ਪਟਨਾ: 15 ਸਾਲਾ ਕ੍ਰਿਕਟਰ ਵੈਭਵ ਸੂਰਿਆਵੰਸ਼ੀ ਨੂੰ ਪਹਿਲੀ ਵਾਰ ਕਿਸੇ ਟੀਮ ਦੀ ਕਪਤਾਨੀ ਸੌਂਪੀ ਗਈ ਹੈ। ਉਸ ਨੂੰ ਸਈਦ ਮੁਸ਼ਤਾਕ ਅਲੀ ਟੀ-20 ਟਰਾਫੀ ਵਿੱਚ ਬਿਹਾਰ ਦੀ ਟੀਮ ਦਾ ਕਪਤਾਨ ਨਿਯੁਕਤ ਕੀਤਾ ਗਿਆ ਹੈ। ਇਸ ਨਿਯੁਕਤੀ ਨਾਲ ਵੈਭਵ ਨੂੰ ਆਪਣੇ ਕ੍ਰਿਕਟ ਕਰੀਅਰ ਵਿੱਚ ਨਵੀਂ ਜ਼ਿੰਮੇਵਾਰੀ ਮਿਲੀ ਹੈ।
ਵੈਭਵ ਇਸ ਤੋਂ ਪਹਿਲਾਂ ਵੀ ਬਿਹਾਰ ਦੀਆਂ ਟੀਮਾਂ ਨਾਲ ਜੁੜੀਆਂ ਅਹਿਮ ਭੂਮਿਕਾਵਾਂ ਨਿਭਾ ਚੁੱਕਾ ਹੈ। ਉਸ ਨੇ ਦਲੀਪ ਟਰਾਫੀ ਵਿੱਚ ਬਿਹਾਰ ਦੀ ਰਣਜੀ ਟੀਮ ਅਤੇ ਪੂਰਬੀ ਜ਼ੋਨ ਦੇ ਉਪ-ਕਪਤਾਨ ਵਜੋਂ ਸੇਵਾ ਨਿਭਾਈ ਸੀ। ਹੁਣ ਸਈਦ ਮੁਸ਼ਤਾਕ ਅਲੀ ਟਰਾਫੀ ਵਿੱਚ ਉਹ ਬਿਹਾਰ ਦੀ ਅਗਵਾਈ ਕਰੇਗਾ।
ਵੈਭਵ ਦੀ ਬੱਲੇਬਾਜ਼ੀ ਵੀ ਪਹਿਲਾਂ ਇਸੇ ਟੂਰਨਾਮੈਂਟ ਦੌਰਾਨ ਚਰਚਾ ਵਿੱਚ ਰਹੀ ਹੈ। ਉਸ ਨੇ ਸਈਦ ਮੁਸ਼ਤਾਕ ਅਲੀ ਟਰਾਫੀ ਵਿੱਚ 58 ਗੇਂਦਾਂ ’ਤੇ ਸੈਂਕੜਾ ਲਗਾਇਆ ਸੀ। ਇਸ ਪ੍ਰਦਰਸ਼ਨ ਨੇ ਉਸ ਦੀ ਹਮਲਾਵਰ ਬੱਲੇਬਾਜ਼ੀ ਨੂੰ ਉਜਾਗਰ ਕੀਤਾ।
ਹੁਣ ਕਪਤਾਨ ਵਜੋਂ ਉਸ ਦੇ ਸਾਹਮਣੇ ਟੀਮ ਨੂੰ ਇਕੱਠੇ ਲੈ ਕੇ ਚੱਲਣ ਅਤੇ ਮੈਦਾਨ ’ਤੇ ਰਣਨੀਤਕ ਫ਼ੈਸਲੇ ਕਰਨ ਦੀ ਜ਼ਿੰਮੇਵਾਰੀ ਹੋਵੇਗੀ। ਛੋਟੀ ਉਮਰ ਵਿੱਚ ਮਿਲੀ ਇਹ ਕਪਤਾਨੀ ਉਸ ਦੇ ਕ੍ਰਿਕਟ ਸਫ਼ਰ ਦਾ ਇੱਕ ਮਹੱਤਵਪੂਰਨ ਪੜਾਅ ਹੈ।
