮੀਨ ’ਤੇ ਅਸਥਾਈ ਪਟਾਕਾ ਮਾਰਕੀਟ ਲਗਾਉਣ ਦੀ ਮਨਜ਼ੂਰੀ ਦਿੱਤੀ ਗਈ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਇਹ ਜ਼ਮੀਨ ਗੋਸਵਾਮੀ ਪਰਿਵਾਰ ਨਾਲ ਸਬੰਧਤ ਹੈ ਅਤੇ ਇਸ ਸਮੇਂ ਇੱਥੇ ਝੋਨੇ ਦੀ ਫ਼ਸਲ ਖੜ੍ਹੀ ਹੈ। ਪਟਾਕਾ ਕਾਰੋਬਾਰੀਆਂ ਨਾਲ ਜੁੜੀਆਂ ਐਸੋਸੀਏਸ਼ਨਾਂ ਨੇ ਇਹ ਜ਼ਮੀਨ ਪੰਜ ਸਾਲ ਲਈ ਲੀਜ਼ ’ਤੇ ਲਈ ਹੋਈ ਹੈ। ਮਾਰਕੀਟ ਦੀ ਤਿਆਰੀ ਲਈ ਫ਼ਸਲ ਨੂੰ ਹਟਾਉਣਾ ਪਵੇਗਾ, ਜਿਸ ਲਈ ਸਬੰਧਤ ਕਿਸਾਨਾਂ ਨੂੰ ਮੁਆਵਜ਼ਾ ਦਿੱਤੇ ਜਾਣ ਦੀ ਗੱਲ ਵੀ ਸਾਹਮਣੇ ਆਈ ਹੈ।
ਜ਼ਮੀਨ ਖਾਲੀ ਹੋਣ ਤੋਂ ਬਾਅਦ ਮਾਰਕੀਟ ਨੂੰ ਸੁਰੱਖਿਆ ਮਾਪਦੰਡਾਂ ਮੁਤਾਬਕ ਤਿਆਰ ਕੀਤਾ ਜਾਵੇਗਾ। ਇਸ ਸਬੰਧੀ ਪ੍ਰਸ਼ਾਸਨ ਨੇ ਕਈ ਸਖ਼ਤ ਸ਼ਰਤਾਂ ਵੀ ਲਾਗੂ ਕੀਤੀਆਂ ਹਨ ਤਾਂ ਜੋ ਤਿਉਹਾਰਾਂ ਦੌਰਾਨ ਲੋਕਾਂ ਦੀ ਸੁਰੱਖਿਆ ਅਤੇ ਆਵਾਜਾਈ ਨੂੰ ਸੁਚਾਰੂ ਰੱਖਿਆ ਜਾ ਸਕੇ।
ਮਾਰਕੀਟ ਲਈ ਤੈਅ ਕੀਤੀਆਂ ਗਈਆਂ ਅਹਿਮ ਸ਼ਰਤਾਂ
ਪ੍ਰਸ਼ਾਸਨ ਦੇ ਨਿਰਦੇਸ਼ਾਂ ਅਨੁਸਾਰ ਪਬਲਿਕ ਅਤੇ ਗੁੱਡਜ਼ ਟਰਾਂਸਪੋਰਟ ਲਈ ਆਉਣ-ਜਾਣ ਦਾ ਪ੍ਰਬੰਧ ਪਲਾਟ ਦੇ ਪਿਛਲੇ ਪਾਸੇ ਤੋਂ ਕੀਤਾ ਜਾਵੇਗਾ। ਹਾਈਵੇ ਵਾਲੇ ਪਾਸੇ ਤੋਂ ਐਂਬੂਲੈਂਸ ਅਤੇ ਫਾਇਰ ਬ੍ਰਿਗੇਡ ਦੀ ਆਵਾਜਾਈ ਲਈ ਰਸਤਾ ਉਪਲਬਧ ਰੱਖਣਾ ਲਾਜ਼ਮੀ ਹੋਵੇਗਾ।
ਮਾਰਕੀਟ ਦੇ ਦਾਖ਼ਲੇ ਅਤੇ ਬਾਹਰ ਨਿਕਲਣ ਵਾਲੇ ਸਥਾਨਾਂ ’ਤੇ ਟ੍ਰੈਫਿਕ ਪ੍ਰਬੰਧ ਸੰਭਾਲਣ ਦੀ ਜ਼ਿੰਮੇਵਾਰੀ ਵੀ ਆਯੋਜਕਾਂ ਦੀ ਹੋਵੇਗੀ। ਇਸ ਤੋਂ ਇਲਾਵਾ ਪਟਾਕਿਆਂ ਦੀਆਂ ਅਸਥਾਈ ਦੁਕਾਨਾਂ ਨੂੰ ਨੈਸ਼ਨਲ ਹਾਈਵੇ ਅਤੇ ਰਿਹਾਇਸ਼ੀ ਇਲਾਕਿਆਂ ਤੋਂ ਘੱਟੋ-ਘੱਟ 50 ਮੀਟਰ ਦੂਰ ਰੱਖਣਾ ਹੋਵੇਗਾ।
ਪੈਟਰੋਲ ਪੰਪ ਤੋਂ ਵੀ 50 ਮੀਟਰ ਦੀ ਦੂਰੀ ਲਾਜ਼ਮੀ ਹੋਵੇਗੀ, ਜਦਕਿ ਫੈਕਟਰੀਆਂ ਅਤੇ ਪਾਰਕਿੰਗ ਖੇਤਰ ਤੋਂ ਦੁਕਾਨਾਂ ਲਈ ਘੱਟੋ-ਘੱਟ 15 ਮੀਟਰ ਦਾ ਫਾਸਲਾ ਰੱਖਣਾ ਪਵੇਗਾ। ਦੋ ਦੁਕਾਨਾਂ ਵਿਚਕਾਰ ਵੀ ਘੱਟੋ-ਘੱਟ 3 ਮੀਟਰ ਦੀ ਦੂਰੀ ਯਕੀਨੀ ਬਣਾਉਣੀ ਹੋਵੇਗੀ।
