ਉੱਤਰ ਪ੍ਰਦੇਸ਼: ਉੱਤਰ ਪ੍ਰਦੇਸ਼ ਵਿੱਚ ਮੰਗਲਵਾਰ ਨੂੰ ਗੰਗਾ ਦੁਸਹਿਰੇ ਦਾ ਪਵਿੱਤਰ ਤਿਉਹਾਰ ਭਾਰੀ ਸ਼ਰਧਾ ਅਤੇ ਉਤਸ਼ਾਹ ਨਾਲ ਮਨਾਇਆ ਗਿਆ। ਸਵੇਰ ਤੋਂ ਹੀ ਵਾਰਾਣਸੀ, ਪ੍ਰਯਾਗਰਾਜ ਅਤੇ ਅਯੁੱਧਿਆ ਸਮੇਤ ਕਈ ਧਾਰਮਿਕ ਸ਼ਹਿਰਾਂ ਦੇ ਘਾਟਾਂ ‘ਤੇ ਲੱਖਾਂ ਸ਼ਰਧਾਲੂਆਂ ਦੀ ਭੀੜ ਇਕੱਠੀ ਹੋਣੀ ਸ਼ੁਰੂ ਹੋ ਗਈ। ਭਗਤਾਂ ਨੇ ਗੰਗਾ ਨਦੀ ਵਿੱਚ ਪਵਿੱਤਰ ਇਸ਼ਨਾਨ ਕਰਕੇ ਮਾਂ ਗੰਗਾ ਦੀ ਅਰਾਧਨਾ ਕੀਤੀ ਅਤੇ ਦੇਸ਼ ਦੀ ਖੁਸ਼ਹਾਲੀ ਤੇ ਸ਼ਾਂਤੀ ਲਈ ਅਰਦਾਸਾਂ ਕੀਤੀਆਂ।
ਵਾਰਾਣਸੀ ਦੇ ਪ੍ਰਸਿੱਧ ਅੱਸੀ ਘਾਟ ‘ਤੇ ਇਸ ਵਾਰ ਗੰਗਾ ਦੁਸਹਿਰੇ ਦੌਰਾਨ ਇੱਕ ਵਿਸ਼ੇਸ਼ ਧਾਰਮਿਕ ਆਯੋਜਨ ਨੇ ਸਭ ਦਾ ਧਿਆਨ ਖਿੱਚਿਆ। ਇੱਥੇ ਮਾਂ ਗੰਗਾ ਨੂੰ 5,100 ਸਾੜੀਆਂ ਨਾਲ ਤਿਆਰ ਕੀਤੀ ਗਈ ਵਿਸ਼ਾਲ ਚੁੰਨੀ ਭੇਟ ਕੀਤੀ ਗਈ। ਜਾਣਕਾਰੀ ਅਨੁਸਾਰ ਇਹ ਸਾੜੀਆਂ ਦੇਸ਼ ਦੇ 12 ਵੱਖ-ਵੱਖ ਰਾਜਾਂ ਤੋਂ ਇਕੱਠੀਆਂ ਕੀਤੀਆਂ ਗਈਆਂ ਸਨ। ਲਗਭਗ 25,500 ਫੁੱਟ ਲੰਬੀ ਇਸ ਚੁੰਨੀ ਨੂੰ ਘਾਟ ਦੇ ਕਿਨਾਰੇ ਵਿਸ਼ੇਸ਼ ਵਿਧੀ ਨਾਲ ਅਰਪਿਤ ਕੀਤਾ ਗਿਆ। ਇਹ ਨਜ਼ਾਰਾ ਦੇਖਣ ਲਈ ਵੱਡੀ ਗਿਣਤੀ ਵਿੱਚ ਲੋਕ ਮੌਜੂਦ ਰਹੇ ਅਤੇ ਪੂਰਾ ਘਾਟ “ਹਰ ਹਰ ਗੰਗੇ” ਦੇ ਜੈਕਾਰਿਆਂ ਨਾਲ ਗੂੰਜ ਉਠਿਆ।
ਪੁਜਾਰੀਆਂ ਵੱਲੋਂ ਵੇਦ ਮੰਤ੍ਰਾਂ ਦੇ ਉਚਾਰਨ ਵਿਚਕਾਰ ਹੋਏ ਇਸ ਧਾਰਮਿਕ ਕਰਮਕਾਂਡ ਨੇ ਮਾਹੌਲ ਨੂੰ ਹੋਰ ਵੀ ਆਧਿਆਤਮਿਕ ਬਣਾ ਦਿੱਤਾ। ਸ਼ਰਧਾਲੂਆਂ ਨੇ ਫੁੱਲਾਂ, ਦੀਵਿਆਂ ਅਤੇ ਚੁੰਨੀਆਂ ਨਾਲ ਮਾਂ ਗੰਗਾ ਦੀ ਭਗਤੀ ਕੀਤੀ। ਕਈ ਥਾਵਾਂ ‘ਤੇ ਭਜਨ-ਕੀਰਤਨ ਅਤੇ ਗੰਗਾ ਆਰਤੀ ਦਾ ਵੀ ਆਯੋਜਨ ਕੀਤਾ ਗਿਆ।
ਅਯੁੱਧਿਆ ਅਤੇ ਪ੍ਰਯਾਗਰਾਜ ਦੇ ਘਾਟਾਂ ‘ਤੇ ਵੀ ਭਾਰੀ ਭੀੜ ਦੇਖਣ ਨੂੰ ਮਿਲੀ। ਸੁਰੱਖਿਆ ਅਤੇ ਭੀੜ ਪ੍ਰਬੰਧਨ ਲਈ ਪੁਲਿਸ ਅਤੇ ਪ੍ਰਸ਼ਾਸਨ ਵੱਲੋਂ ਵਿਸ਼ੇਸ਼ ਇੰਤਜ਼ਾਮ ਕੀਤੇ ਗਏ ਸਨ। ਐਨ.ਡੀ.ਆਰ.ਐਫ. ਅਤੇ ਜਲ ਪੁਲਿਸ ਦੀਆਂ ਟੀਮਾਂ ਨੂੰ ਵੀ ਤੈਨਾਤ ਕੀਤਾ ਗਿਆ ਸੀ ਤਾਂ ਜੋ ਕਿਸੇ ਵੀ ਅਣਚਾਹੀ ਘਟਨਾ ਤੋਂ ਬਚਿਆ ਜਾ ਸਕੇ।
ਧਾਰਮਿਕ ਮਾਨਤਾ ਅਨੁਸਾਰ ਗੰਗਾ ਦੁਸਹਿਰੇ ਦੇ ਦਿਨ ਮਾਂ ਗੰਗਾ ਧਰਤੀ ‘ਤੇ ਅਵਤਾਰ ਲੈ ਕੇ ਆਈਆਂ ਸਨ। ਇਸ ਦਿਨ ਗੰਗਾ ਇਸ਼ਨਾਨ ਅਤੇ ਦਾਨ-ਪੁੰਨ ਕਰਨ ਨਾਲ ਪਾਪਾਂ ਤੋਂ ਮੁਕਤੀ ਮਿਲਦੀ ਹੈ। ਇਸ ਕਰਕੇ ਹਰ ਸਾਲ ਲੱਖਾਂ ਸ਼ਰਧਾਲੂ ਗੰਗਾ ਤਟਾਂ ‘ਤੇ ਪਹੁੰਚ ਕੇ ਮਾਂ ਗੰਗਾ ਦਾ ਆਸ਼ੀਰਵਾਦ ਪ੍ਰਾਪਤ ਕਰਦੇ ਹਨ।
