ਸਪੋਰਟਸ ਡੈਸਕ: ਏਸ਼ੀਅਨ ਪੈਰਾ ਗੇਮਜ਼ 2026 ਵਿੱਚ ਅੱਜ , ਸ਼ੁੱਕਰਵਾਰ ਨੂੰ ਭਾਰਤੀ ਪੈਰਾ-ਐਥਲੀਟ ਸੰਦੀਪ ਨੇ ਪੁਰਸ਼ਾਂ ਦੀ 400 ਮੀਟਰ T64 ਸਪਰਧਾ ਵਿੱਚ ਨਵਾਂ T44 ਵਰਲਡ ਰਿਕਾਰਡ ਬਣਾਉਂਦਿਆਂ ਗੋਲਡ ਮੈਡਲ ਜਿੱਤਿਆ। ਇਸੇ ਸਪਰਧਾ ਵਿੱਚ ਉਨ੍ਹਾਂ ਦੇ ਸਾਥੀ ਅਜੇ ਕੁਮਾਰ ਨੇ ਬ੍ਰੌਂਜ਼ ਮੈਡਲ ਹਾਸਲ ਕੀਤਾ। ਇਸ ਦੇ ਨਾਲ ਹੀ ਏਸ਼ੀਅਨ ਪੈਰਾ ਗੇਮਜ਼ ਵਿੱਚ ਭਾਰਤ ਦੇ ਕੁੱਲ ਮੈਡਲਾਂ ਦੀ ਗਿਣਤੀ 100 ਦੇ ਅੰਕੜੇ ਤੱਕ ਪਹੁੰਚ ਗਈ।
ਸੰਦੀਪ ਨੇ 52.28 ਸਕਿੰਟ ਦਾ ਸਮਾਂ ਲੈ ਕੇ ਇਹ ਖ਼ਿਤਾਬ ਜਿੱਤਿਆ। ਉਨ੍ਹਾਂ ਨੇ ਸਾਊਦੀ ਅਰਬ ਦੇ ਨੂਰ ਅਲਸਾਨਾ ਦੇ ਨਾਂ ਦਰਜ ਪਿਛਲੇ T44 ਵਰਲਡ ਰਿਕਾਰਡ ਨੂੰ ਅੱਧੇ ਸਕਿੰਟ ਤੋਂ ਵੀ ਵੱਧ ਦੇ ਫ਼ਰਕ ਨਾਲ ਪਿੱਛੇ ਛੱਡ ਦਿੱਤਾ। ਅਜੇ ਕੁਮਾਰ 53.61 ਸਕਿੰਟ ਦੇ ਸਮੇਂ ਨਾਲ ਤੀਜੇ ਸਥਾਨ ‘ਤੇ ਰਹੇ, ਜਿਸ ਨਾਲ ਭਾਰਤ ਦੇ ਦੋ ਖਿਡਾਰੀ ਪੋਡੀਅਮ ‘ਤੇ ਪਹੁੰਚ ਗਏ। ਇਨ੍ਹਾਂ ਦੋ ਮੈਡਲਾਂ ਨਾਲ ਭਾਰਤ ਦੇ ਕੁੱਲ ਮੈਡਲਾਂ ਦੀ ਗਿਣਤੀ 100 ਹੋ ਗਈ ਹੈ, ਜਿਸ ਵਿੱਚ 25 ਗੋਲਡ, 32 ਸਿਲਵਰ ਅਤੇ 43 ਬ੍ਰੌਂਜ਼ ਮੈਡਲ ਸ਼ਾਮਲ ਹਨ। ਮੈਡਲ ਸੂਚੀ ਵਿੱਚ ਭਾਰਤ ਚੌਥੇ ਸਥਾਨ ‘ਤੇ ਬਣਿਆ ਹੋਇਆ ਹੈ, ਜਦਕਿ ਚੀਨ 333 ਮੈਡਲਾਂ ਨਾਲ ਸਭ ਤੋਂ ਉੱਪਰ ਹੈ।
