ਕਰਨਾਟਕ: ਮਸ਼ਹੂਰ ਮ੍ਰਿਦੰਗਮ ਵਾਦਕ ਸ਼੍ਰੀਧਰ ਪਾਰਥਸਾਰਥੀ (54) ਦਾ ਸ਼ੁੱਕਰਵਾਰ ਸਵੇਰੇ ਪੁਣੇ ਵਿੱਚ ਦੀਵਾਲੀ ਦੇ ਇੱਕ ਪ੍ਰੋਗਰਾਮ ਦੌਰਾਨ ਦਿਲ ਦਾ ਦੌਰਾ ਪੈਣ ਕਾਰਨ ਦੇਹਾਂਤ ਹੋ ਗਿਆ। ਕਰਨਾਟਕ ਸੰਗੀਤ ਦੇ ਇਸ ਪ੍ਰਸਿੱਧ ਤਾਲ-ਵਾਦਕ ਨੂੰ ਦੀਵਾਲੀ ਦੀ ਸਵੇਰ ‘ਦੀਵਾਲੀ ਪਹਾਟ’ (ਦੀਵਾਲੀ ਦੀ ਸਵੇਰ) ਪ੍ਰੋਗਰਾਮ ਵਿੱਚ ਪੇਸ਼ਕਾਰੀ ਦਿੰਦਿਆਂ ਲਗਭਗ ਇੱਕ ਘੰਟਾ ਹੋ ਚੁੱਕਾ ਸੀ, ਜਦੋਂ 6 ਨਵੰਬਰ ਦੀ ਸਵੇਰ ਕਰੀਬ 7 ਵਜੇ ਉਹ ਅਚਾਨਕ ਸਟੇਜ ’ਤੇ ਡਿੱਗ ਪਏ।
ਉੱਥੇ ਮੌਜੂਦ ਕਈ ਡਾਕਟਰਾਂ ਨੇ ਉਨ੍ਹਾਂ ਦੀ ਮਦਦ ਕਰਨ ਦੀ ਕੋਸ਼ਿਸ਼ ਕੀਤੀ। ਉਨ੍ਹਾਂ ਨੂੰ ਕਾਰਡੀਅਕ ਐਂਬੂਲੈਂਸ ਰਾਹੀਂ ਮਣੀਪਾਲ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਸੀ.ਪੀ.ਆਰ. (CPR) ਦਿੱਤਾ। ਇਹ ਜਾਣਕਾਰੀ ਬਾਣੇਰ ਪੁਲਿਸ ਸਟੇਸ਼ਨ ਦੇ ਸੀਨੀਅਰ ਇੰਸਪੈਕਟਰ ਚੰਦਰਸ਼ੇਖਰ ਸਾਵੰਤ ਨੇ ਦਿੱਤੀ। ਸਾਵੰਤ ਨੇ ਦੱਸਿਆ ਕਿ ਹਾਲਾਂਕਿ ਉਨ੍ਹਾਂ ਨੂੰ ਬਚਾਇਆ ਨਹੀਂ ਜਾ ਸਕਿਆ ਅਤੇ ਹਸਪਤਾਲ ਵਿੱਚ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ।
ਸੰਗੀਤਕਾਰ ਅਤੇ ਗਾਇਕ ਸ਼ੰਕਰ ਮਹਾਦੇਵਨ ਨੇ ਪਾਰਥਸਾਰਥੀ ਦੇ ਦੇਹਾਂਤ ’ਤੇ ਦੁੱਖ ਪ੍ਰਗਟ ਕੀਤਾ। ਉਨ੍ਹਾਂ ਨੇ ਪਾਰਥਸਾਰਥੀ ਨੂੰ ਸਭ ਤੋਂ ਬਿਹਤਰੀਨ ਤਾਲ-ਵਾਦਕਾਂ ਵਿੱਚੋਂ ਇੱਕ ਅਤੇ ਇੱਕ ਅਸਾਧਾਰਨ ਸੰਗੀਤਕਾਰ ਦੱਸਿਆ। ਸੋਸ਼ਲ ਮੀਡੀਆ ’ਤੇ ਇੱਕ ਭਾਵੁਕ ਪੋਸਟ ਸਾਂਝੀ ਕਰਦਿਆਂ ਮਹਾਦੇਵਨ ਨੇ ਯਾਦ ਕੀਤਾ ਕਿ ਲਗਭਗ 40 ਸਾਲ ਪਹਿਲਾਂ ਉਨ੍ਹਾਂ ਦੇ ਪਹਿਲੇ ਕਰਨਾਟਕ ਸ਼ਾਸਤਰੀ ਸੰਗੀਤ ਪ੍ਰੋਗਰਾਮ ਵਿੱਚ ਵੀ ਪਾਰਥਸਾਰਥੀ ਸ਼ਾਮਲ ਹੋਏ ਸਨ।
ਮਹਾਦੇਵਨ ਨੇ ਕਿਹਾ, ‘‘ਮੈਂ ਇਸ ਗੱਲ ਨੂੰ ਸਵੀਕਾਰ ਹੀ ਨਹੀਂ ਕਰ ਪਾ ਰਿਹਾ ਹਾਂ। ਇਹ ਮੇਰੇ ਅਤੇ ਸੰਗੀਤ ਜਗਤ ਲਈ ਬਹੁਤ ਵੱਡਾ ਘਾਟਾ ਹੈ।’’ ਉਨ੍ਹਾਂ ਨੇ ਪਾਰਥਸਾਰਥੀ ਨੂੰ ਆਪਣਾ ਇੱਕ ਕਰੀਬੀ ਦੋਸਤ ਦੱਸਿਆ, ਜਿਸ ਨਾਲ ਉਨ੍ਹਾਂ ਨੇ ਸੰਗੀਤ, ਹਾਸੇ-ਮਜ਼ਾਕ ਅਤੇ ਖੁਸ਼ੀਆਂ ਦੇ ਅਣਗਿਣਤ ਪਲ ਬਿਤਾਏ ਸਨ। ਮਹਾਦੇਵਨ ਨੇ ਕਿਹਾ ਕਿ ਆਪਣੇ ਦੋਸਤ ਦੇ ਦੇਹਾਂਤ ਦੇ ਹਾਲਾਤ ਨੇ ਉਨ੍ਹਾਂ ਨੂੰ ਬੁਰੀ ਤਰ੍ਹਾਂ ਤੋੜ ਕੇ ਰੱਖ ਦਿੱਤਾ ਹੈ। ਉਨ੍ਹਾਂ ਨੇ ਕਿਹਾ, ‘‘ਕੀ ਤੁਸੀਂ ਕਲਪਨਾ ਕਰ ਸਕਦੇ ਹੋ? ਇਸ ਦੁਨੀਆ ਤੋਂ ਵਿਦਾ ਲੈਣ ਦਾ ਇਹ ਕਿਹੋ ਜਿਹਾ ਤਰੀਕਾ ਸੀ।’’