ਹਰ ਦੁਕਾਨ ’ਤੇ ਹੋਵੇਗਾ ਅੱਗ ਤੋਂ ਬਚਾਅ ਦਾ ਪ੍ਰਬੰਧ
ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦਿਆਂ ਹਰੇਕ ਦੁਕਾਨ ਦੇ ਬਾਹਰ ਘੱਟੋ-ਘੱਟ 4 ਪੋਰਟੇਬਲ ਫਾਇਰ ਐਕਸਟਿੰਗਵਿਸ਼ਰ ਰੱਖਣੇ ਲਾਜ਼ਮੀ ਹੋਣਗੇ। ਇਸ ਦੇ ਨਾਲ ਹੀ ਹਰ ਦੁਕਾਨ ਦੇ ਨੇੜੇ ਕਰੀਬ 200 ਲੀਟਰ ਪਾਣੀ ਦੀ ਵਿਵਸਥਾ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ।
ਪਟਾਕਿਆਂ ਦੀ ਵਿਕਰੀ ਲਈ ਸਮਾਂ ਵੀ ਨਿਰਧਾਰਤ ਕੀਤਾ ਗਿਆ ਹੈ। ਮਾਰਕੀਟ ਵਿੱਚ ਪਟਾਕਿਆਂ ਦੀ ਵਿਕਰੀ ਸਵੇਰੇ 10 ਵਜੇ ਤੋਂ ਸ਼ਾਮ 7:30 ਵਜੇ ਤੱਕ ਕੀਤੀ ਜਾ ਸਕੇਗੀ।
ਪਹਿਲਾਂ ਕਈ ਥਾਵਾਂ ’ਤੇ ਹੋਈ ਸੀ ਚਰਚਾ
ਜਲੰਧਰ ਵਿੱਚ ਪਟਾਕਾ ਮਾਰਕੀਟ ਦੀ ਜਗ੍ਹਾ ਨੂੰ ਲੈ ਕੇ ਪਿਛਲੇ ਕਈ ਹਫ਼ਤਿਆਂ ਤੋਂ ਚਰਚਾ ਚੱਲ ਰਹੀ ਸੀ। ਲੈਦਰ ਕੰਪਲੈਕਸ ਨੇੜੇ ਖਾਲੀ ਪਲਾਟ ਸਮੇਤ ਕਈ ਥਾਵਾਂ ਦੇ ਵਿਕਲਪਾਂ ’ਤੇ ਵਿਚਾਰ ਕੀਤਾ ਗਿਆ, ਪਰ ਕਿਸੇ ਵੀ ਸਥਾਨ ਨੂੰ ਅੰਤਿਮ ਮਨਜ਼ੂਰੀ ਨਹੀਂ ਮਿਲ ਸਕੀ ਸੀ।
ਹੁਣ ਰਾਓਵਾਲੀ ਦੀ ਜ਼ਮੀਨ ਨੂੰ ਪ੍ਰਸ਼ਾਸਨਿਕ ਮਨਜ਼ੂਰੀ ਮਿਲਣ ਤੋਂ ਬਾਅਦ ਕਾਰੋਬਾਰੀਆਂ ਵਿੱਚ ਮਾਰਕੀਟ ਲੱਗਣ ਦੀ ਉਮੀਦ ਵਧ ਗਈ ਹੈ। ਹਾਲਾਂਕਿ ਰੇਰੂ ਚੌਕ ’ਤੇ ਟ੍ਰੈਫਿਕ ਦਾ ਵਾਧੂ ਦਬਾਅ ਅਤੇ ਰਾਓਵਾਲੀ ਵੱਲ ਜਾਂਦੀ ਧੋਗੜੀ ਰੋਡ ਦੀ ਹਾਲਤ ਪ੍ਰਸ਼ਾਸਨ ਲਈ ਚੁਣੌਤੀ ਬਣ ਸਕਦੀ ਹੈ। ਫਿਲਹਾਲ ਅਗਲਾ ਧਿਆਨ ਜ਼ਮੀਨ ਨੂੰ ਤਿਆਰ ਕਰਨ, ਸੁਰੱਖਿਆ ਪ੍ਰਬੰਧ ਪੂਰੇ ਕਰਨ ਅਤੇ ਮਾਰਕੀਟ ਦੀਆਂ ਹੋਰ ਤਿਆਰੀਆਂ ’ਤੇ ਰਹੇਗਾ।
ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਦੇਖਣ ਲਈ Chardikala Time TV ਨੂੰ ਕਰੋ Subscribe:-
Facebook:- https://www.facebook.com/Chardiklatimetvlive