ਭਾਰਤ ਏਸ਼ੀਅਨ ਪੈਰਾ ਗੇਮਜ਼ ਵਿੱਚ ਆਪਣੇ ਹੁਣ ਤੱਕ ਦੇ ਸਰਵੋਤਮ ਪ੍ਰਦਰਸ਼ਨ (111 ਮੈਡਲ) ਦੇ ਨੇੜੇ ਪਹੁੰਚ ਗਿਆ ਹੈ, ਜੋ 2023 ਵਿੱਚ ਹਾਂਗਜ਼ੂ (2022 ਐਡੀਸ਼ਨ) ਵਿੱਚ ਹਾਸਲ ਕੀਤਾ ਗਿਆ ਸੀ। ਮੁਕਾਬਲੇ ਵਿੱਚ ਅਜੇ ਡੇਢ ਦਿਨ ਦਾ ਸਮਾਂ ਬਾਕੀ ਹੈ ਅਤੇ ਇਸ ਰਿਕਾਰਡ ਨੂੰ ਤੋੜਨ ਲਈ ਭਾਰਤੀ ਦਲ ਨੂੰ 12 ਹੋਰ ਮੈਡਲਾਂ ਦੀ ਲੋੜ ਹੈ।
ਭਾਰਤ ਲਈ ਇਹ ਦਿਨ ਕਾਫ਼ੀ ਸਫ਼ਲ ਰਿਹਾ। ਬੈਡਮਿੰਟਨ ਦੇ ਪੁਰਸ਼ਾਂ ਦੇ ਸਿੰਗਲਜ਼ SL3 ਫਾਈਨਲ ਵਿੱਚ ਨਿਤੇਸ਼ ਕੁਮਾਰ ਨੇ ਆਪਣੇ ਹੀ ਦੇਸ਼ ਦੇ ਪ੍ਰਮੋਦ ਭਗਤ ਨੂੰ 21-18, 21-16 ਨਾਲ ਹਰਾ ਕੇ ਗੋਲਡ ਮੈਡਲ ਜਿੱਤਿਆ, ਜਦਕਿ ਪ੍ਰਮੋਦ ਨੂੰ ਸਿਲਵਰ ਮੈਡਲ ਨਾਲ ਸਬਰ ਕਰਨਾ ਪਿਆ। ਨਵੀਨ ਸ਼ਿਵਕੁਮਾਰ ਨੇ ਵੀ ਬੈਡਮਿੰਟਨ ਵਿੱਚ ਇੱਕ ਹੋਰ ਗੋਲਡ ਮੈਡਲ ਦਿਵਾਇਆ। ਉਨ੍ਹਾਂ ਨੇ ਪੁਰਸ਼ਾਂ ਦੇ ਸਿੰਗਲਜ਼ SL4 ਫਾਈਨਲ ਵਿੱਚ ਇੰਡੋਨੇਸ਼ੀਆ ਦੇ ਫ੍ਰੈਡੀ ਸੇਤਿਆਵਾਨ ਨੂੰ 21-9, 21-17 ਨਾਲ ਹਰਾਇਆ। ਪੈਰਾ ਆਰਚਰੀ (ਤੀਰਅੰਦਾਜ਼ੀ) ਵਿੱਚ ਹਰਵਿੰਦਰ ਸਿੰਘ ਅਤੇ ਵਿਜੇ ਸੁੰਡੀ ਨੇ ਪੁਰਸ਼ਾਂ ਦੇ ਰਿਕਰਵ ਡਬਲਜ਼ ਵਿੱਚ ਚੀਨ ਨੂੰ 5-1 ਨਾਲ ਹਰਾ ਕੇ ਗੋਲਡ ਮੈਡਲ ਜਿੱਤਿਆ।
ਇਸ ਤੋਂ ਇਲਾਵਾ ਭਾਰਤ ਨੇ ਕਈ ਸਿਲਵਰ ਮੈਡਲ ਵੀ ਆਪਣੇ ਨਾਂ ਕੀਤੇ। ਮਹਿਲਾਵਾਂ ਦੇ ਸਿੰਗਲਜ਼ SU5 ਬੈਡਮਿੰਟਨ ਫਾਈਨਲ ਵਿੱਚ ਤੁਲਸੀਮਥੀ ਮੁਰੂਗੇਸਨ ਨੂੰ ਚੀਨ ਦੀ ਯਾਂਗ ਕਿਉਸ਼ੀਆ ਤੋਂ 18-21, 11-21 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ, ਜਦਕਿ ਮਹਿਲਾਵਾਂ ਦੇ ਸਿੰਗਲਜ਼ SH6 ਫਾਈਨਲ ਵਿੱਚ ਨਿਤਿਆ ਸ਼੍ਰੀ ਸੁਮਤੀ ਸਿਵਨ ਨੂੰ ਚੀਨ ਦੀ ਲੀ ਫੇਂਗਮੇਈ ਤੋਂ 12-21, 13-21 ਨਾਲ ਹਾਰ ਮਿਲੀ। ਪੈਰਾ ਆਰਚਰੀ ਵਿੱਚ ਪੂਜਾ ਜਤਿਆਨ ਅਤੇ ਭਾਵਨਾ ਚੌਧਰੀ ਦੀ ਮਹਿਲਾ ਰਿਕਰਵ ਡਬਲਜ਼ ਜੋੜੀ ਨੂੰ ਚੀਨ ਤੋਂ ਹਾਰਨ ਤੋਂ ਬਾਅਦ ਸਿਲਵਰ ਮੈਡਲ ਮਿਲਿਆ। ਪ੍ਰਮੋਦ ਬਿਜਾਰਨੀਆ ਨੇ ਪੁਰਸ਼ਾਂ ਦੀ 1500 ਮੀਟਰ T46 ਸਪਰਧਾ ਵਿੱਚ 4:09.65 ਦਾ ਸਮਾਂ ਕੱਢ ਕੇ ਆਪਣਾ ਸਿਲਵਰ ਮੈਡਲ ਬਰਕਰਾਰ ਰੱਖਿਆ, ਜਦਕਿ ਨਿਮਿਸ਼ਾ ਸੁਰੇਸ਼ ਨੇ ਮਹਿਲਾਵਾਂ ਦੀ ਲੌਂਗ ਜੰਪ T47 ਸਪਰਧਾ ਵਿੱਚ 5.37 ਮੀਟਰ ਦੀ ਸਰਵੋਤਮ ਕੋਸ਼ਿਸ਼ ਨਾਲ ਸਿਲਵਰ ਮੈਡਲ ਜਿੱਤਿਆ।
ਭਾਰਤ ਨੇ ਪੁਰਸ਼ਾਂ ਦੇ ਡਬਲਜ਼ ਕਲਾਸ MD4 ਪੈਰਾ ਟੇਬਲ ਟੈਨਿਸ ਵਿੱਚ ਵੀ ਬ੍ਰੌਂਜ਼ ਮੈਡਲ ਜਿੱਤਿਆ, ਜਿੱਥੇ ਜੇਹਾਨ ਮਦਾਨ ਅਤੇ ਸ਼ੁਭਮ ਵਾਧਵਾ ਨੂੰ ਦੱਖਣੀ ਕੋਰੀਆ ਦੇ ਜਿਨਚਿਓਲ ਪਾਰਕ ਅਤੇ ਕਿਊਂਗਹਿਊਨ ਕਿਮ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਇਸ ਦੌਰਾਨ ਅਵਨੀ ਲੇਖਰਾ ਮਹਿਲਾਵਾਂ ਦੀ 50 ਮੀਟਰ ਰਾਈਫਲ 3 ਪੋਜ਼ੀਸ਼ਨ SH1 ਸਪਰਧਾ ਦੇ ਫਾਈਨਲ ਲਈ ਪਹਿਲੇ ਸਥਾਨ ‘ਤੇ ਰਹੀ, ਜਦਕਿ ਉਨ੍ਹਾਂ ਦੀ ਸਾਥੀ ਮੋਨਾ ਅਗਰਵਾਲ ਕੁਆਲੀਫਿਕੇਸ਼ਨ ਵਿੱਚ ਛੇਵੇਂ ਸਥਾਨ ‘ਤੇ ਰਹੀ। ਭਾਰਤੀ ਦਲ ਲਗਾਤਾਰ ਵੱਖ-ਵੱਖ ਖੇਡਾਂ ਵਿੱਚ ਮੈਡਲ ਜਿੱਤ ਰਿਹਾ ਹੈ ਅਤੇ ਖੇਡਾਂ ਦੀ ਸਮਾਪਤੀ ਤੋਂ ਪਹਿਲਾਂ ਦੇਸ਼ ਆਪਣੇ ਪਿਛਲੇ ਸਰਵੋਤਮ ਮੈਡਲ ਰਿਕਾਰਡ ਨੂੰ ਪਿੱਛੇ ਛੱਡਣ ਦੀ ਕੋਸ਼ਿਸ਼ ਕਰੇਗਾ।
